"އަހަރެންނަކީ ސިހުރާއި އެސްފީނާގެ އުނދަގޫތައް ވަރަށް ގިނައިން ކުރިމަތިވާ އަންހެނަކީމެވެ. އަދި ބައެއް ފަހަރު ވަރަށް ބޮޑަށްވެސް އެކަމުގެ އަސަރުކުރެއެވެ. ކިރިޔާވެސް މިހެން މިއުޅެލެވެނީ ރުޤްުޔާ އަމިއްލައަށްކޮށް ކުރެވޭ މަސައްކަތްތަކުންނެވެ. ކިތަންމެ ގިނަވަގުތު ހޭދަކުރަންޖެހުނު ނަމަވެސް ކޮންމެ ދުވަހަކުހެން ބަޤަރާސޫރަތްވެސް ކިޔަވާތީއެވެ.
އަޅުގަނޑުގެ ސުވާލަކީ ޢާންމުދިރިއުޅުމުގައި ސިހުރާއި އެސްފީނާއިން ސަލާމަތްވެހުރުމަށް އެންމެ ފަސޭހައިން ކުރެވިދާނެ ކަމަކީ ކޮބައިހެއްޔެވެ؟"
މިއީ ހަމަ އަންހެނުންވެސް އަދި ފިރިހެނުންވެސް ވަރަށް ގިނައިން ކުރާ ސުވާލެކެވެ. ސަބަބަކަށް އެވަނީ ރުޤްޔާކުރާނަމަ އެކަމަށް ހޭދަކުރަންޖެހޭ ވަގުތު ގިނަކަމެވެ. ރެޑީ މޭޑް ބޭސްގުޅަ ފާމަސީން ގަނެލާ އުޞޫލުން ގަނެގެން ރުޤްޔާކޮށްގެން އެކަމުގެ ޙަޤީޤީ ފައިދާ ގިނަފަހަރު އޮންނަނީ ނުކޮށްފައެވެ.
ތިއަ ހާލަތަށްބަލާއިރު ބުނެވެން އޮތީ ފުރަތަމަ ކަމަކަށް މަސައްކަތްކުރަންވީ ވީހައި ގިނައިރު ވުޟޫމަތީގައި ދެމިހުރުމަށް ކަމަށެވެ.
ވީހައި ގިނައިރު ވުޟޫމަތީގައި ހުރުމަކީ އެކަމަށް މަސައްކަތްކޮށްފި މީހަކަށް އެހައި ބުރަކަމެއް ނޫނެވެ. މުހިންމީ އެމީހަކަށް ވެވުނުވަރަކުން ވީހައި ގިނައިރު ވުޟޫމަތީގައި ދެމިހުރުމެވެ. ވުޟޫމަތީގައި ގިނަވަގުތު ހޭދަކުރުމަކީ އެސްފީނާ އާއި ސިހުރު ޖެހުމުން ދުރުކޮށްދޭ ކަމެއްކަން ގިނަބައަކު ވަނީ ތަޖުރިބާކޮށްފައެވެ.
ހަމައެއާއެކު ފިތިސްނަމާދަށްފަހުގަ އާއި ޢަޞްރުނަމާދަށްފަހުގައި އާޔަތުލްކުރުސި، އިޚްލާޞް، ފަލަޤް ނާސް 3 ސޫރަތްނ ކިޔަވާށެވެ. ބޮޑަށް ރަނގަޅީ 3 ފަހަރު ކިޔެވުމެވެ. ﷲ ތައާލާގެ ވާގިފުޅާއިއެކު ސަލާމަތްކަން ލިބޭނެއެވެ.
- އިސްލާމީ ތިލަފަތުގެ ދަރުސަކުން
