އިސްލާމް ދީނުން އުނިކަންކަން ދައްކަން މަސައްކަތްކުރާ އެއްވެސް މީހަކަށް އެކަން ކާމިޔާބުކުރެވިފައެއް ނުވެއެވެ. އަދި އެއްވެސް ޖަމާޢަތަކަށްވެސް މެއެވެ. އެކަމުންވެސް އެނގިގެންދަނީ އިސްލާމް ދީނުގެ މަތިވެރިކަމެވެ.
އިސްލާމް ދީނުން އެއްވެސް ކުށެއް ނުދެއްކެނީ އެދީން ބާވައިލެއްވެވީ ހުރިހާ ކަންކަން އެންމެ މޮޅަށް ދެނެވޮޑިގެންވާ ﷲ ތަޢާލާ ކަމަށްވުމުންނެވެ. އެކަމުގެ އެންމެ ފައުޅުކަންބޮޑު ދަލީލަކީ އުނި އެއްވެސް ކަމެއް ކީރިތި ޤުރްއާނުން ނުދެއްކޭއިރު ރަސޫލް ﷺ ގެ އެއްވެސް ޙަދީޘްފުޅަކުން ވެސް އުނި އެއްވެސް ކަމެއް މިއަދާއި ހަމައަށްވެސް ދެއްކިފައި ނެތުމެވެ.
މިސާލަކަށް އިސްލާމް ދީނުގެ ޙުކުމްތަކަކީ މީގެ 1400 އަހަރުކުރިން ބާވައިލެއްވެވުނު ދީނެއްކަމަށް ބުނެ ބަސްބުނާ އެއްވެސް މީހަކަށް އެދިނުގައި ނަހީކުރައްވަވާފައިވާ އެއްވެސް ކަމެއް ކުރުމުން އެއްވެސް މީހަކަށް ލިބޭނެ އެއްވެސް ޙަޤީޤީ ފައިދާއެއް ދެއްކިފައި ނެތްކަމެވެ. އެކަންކަން ކުރުމުން ލިބެނީ ގެއްލުން ނޫންކަން ވެސް ހާމަކޮށްދެވިފައެއް ނުވެއެވެ.
މިސާލަކަށް ފާހިޝް ޢަމަލުކުރުން ހުއްދަކުރާ މީހުންނަށް، އެކަން ކުރުމުން އިންސާނާއަށް އަދި އަދި ޢާންމުކޮށް މުޅި އިންސާނިއްޔަތަށް ގެއްލުން ނުލިބޭކަން ނުވަތަ ކުރަނީ ޙަޤީޤީ ފައިދާކަން ހާމަކޮށްދެވިފައެއް ނުވެއެވެ. ނަމަވެސް ލިބެނީ ގެއްލުންކަން ހޯދުންތަކުން ދަނީ ސާބިތުވަމުންނެވެ. އަޚްލާޤީ މައްސަލަތައް ކުރިމަތިވެ ބަލިމަޑުކަން ފެތުރޭކަން އެއީ ހާމައަށް ފެންނަން އޮތް ޙަޤީޤަތެކެވެ.
އެހެންކަމުން އިސްލާމް ދީނުން އުނި ކަންކަން ދައްކަން މަސައްކަތްކުރާ މީހަކަށްވުރެ ބޮޑު ޖާހިލަކު ނުވެއެވެ. އެއީ ކީރިތި ޤްރްއާނުން ވަރަށް ފުރިހަމައަށް ސާބިތުވާން އޮތް ކަމެކެވެ. އެހެންކަމުން އިސްލާމް ދީނުގެ ޙުކުމްތަކަށް ކުޑައިމިސް ބަސްތައް ބުނެ އިސްލާމް ދީނުން އުނިކަން ދައްކަން ވަކާލާތުކުރާ މީހުންނަށް ތާއީދުކޮށް، އެފަދަ މީހުންގެ ބަސްތައް ޤަބޫލުކޮށް އަދި އެފަދަ މީހުންގެ ފަހަތުގައި ތިބުމަށްވުރެ ބޮޑު ޖާހިލުކަމަކީ ކޮބައިހެއްޔެވެ؟
ޢިލްމްވެރިއަކު ވިދާޅުވެފައިވެއެވެ. "އިސްލާމް ދީނަކީ އެންމެ ފުރިހަމަ ދީނެވެ! މިދީނުގެ އަސާސްތައް، ޙުކުމްތައް އައިސްފައިވަނީ 7 އުޑު މަތިންނެވެ! ޙިކުމަތްވަންތަ ﷲ ތަޢާލާގެ ޙަޟްރަތުންނެވެ! ކަން އޮތީ މިހެން ކަމަށްވީއިރު، މި ފުރިހަމަ ޙުކުމްތަކަށް، ކުޑައިމީސް ބަހެއް ބުނުމުގެ ޖާގަ، އުނިކަން ހުރި އިންސާނުންނަށް ލިބޭނީ ކިހިނަކުންތޯއެވެ؟"—
ﷲ ތަޢާލާ މީސްތަކުން އުފައްދަވާފައިވަނީ މަށިންނެވެ. ކައިބޮއި ނިދައި ފާޚާނާކުރަން ޖެހޭ ބައެއްގެ ގޮތުގައެވެ. މަލާއިކަތުން އުފައްދަވާފައިވަނީ ނޫރުންނެވެ. އިންސާނުންނަށް ބޭނުންވާ އެއްވެސް ކަމަކށް ބޭނުންފުޅު ނުވާ ގޮތަށެވެ. އިންސާނުން ލައްވަވާފައި މިވަނީ ބިންމަތީގައެވެ. މަލާއިކަތުން ލައްވަވާފައިވަނީ އުޑުގައެވެ. ﷲ ތަޢާލާގެ ޙަޟްރަތުގައެވެ.
