ރަމަޟާން މަސް ގާތްވަނީއެވެ! ގިނަ އަދަދެއްގެ ފިރިހެނުން ރޭގަނޑުގެ އަޅުަކަމަށް މިސްކިތަށް ޖަމާވާނެއެވެ! (އިން ޝާ ﷲ) އަންހެނަކު މިސްކިތަށްދާން ބޭނުންވެއްޖެހިނދެއްގައި އެކަން މަނާކުރުމެއް ނެތެވެ. އެހެނީ ޙަދީޘްފުޅުގައި އޮތީ މިސްކިތަށް ދާން ބޭނުންވާ އަންހެނުން ނުހުއްތުވުމަށެވެ.
ބައެއް ފިރިން އެމީހުންގެ އަނބިން މިސްކިތަށް ދިއަނުދިއުމަށްޓަކައި ނުވަތަ އެކަމަށް ހުރަސްއަޅަންވެގެން އެވަގުތާއި ދިމާވާގޮތަށް ތަފާތު މަސައްކަތްތައް ޖައްސުވައެވެ. އެފަދަ ފިރިންނަށް ބުނަން އޮތީ އަނބިންލައްވަވައި ކަންކަން ކުރުވުމުގެ ޙައްޤު ތިބާއަށް ލިބިފައިވީނަމަވެސް އެއިޚްތިޔާރު ނުވަތަ ބާރުގެ ބޭނުން ނަހަމަގޮތުގައި ނުހިފާށެވެ!
ތިބާ ސިއްރުކޮށްހުރި ނިޔަތް އަނބިމީހާއަށް ނުވަތަ އެހެން މީހަކަށް ނުއެނގުނު ނަމަވެސް ﷲ ތަޢާލާ ދެކެދެނެވޮޑިގެންވެއެވެ. އެކަމެއް ނުކުރަން ރަސޫލް ޙަދީޘްފުޅުކުރެއްވެވުމުން އޮތީ ޙަދީޘްފުޅަށް ޢަމަލުކުރުމެވެ. ތިމާ ބޭނުންވާ ގޮތް ކުރިއަށް ނެރުމެއް ނެތެވެ.
އަންހެނަކު ބުނެފައިވެއެވެ. "އަހަރެން ތަރާވީޙް ނަމާދަށް ދާން އުޅޭއިރަށް ފިރިމީހާ ކޮންމެވެސް ކަންތައްތަކެއް ކުރަން ޖައްސުވާނެއެވެ. ކޮންމެވެސް އެއްޗެއް ކައްކުވަންވެސް ޖައްސުވައިފާނެއެވެ. އެފަދަ ގިނަ ރޭރޭ އަހަރެންނަށް ތަރާވީހް ނަމާދަށް މިސްކިތަކަށް ނުދެވެއެވެ. އަހަރެން ގޮވައިގެން ފިރިމީހާ ގޭގައި ނަމާދެއްވެސް ނުކުރެއެވެ. ޖެހެނީ ވަރަށް އުނދަގުލުން އެކަނި ގޭގައި ކުރާށެވެ!"
މިފަދަ ގޮތްގޮތަށް ކަންކަން ނުކުރާށެވެ! އަނބިމީހާއަށްވެސް ވީހައި ގިނަ އަޅުކަންކުރުމުގެ ފުރުޞަތުދޭށެވެ! ތަރާވީހް ނަމާދަށް ނުވަތަ ދަމުނަމާދަށް ނުފޮނުވާނަމަ އަނބިމީހާ ގޮވައިގެން ގޭގައި ނަމާދުކުރަންވާނެއެވެ!
- އިސްލާމީ ތިލަފަތުގެ ދަރުސަކުން
