ދުނިޔޭގެ ޙަޔާތަށްބަލާށެވެ! ކޮންމެ މީހަކުވެސް މަސައްކަތްކުރާނީ އެމީހާގެ ރަނގަޅުކަމުގެ ވާހަކަ ވީހައި ގިނަގިނައިން ރައީސުލްޖުމަހޫރުއްޔާ ނުވަތަ ރަސްގެފާނަށް ދެންނެވޭށެވެ. އޮފީހެއްގައިނަމަ ނުވަތަ ކޮންފުންޏެއްގައި ނަމަ ބަލާނީ އެމީހާ ކުރާ ހުރިހާ ރަނގަޅު ކަންކަމުގެ ވާހަކަތައް އޮފީހުގެ ވެރިމީހާ އާއި ހަމައަށް އުފުލުމަށެވެ. އެކަންކުރެވޭނެ ގޮތަކަށެވެ.
މިކަމުގައިވެސް ﷲ ތަޢާލާގެ ދީލަތިވަންތަކަން ނިކަންދެކިބަލާށެވެ! އެކަލާނގެ ކަންތައްތައް މިންވަރުކުރައްވަވާފައިމިވަނީ ކޮންމެ ދުވަހަކު މަދުވެގެން ދެފަހަރު އަދި ހަފްތާއަކު ދެފަހަރު އަދި އަހަރަކު އެއްފަހަރު ކޮންމެ މީހެއްގެ ޢަމަލުތައް އެކަލާނގެ ޙަޟްރަތަށް އުފުލިގެންދާނެ ގޮތަށެވެ. އެކަމަށް އެމީހަކު އެއްވެސް އިތުރުމަސައްކަތެއްވެސް ކުރާކަށް ނުޖެހެއެވެ. އެޕޮއިންޓްމަންޓް ހައްދާކަށްވެސް ނުޖެހެއެވެ.
ހަމައެކަނި ކުރަންޖެހޭ ކަމަކީ ﷲ ތައާލާގެ ޙަޟްރަތަށް އުފުލިގެނަދަނީ ހެޔޮ ޢަމަލުތައްކަން ޔަޤީންކުރުމެވެ.
މީސްތަކުންނޭވެ! ކޮންމެ ދުވަހެއްގެ ޢަޞްރުނަމާދާއި ފަތިސްނަމާދުގެ ވަގުތުގައި އެމީހާގެ ރިޕޯޓް އެބަ ﷲ ތަޢާލާގެ ޙަޟްރަތަށް އުފުލިގެންދެއެވެ. ނިކަންބުނެބަލާށެވެ! ފަތިސްނަމާދުނުކޮށް ނިދާފައި އޮންނަމީހާގެ ރިޕޯޓް ސާފުޠޯހިރުވެ އެންމެކުޑަމިނުން ފާސްވާނީވެސް ކިހިނަކުން ހެއްޔެވެ؟
ފާސްވާން ބޭނުންނަމަ ފަތިސް ނަމާދު ޖަމާޢަތުގައި ކުރަން އެބަޖެހެއެވެ.
ދެން މިއަންނަނީ ހޯމަ ބުރާސްފަތި ދެ ދުވަހެވެ. އެދެދުވަހު ޢަމަލުތައް ﷲ ތަޢާލާގެ ޙަޟްރަތަށް އުފުއްލަވާތީ، އެވަގުތު ރޯދައަށް ހުންނަވަން ބޭނުންފުޅުވެވަޑައިގަންނަވާތީ ރަސޫލް ﷺ އެދެދުވަހު ހުންނަވަނީ ސުންނަތް ރޯދައަށެވެ. އަަހރެމްނެ މިތިބެނީ ކޮން ގޮތަކަށް ހެއްޔެވެ؟
ޔަޤީންވާ ކަމަކީ ރަސޫލް ގެ ޢަމަލުފުޅުތަކުގެ ފަތުގައި އެއްވެސް ނުބައި ކަމެއް ނުހިމެނޭނެ ކަމާއި އަހަރެމެންގެ ތެރެއިން ކޮންމެ މީހެއްގެ ފަތުގައިވެސް ނުބައި ޢަމަލުތަކެއް ލިޔެވިފައިވާނެކަމެވެ. ލިޔެވިފައިވާނެ ވަރު އެނގޭނީ އެމީހަކަށެވެ. ފާފަކުރާ މީހަކަށެވެ.
ކޮންމެއަކަސް ޤަބޫލުކުރަންވީ ކޮންމެ ދުވަހަކު ﷲ ތައާލާގެ ޙަޟްރަތަށް އުފުލޭ 2 ދުވަހު ރިޕޯޓާ ހަފްތާއަކު ދެފަހަރު އުފުލޭ 2 ރިޕޯޓާއި އަހަރު ރިޕޯޓް ރަނގަޅުކުރެވިއްޖެނަމަ އެމީހަކަށްހުރީ އުފާވެރިކަންކަމެވެ. ރިޕޯޓްތައް ފޭލްވެ އެފް ރިޕޯޓް ހިފައިގެން ވަންނަން ޖެހޭނީ ނަރަކައަށް ކަމެވެ. ވީމާ ސަލާމަތްކަން ހޯދުން އޮތީ އެމީހަކަށެވެ.
- އިސްލާމީ ތިލަފަތުގެ ދަރުސަކުން
