ލޯބިވާ މީހަކުދެކެ ލޯބިވާކަން އެންގުމަކީ އެކަމުގެ ފައިދާކުރާނެ ކަމެކެވެ. ނަމަވެސް ބައެއް ފަހަރު އެކަމުގެ ޔަޤީންކަން މާބޮޑަށް ދެވިއްޖެނަމަ ހިތާމަކުރަންވެސް އެބަޖެހެއެވެ. މިސާލަކަށް ބައިވެރިޔާ ތިމާދެކެ މާބޮޑަށް ލޯބިވާކަމުގެ ޔަޤީންކަން ލިބުމުން ވަރަށް ބޮޑަ ފަރުވާކުޑަކުރެވޭތަންވެސް އެބައާދެއެވެ. އަދި އިހުމާލުވެވޭތަންވެސް އެބަ އާދެއެވެ. މިފަދަކަންކަމުގެ އިތުރުން އަނިޔާވެރިވެވޭތަންވެސް އެބައާދެއެވެ.
އެއީ ބައިވެރިޔާ ތިމާގެ ޝަކުވާ އެއްވެސް ފަރާތަކަށް ނުކުރާނެކަމުގެ ޔަޤީންކަން ލިބުމުންނެވެ. އެނެމެ ކުޑަމިނުން ދުޢާކޮށް ﷲ ތަޢާލާގެ ޙަޟްރަތުގައި ނުވެސް ދަންނަވާނެ ކަމުގެ ޔަޤީންކަން ލިބުމުންނެވެ. މީގެ އިތުރުން ހެދިހާ ގޮތްކަށް ބޯލަނބައި ކިޔަމަންތެރިވެގެން ނުވަތަ އަޅުވެތިވބެގެން އިންނަންޖެހޭނެ ކަމުގެ ޔަޤީންކަން ބޮޑުވުމުންވެސް މިދެންނެވިފަދައިން ކަންކަން ބޮޑުވެއެވެ.
އެއްގޮތަކަށްވެސް މިއީ ކުރަން ހެޔޮވާ ކަންކަމެއް ނޫނެވެ. ބައިވެރިޔާ ދުޢާ ނުކުރިނަމަވެސް އޭނާގެ ހިތުގައި އުފެދޭ ޝަކުވާތައް ﷲ ތަޢާލާގެ ޙަޟްރަތަށް ފޯރައެވެ. ހިތަށް އަރާފައިބާ ހުރިހާ ކަންކަން ﷲ ތަޢާލާ ދެނެވޮޑިގެންވެއެވެ. ވީމާ ބައިވެރިޔާދެކެވާލޯބިން ދެއަތް އުފުލައި ބަދުދުޢާ ނުކުރުމަކީ އަދި އެމީހަކަށް ލިބެމުންދާ އަނިޔާތަކުން ސަލާމަތްކުރައްވަވައި ދެއްވެވުން އެދި ދުޢާ ނުކުރުމަކީ އޭނާގެ ހިތުގައި އަޅަމުންދާ ވޭންތައް ﷲ ތަޢާލާގެ ޙަޟްރަތަށް ނުފޯރައި މަޑުޖެހޭޜ ސަބަބެއް ނޫނެވެ.
ފައިސާވެރިންނާ ބާރުގަދަ ސީޔާސީގޮތުން ނުފޫޒުހުރި ޢަދި ޢާންމުންގެ ތާއީދު ބޮޑު މީހުން އެދޭ ކަންކަމަށް އިޖާބަދިނުން އަވަސްކުރުމަކީ ދުނިޔޭގެ ސަރުކާރުތަކުން ކުރާ ކަންކަމެވެ. ﷲ ތަޢާލާގެ ޙަޟްރަތުގައި މުޅިން ތަފާތެވެ. ނިކަމެތިންގެ ކަންބޮޑުވުންތަކަށް ދެއްވަވާ ސަމާލުކަން މާބޮޑުތަނުން އިތުރުވެގެންދެއެވެ. އެކަމުގެ ކުޑަކުޑަމިސާލެއް ބުނެލާނަމެވެ.
