ﷲ ތަޢާލާގެ ޙަޟްރަތުން ވާގިއެދުމަކީ ކަމެއް އަމިއްލައަށް ކުރަން މަސައްކަތްކޮށް، އެކަމެއް ޙާޞިލުނުކުރެވުމުން ކުރާ ކަމަކަށް ނުހަދާށެވެ! ކޮންމެ ކަމެއް ކުރަންވެސް ﷲ ތަޢާލާގެ ޙަޟްރަތުން ވާގިއެދުމަކީ އެންމެ ފުރަތަމަކުރާ ކަންތައް ކަމުގައި ހަދާށެވެ!
ވީމާ ކޮންމެ ކަމަކަށް ބޭނުންވި ނަމަވެސް އެހީތެރިކަމަށް އެދޭނެ ފަރާތްތަކުގެ ލިސްޓުގެ އެންމެ ކުރީގައި އަބަދުވެސް ބައިންދަންވާނީ ﷲ ތަޢާލާއެވެ. އެކަމަށް ﷲ ތަޢާލާ ލޯބިވެވޮޑިގެންވެއެވެ. ﷲ ތަޢާލާ ކަންބޮޑުވެވޮޑިގަންނަވަނީ މީސްތަކުން ކަންކަމުގައި އެދޭމިންވަރު ގިނަވެގެނެއް ނޫނެވެ. ނުއެދޭތީއެވެ. އެކަން ޙަދީޘްފުޅުން އެނގެން އެބައޮތެވެ.
ބައެއް މީހުންނަށް ވިސްނެނީ ކުރަންއުޅޭ މިވެނި ކަމަކީ ވަރަށް ކުޑަކުޑަކަމަކަށްވުމުން އަމިއްލައަށް ކޮށްލެވިދާނެކަމަށެވެ. އެއީ ރަނގަޅުވިސްނުމެއް ނޫނެވެ. ކިތަންމެ ކުޑަކަމެއް ކުރަން ބޭނުންވިނަމަވެސް ފުރަތަމަކަމަކަށް . بِسْمِ ٱللّٰهِ ٱلرَّحْمٰنِ ٱلرَّحِيمِ ކިޔައި ﷲ ތަޢާލާގެ ޙަޟްރަތުން ވާގިއެދޭށެވެ!
އަދި ކީއްހެއްޔެވެ؟ ކޮންމެ ކަމެއް ކުރަން ބޭނުންވިނަމަވެސް ﷲ ތަޢާލާގެ ޙަޟްރަތުން ވާގިއެދުމަކީ އެކަމެއް ޙާޞިލުކުރެވޭނެ ސަބަބެކެވެ! އިން ޝާ ﷲ
ކޮންމެ ކަމެއްގައިވެސް ﷲ ތަޢާލާގެ ޙަޟްރަތުން ވާގިއެދުމަކީ އެމީހާގެ ނިކަމެތިކަން އަނގައިދޭކަމެކެވެ. އަދި ﷲ ތަޢާލާއަށް އޮތް އިތުބާރާއި ލޯބިވެސް އަނގައިދޭކަމެކެވެ. ﷲ ތަޢާލާއަށް ވަކީލްކުރުމަކީ އެކަލާނގެ ލޯބިވެވޮޑިގަތުން އެމީހަކަށް އިތުރުވެގެންދާ ކަމެކެވެ.
- މުފްތީ މެންކުގެ ދަރުސަކުން
