މަރުވެފައިވާ ހެޔޮލަފާ މީހުން ހުވަފެނުގައި ފެނުމަކީ ޢާންމުކަމެކެވެ. ވީމާ އެއީ ކަންބޮޑުވާންޖެހޭ ކަމެއް ނޫނެވެ. އެގޮތަށް ފެންނަ ސަބަބާއިމެދު ޢިލްމްވެރިން އެކިގޮތަށް ދެކެވަޑައިގަންނަވައެވެ. އެތަނުން އަހަރެން ޤަބޫލުކުރާ ގޮތްވެސް ބުނެފާނަމެވެ.
މީހާ ނިދުމުން އޭނާގެ ފުރާނަ ހަށިގަނޑުން ނުކުމެގެންދެއެވެ. ދަނީ ކޮންތަނަކަށްކަން އެނގޭނެ ގޮތެއް ނެތެވެ. އަހަރެން ޤަބޫލުކުރާ ގޮތުގައި އެގޮތަށް ފުރާނަ ހަށިގަނޑުން ނުކުމެގެން ގޮސް އުޅުމުގެ ތެރޭގައި މަރުވެފައިވާ މތް މީހުންގެ ފުރާނައާއި ބައްދަލުވަނީ އަދި ބައްދަލުވުމުން ކޮންމެވެސް ވާހަކައެއް ބުނަނީއެވެ.
އެގޮތުން ބުނާ ވާހަކަތަކުގެތެރޭގައި މަރުވެފައިވާ މީހާ އެންމެ ބޮޑަށް ކަންބޮޑުވާ ކަމެއްގެ ވާހަކަވެސް ބުނެފާނެއެވެ. އަދި ނަބޭޙަތެއްވެސް ދީފާނެއެވެ.
އެގޮތުން އެއްކަމެއް ފާހަގަކޮށްލާނަމެވެ. ޙައްޖަށް ދިއަ މީހަކު ޙައްޖުގައި މަރުވިއެވެ. އެއަށްފަހު އޭނާގެ ތިބި ހުރިހާ ދަރިންނަށް އެއްރޭ ހުވަފެނެއް ފެނުނެވެ. އެހުވަފެނުގައި ހުރިހާ ދަރިންގެ ކިބައިންވެސް އެދުނީ އެންމެ ކަމަކަށެވެ. އެއީ މިވެނި މީހެއްގެ ގާތަށް ގޮސް ބައްޕަގެފަރާތުން މާފަށް އެދުމަށެވެ. ހުރިހާ ދަރިންވެސް އެކަންކުރިއެވެ.
ހަމައެއާއިއެކު ދަރަނިވެރިއަކު އޭނާގެ ދަރަނި އަދާކޮށްދިނުމަށްވެސް އެދިފާނެއެވެ. އެދިއްޖެނަމަ އެއީ ޝައްކު ބަހެއް ނޫންކަން ޔަޤީންކުރުމަށްފަހު އެދަރަނި އދާކޮށްދޭށެވެ. އޭނ އެގޮތަށް އެއެދުނީ އެދަރަނީގެ ސަބަބުން އޭނނާއަށް ލިބެންޖެހޭ ޙައްޤުތަކެއް ހިފެހެއްޓިފައިވާތީކަމަށް ވެދާނއެވެ.
މިކަން މިހެން މެދުވެރިވެދާނެކަން ޔަޤީންކުރެވެނީ ޢުޘްމާނެގެފާނަށް ފެނިވަޑައިގެންނެވި ހުވަފެންފުޅުންނެވެ.
އެހުވަފެންފުޅުގައި ރަސޫލް ﷺ އާއި އަބޫބަކުރުގެފާނާއި ޢުމަރުގެފާނު ފެނިވަޑައިގެންނެވިއެވެ. އަދި ރަސޫލް ޢުޘްމާންގެފާނަށް ހިތްވަރުފުޅު ދެއްވަވައި ޙަދިޘްކުރެއްވެވިއެވެ. "މިއަދު ކަލޭގެފާނު ރޯދަވީއްލަވާނީ އަހަރެމެންނާއިއެކުގައެވެ." މާނައަކީ ރަސޫލް އާއި އަބޫބަކުރުގެފާނާއި ޢުމަރުގެފާނާއިއެކުގައެވެ.
ހުވަފެންފުޅު ފެނިވަޑައިގަތުމުން އުފާފުޅުކުރައްވަވައި އެދުވަހުގެ ކޮންމެވަގުތަކުވެސް އަވަހާރަފުޅު ވެދާނެކަމަށް ބައްލައގެން އެކަމަށް ތައްޔާރުވެވަޑައިގެންނެވިއެއެވެ. އަދި ކަންތައްވީވެސް ހަމައެފަދައިންނެވެ. ޢުޘްމާންގެފާނު އަވަހާރަވީ ހަމައެދުވަހުއެވެ. ރޯދައަށް ހުންނަނިކޮށެވެ.
- ބިލާލް އައްސަދުގެ ދަރުސަކުން
ހަމައެއާއިއެކު ތިމާއަށް މައިންބަފައިން ނުވަތަ އެނޫންވެސް މީހަކު ހުވަފެނުގައި ނުފެނުމުން އެއީ ތިބާގެ ކިބައިގައި ތަޤްވާވެރިކަން ނެތުމުން ކަމަށް ނުދެކޭށެވެ! ހުރިހާ ޞަޙާބީންނަކަށް ހުވަފެންފުޅުގައި ރަސޫލް ﷺ ފެނިވަދައެއް ނުގަންނަވައެވެ.
