މިއަދު މީސްތަކުންގެ ކުރިމަތީގައި ޙަރާމްކަންކަން ކުރެވެމުންދާއިރު މިތިބެނީ އެއީ ތިމާ އާއި ނުބެހޭ ކަމެއްހަދައި އަޅައިވެސްނުލައެވެ. ނަމަވެސް ދުލުން ބުނަނީ ތިމަން ﷲ ތަޢާލާއަށް ބިރުވެތިވާ ކަމަށެވެ.
މީސްތަކުންނޭވެ! ތިބާ ﷲ ތަޢާލާއަށް ބިރުވެތިވާއިރު، ތިބާގެ ކުރިމަތީގައި މީހުންކުރާ ޙަރާމް ކަންކަން ހުއްޓުވަން ތިބާ މަސައްކަތްނުކުރިނަމަ ﷲ ތަޢާލާ ތިބާ އާއި ސުވާލުކުރައްވަވާނެތެވެ. ދޭނީ ކޮން ޖަވާބެއްހެއްޔެވެ؟ އެދުވަހަކުން ދޮގެއް ނުހެދޭނެއެވެ. ޖަވާބުދޭންޖެހޭނީ ތެދަށެވެ. ބުނެވޭނީ މިވެނި މީހަކަށް ބިރުން ނުވަތަ އެފަދަ މިވެނި ސަބަބެއް އޮތުމުން ކަމަށެވެ.
ގިނަ ބައަކު ޙައްްޤުބަސްބުނަން ޖެހިލުންވަނީ އެމީހުންނަށް ދުނިޔޭގައި ލިބިދާނެ ނިކަމެތިކަމަކަށް ބަލައިގެންނެވެ. ވަޒީފާއަށް ބިރުންނެވެ. ޢާއިލާގެ ކޮންމެވެސް މީހަކު ރުޅިއަތުވެދާނެ ކަމުގެ ބިރަށެވެ. ނުވަތަ މިނޫންވެސް ދުނިޔަވީ ސަބަބެއް އޮވެގެންނެވެ. ދުނިޔަވީ ގޮތުން އެމީހަކަށް ގެއްލިދާނެ މަންފާއަކަށް ދަހިވެތިވެގެންނެވެ.
ވިސްނައިލަންވީ ޙައްޤު ބަސްބުނެ މުންކަރާތްތައް ހުއްޓުވަން އެމީހަކަށް ކުރެވެން އޮތް ވަރަކަށް މަސައްކަތް ނުކުރާ މީހާ ޤިޔާމަތް ދުވަހު ކުރަންޖެހޭނެ ހިތާމަ މާބޮޑުވާނެ ކަމެވެ. ﷲ ތަޢާލާގެ ޙަޟްރަތުގައި ޖަވާބުދާރީ ނުވެ ސަލާމަތް ނުވެވޭނެ ކަމެވެ. ނުބައި ޢަމަލެއް ކުރަނީ ތިމާގެ ކިތަންމެ ގާތް މީހަކު ނަމަވެސް ޙައްޤު ބަސްބުނަން ފަސްނުޖެހޭށެވެ.
އަދި ކީއްހެއްޔެވެ؟ ލޯބިވުމަކީވެސް އަދި އެމީހަކާއި ރުހިގެން ހުރުމަކީވެސް އެމީހަކަށް ހެޔޮއެދުމަކީވެސް އެމީހަކަށް ކުރެވޭ ކުށްތައް ދައްކައި އިޞްލާޙްކުރުވަން ަމސައްކަތްކުރުމެވެ. އެއީ ތިމާގެ ފިރިމީހާ ނުވަތަ އަނބިދަރިންކަމުގައިވީނަމަވެސްމެއެވެ!
- އިސްލާމީ ތިލަފަތުގެ ދަރުސަކުން