މިހާދިސާއަށް ވިސްނައިލާށެވެ! ޅަފަތުންސުރެ ކައިވެނިކޮށްގެން އުޅުނު ފިރިމީހާ، އަނބިމީހާ މުސްކުޅިވި ދުވަހު ފިރިމީހާގެ މަންމައާއި އަނބިމީހާ އާއި އެއްފަދަ ކުރުމުން ރަސޫލް (ﷺ) އަށް އެކަމުގެ ޝަކުވާ ދެންނެވިއެވެ. ދެންނެވީ ގަނޑުވަރުކޮޅުގައި އިންނަވަނިކޮށެވެ. ގަނޑުވަރުކޮޅެ ބުނުމުން އެއީ މިޒަމާނުގެ ބޮޑު އެނދެއްގެ ބޮޑު މިނެވެ. އެތަނުގައި ޢައިޝަތުގެފާނު އިންނެވިއެވެ. ޢައިޝަތުގެފާނަށް އެ ޝަކުވާ އިވިވަޑައެއް ނުގަންނަވައެވެ. ނަމަވެސް ﷲ ތަޢާލާ ވަގުތުން އަޑު އައްސަވައި ވަގުތުން ކީރިތި ޤްރްއާނުގެ އާޔަތެއް ބާވައިލެއްވެވިއެވެ.
އެކަމުގެ ޙުކުމް ދީނުގައި އެއިރު އައިސްފައިނެތުމުން ރަސޫލް ﷺ ޙަދީޘްފުޅުކުރެއްވެވީ މަންމައާއި އަނބިމީހާ އާއި އެއްފަދަކުރުމުން ޢަމަލުކުރަންޖެހޭނެ ގޮތް (އެއްފަދަކުރުމަށްފަހު ވެސް ފިރިމީހާ ބޭނުންވުމުން އަނބިމީހާ އާއިއެކު ރޭކުރެވޭނެކަން ނުވަތަ ނޫންކަން) އެއިރު އެނގިވަޑައިގެންފައި ނުވާކަމަށެވެ. ޞަޙާބީ އަނqހެނާ ދުޢާކުރެއްވެވީ އެކަމުގެ ޙުކުމް ބާވައިލައްވަވައި ރަސޫލް ﷺ އަށް އަންގަވައިދެއްވެވުމަށެވެ.
އެކަމަނާގެ އަޑުއަޑު 7 އުޑުމަތިން އައްސަވައިވޮޑިގެން ވަގުތުން އަލްމުޖާދިލާ ސޫރަތުގެ 2ވަނަ އާޔަތާއި 3 ވަނަ އާޔަތް ބާވައިލެއްވެވިއެވެ. އެފަދަ ނުބައި ބަހެއް ބުނުމަކީ އަޅަކު މިނިވަންކުރަންޖެހޭވަރުގެ ފާފައެއް ކަމުގައި ވަޙީކުރެއްވެވިއެވެ.
މިފަދަ ކިތަންމެ ހާދިސާތަކެއް ސިޔަރަތުން ބަޔާންކުރެވިދާނެއެވެ. ޤުރްއާނުން ފެންނާނެއެވެ. ވީމާ އެއްވެސް މީހަކަށް އަނިޔާވެރިނުވާށެވެ! އަނިޔާލިބޭ މީހާގެ ހިތަށް ލިބޭ އަނިޔާތައްވެސް ﷲ ތަޢާލާ ދެކެދެނެވޮޑިގެންވެއެވެ. އެކަންކަން އަނިޔާކުރާ މީހާށ އާއި ކުރިމަތިލާނެދުވަސް އޮތީ ކުރިއަށެވެ!
- އިސްލާމީ ތިލަފަތުގެ ދަރުސަކުން
