ކޮންމެ އެއްޗެއްގެވެސް އަގުއަރާ ދުވަސްވަރެއް އޮންނާނެއެވެ. އެގޮތުން ވަކިލާރިއަށް ބަލައިފިނަމަ ފަޤީރުންނަށް ވަކިލާރީގެ އަގު އަބަދުވެސް އޮންނަނީ އަރައިފައެވެ. އެނޫން މީހުން ގެތަކުގައި ޑަބިޔާތަކުގައިވެސް ވަކިލާރި އެއްކޮށްފައި ބަހައްޓައެވެ. އެއީ އެއްވެސް މުހިންމު އެއްޗަކަށް ނުވާތީއެވެ.
މިރޭގެ ބަސްކޮޅު އަމާޒުމިކުރަނީ ވަކިލާރީގެ މުހިންމުކަން ބޮޑު މީހުންނަށެވެ. ވަކިލާރިކޮޅަށްވެސް ބޭނުންވެގެން ފޮރުވައިގެން ގެންގުޅޭ މީހުންނަށެވެ. މިއަދު ރަޖަބް މަހުން 6 އެވެ. ރަމަޟާން މަހާއި އަރައިހަމަވާން ދާދި ގާތްވަނީއެވެ.
ރަމަޟާން މަހަށްޓަކައި އެންމެ ބޮޑަށް ތައްޔާރުވާންޖެހޭނީ ފަޤީރުންނަށެވެ. އެއީ ޞަދަޤާތެއްކޮށްލާނެ ވަކިރުފިޔާއެއް ބައިރުފިޔާއެއްވެސް ލިބޭނީ ކުރިންސުރެ ފޮރުވާފައި ބޭއްވިއްޔާއެވެ. ވީމާ މިހާރުވެސް ވަކިލާރީގެ ބޭނުން ކިތަންމެ ބޮޑުނަމަވެސް ކޮންމެވެސް މިންވަރެއް ރަމަޟާންމަހަށް ރައްކާކުރެވޭތޯ ބަލާށެވެ. އެންމެކުޑަމިނުން ހިފާ ކޮންމެ ރޯދައަކަށް ދެމަފިރިންކުރެ މީހަކަށް އެންމެ ރުފިޔާއެއް ނަމަވެސް ޞަދަޤާތްކޮށްލެވޭނެވަރުވޭތޯ ބަލާށެވެ!
މުއްސަނދިން ބޭނުންވެއްޖެނަމަ ކޮންމެ ދުވަހަކު ކިތަންމެ ބައިވަރެއްވެސް ޚަރަދުކުރެވިދާނެއެވެ. ނަމަވެސް ފައިސާ އަތުގައި ނެތް ފަޤީރުންނަށް އެންމެ ރުފިޔާއެއްވެސް ޞަދަޤާތްކުރުމަކީ ކުރަން އެހައި ފަސޭހަކަމަކަށްނުވާނެއެވެ. އެކަމަށްޓަކައި ޖެހޭނީ ކުރިއާލައި ފައިސާ ޖަމާކުރާށެވެ! ވީމާ މިދިން ނަޞޭޙަތްކޮޅުގައި ހިފައި ފައިދާ ޙާޞިލުކުރާނެ ކަމަށެ އުންމީދުކުރަމެވެ!
- އިސްލާމީ ތިލަފަތުގެ ދަރުސަކުން
