"ބަލިމީހާގެ ނަން ކިޔައި ބަލިމީހާއަށް ޝިފާދެއްވުން އެދި ތިންފަހަރު ދުޢާކުރަންވެސް ސުންނަތުގައި ވާރިދުވެފައިވެެއެވެ.
ސަޢުދު ބިން އަބީ ވައްޤާޞް އާލާސްކަންފުޅާ އުޅުއްވަނިކޮށް ނަބިއްޔާ ޞައްލަ الله ޢަލައިހި ވަސައްލަމަ ސަޢުދު ބިން އަބީ ވައްޤާޞް އަށް ޒިޔާރަތްކުރައްވާ ދުޢާކުރެއްވި ސީޣާ ޞަޙީޙުލް ބުޚާރީ އަދި ޞަޙީޙު މުސްލިމްގައި ވާރިދުވެފައިވެއެވެ.
(اللَّهُمَّ اِشْفِ سَعْدًا ) قَالَ ثلاثاً –
رواه البخاري (5659) ومسلم (1628) .
މާނައީ: "ޔާ الله. ސަޢުދަށް ޝިފާ ދެއްވާނދޭވެ" މިގޮތަށް ތިންފަހަރު ދުޢާކުރެއްވިއެވެ."
- ޝައިޚް މުޙައްމަދު ޝާފިޢު
ބަލިމީހަކަށް ޒިޔާރަތްކޮށްފިނަމަ އެންމެ މުހިންމު ކަމަކީ އޭނާއަށްޓަކައި ހެޔޮދުޢާކުރުމެވެ. މިޙަދީޘްފުޅުން އެނގިގެންދަނީ ބަލިމީހަކަށް ޒިޔާރަތްކޮށް ބަލިމީހާގެ ނަންގަނެ އޭނާއަށް ޝިފާ ދެއްވެވުން އެދި ދުޢާކުރެވިދާނެ ކަމެވެ.
ހަނދާނުގައި ބަހައްޓަންވީ اللَّهُمَّ اِشْفِ އެވެ. ފަހަތަށް ގެންނަންވީ ބަލިމީހާގެ ނަމެވެ.
