ރަޖަބް މަހުގެ ޙުރުމަތަށްޓަކައި 3 ކަމެއް ކުރަން ޖެހޭނެއެވެ. އެއިގެ ތެރެއިން ފުރަތަމަ ކަމަކީ ރަޖަބް މަހަކީ ﷲ ތަޢާލާ ޙުރުމަތްތެރި ކުރައްވަވާފައިވާ މައްސަރެއްކަމަށް ކީރިތި ޤުރްއާނުގައި އޮތުމުން އެކަން ހިތުގެ އަޑިން އެކަން ޤަބޫލުކުރުމެވެ.
ދެވަނަ ކަމަކީ ޙުރުމަތްތެރިވެގެންވާ މައްސަރަކަށްވުމުން އެއްވެސް ފާފައެއް ނުކުރަން މަސައްކަތްކުރުމެވެ. މިބުނަނީ އެއްވެސް މަހެއްގައި ފާފަކުރާކަށް ނޫނެވެ. އެއްވެސް މަހެއްގެ އެއްވެސް ދުވަހަކު ފާފަކުރުމެއް ނެތެވެ. އެހެންކަމާއިއެކުވެސް ވަކިމަސްތަކަކީ ޙުރުމަތްތެރި ކުރެއްވެވި މަސްތަކެއް ކަމުގައި ލައްވަވާފައި އެވަނީ އެ މަސްތަކުގެ މުހިންމުކަން ބޮޑުކަމުންނެވެ. ވީމާ ޙުރުމަތްތެރިވެގެންވާ މައްސަރަކާއި ބައްދަލުވެއްޖެނަމަ ތިމާގެ އަމަލުތައް އިތުރަށް އިޞްލާޙްކުރަން ގަދައަޅައި މަސައްކަތްކުރަންވާނެއެވެ.
މިހާރުން ފެށިގެން ފާފައެއް ނުކުރަން ހިތްވަރުކުރާށެވެ! އެއިރުން ރަމަޟާން މަސް އައިސް ބައްދަލުކުރާއިއރު ތިބާއަށް ހުންނާނީ ހެޔޮ ބަދަލުތަކެއް އައިސްފައެވެ. އަދި އެކަމުގެ ސަބަބުން ތިބާއަކީ ރަމަޟާން މަހަށްފަހުގައިވެސް އެއްވެސް ފާފައެއް ނުކުރާނެ މީހަކު ކަމުގައި ވުމުގެ ހިތްވަރު ލިބުމަށްއެދޭށެވެ! އެކަމަށް ޢަޒުމް ކަނޑައަޅައި މަސައްކަތްކުރާށެވެ! އެކަމަށް އެދި ދުޢާކުރަމުން ގެންދާށެވެ!
ޝައިޠޯނާ ވަސްވާސްދިންނަނަމަވެސް ހިތަށް ގެންނާށެވެ! ރަމަޟާން މަސް ދާދި ކައިރިވެއްޖެއެވެ. ފާފައެއް ނުކުރާނަމެވެ. އެގޮތުގައި ސާބިތުވެވިއްޖެ މީހަކަށް ހިތްވަރު ދެއްވަވާނެތެވެ. އިން ޝާ ﷲ
ހަމަ އެއާއިއެކު އެއްވެސް މީހެއްގެ ހިތުގައި ޖެހޭނެ އެއްވެސް ކަމެއް ނުކުރާށެވެ! އެއްވެސް މީހަކަށް އަނިޔާވެރިނުވާށެވެ!
3 ވަނަކަމަކަށް ބުނަން އޮތީ ރަޖަބްމަހުގައި ކުރާނެ ވަކި ޚާއްޞަ އެއްވެސް އަޅުކަމެއް ސުންނަތުން އެނގެން ނެތްއިރު ރަޖަބްމަސްވެގެން ވަކި ޚާއްޞަ އެއްވެސް އަޅުކަމެއް ނުކުރާށެވެ. ނަމަވެސް ކުރަންވީ ކަމެއް އެބައޮތެވެ! ރަމަޟާން މަހު ވީހައި ގިނަ އަޅުކަން ކުރަން ތައްޔާރުވުމުގެ ގޮތުން މިހާރުންސުރެ ވީހައި ގިނައިން އަޅުކަންކުރަމުން ގެންދާށެވެ!
ކީރިތި ޤުރްއާން ކިޔެވުން ގިނަކުރާށެވެ! ސުންނަތް ނަމާދުތައްކުރާށެވެ. ރޭއަޅުކަންވެސް ކުރާށެވެ! ހަމައެއާއިއެކު ހިތް ޠޯހިރުކުރަން މަސައްކަތްކުރާށެވެ! ހިތުން ޝައިޠޯނާ ނެރެލަން ގަދައަޅައި މަސައްކަތްކުރާށެވެ! އެކަމުގެ ފައިދާ ފެންނާނެއެވެ! އިން ޝާ ﷲ
- ޝައިޚް އަބޫބަކުރު ޒައުދުގެ ދަރުސަކުން