އެހެންކަމާއިއެކުވެސް މަލާއިކަތް ބޭކަލުންނަށްވެސް އެނގިވަޑައިގަންނަވަނީ ﷲ ތަޢާލާ އުނގަންނަވައި ދެއްވެވި މިންވަރެކެވެ. އިތުރު އެއްވެސް ކަމެއް އެނގިވަޑައެއް ނުގަންނަވައެވެ. އެހެންކަމަށްވާއިރު ﷲ ތަޢާލާ ބާވައިލެއްވެވި އިސްލާމް ދީނުން އުނި ސިފަ ދެއްކުމަކީ ކޮން އިންސާނަކަށް ކުރެވޭނެ ކަމެއް ހެއްޔެވެ؟ އެކަން ކުރަން އުޅެފިނަމަ މުރުތައްދުވުން ނޫން ކަމެއް ނުވާނެއެވެ! އެކަމުގެ ހެކި އަންނަނިވި 4 އާޔަތުން ލިބިގެންދާނެއެވެ.
"ހަމަކަށަވަރުން ކަލޭގެފަނުގެ ވެރި ރަސްކަލާނގެ ބިމުގައި ޚަލީފާއަކު (އާދަމްގެފާނު) ލައްވަވާހުށީމޭ މަލާއިކަތުންނަށް ވަޙީ ކުރެއްވެވި ހިނދު، ހަނދުމަކުރައްވާށެވެ. އެބޭކަލުން (އެހިނދު) ދެންނެވޫއެވެ. އަޅަމެން އިނބރަސްކަލާނގެއަށް ޙަމްދާއިއެކު ތަސްބީޙަކިޔައި، އިނބަރސްކަލާނގެއަށް ޓަޤްދީސް ކޮށްކޮށް ތިއްބައި، އެ ބިމުގައި ފަސާދަ އުފައްދައި ލޭ އޮހޮރުވާނޭ ބައަކު އިނބަރަސްކަލާނގެ އެ ބިމުގައި ލައްވަވަނީތޯއެވެ؟ އެކަލާނގެ ވަޙީ ކުރެއްވެވިއެވެ. ހަމަކަށަވަރުން، ތިއަބައިމީހުންނަށް (މަލާއިކަތުންނަށް) އެނގިގެން ނުވާ ކަންތަތއްތައް ތިމަންރަސްކަލާނގެ ދެނެވޮޑިގެންވަމެވެ." (ބަޤަރާ ސުރަތުގެ 30)
އަދި އެވަރުން ދޫކޮށް ލެއްވެވީއެއްވެސް ނޫނެވެ. މަލާއިކަތުންނަށް އެކަން ސާބިތުވެސް ކޮށްދެއްވެވީއެވެ.
"އަދި އާދަމްގެފާނަށް ހުރިހާ ތަކެތީގެ ނަންތައް އެކަލާނގެ އުނގަންނަވައި ދެއްވެވިއެވެ. (އެބަހީ: ނަން ކިޔުނު ތަކެއްޗާއި އެތަކެތީގެ ޙަޤީޤަތްތަކެވެ.) ދެން އެކަލާނގެ މަލާއިކަތުންނަސް ހުށަހަޅުއްވަވައި، ވަޙީ ކުރެއްވެވިއެވެ. ތިއަބައިމީހުން ތިއަކުރާ ދައްވާގައި (ތެދުވެރިކަމެއް ވަނީނަމަ، މިތަކެތީގެ ނަންތަކުން، ތިއަބައިމީހުން ތިމަން ރަސްކަލާނގެއަށް، ނިކަން އަންގައިދީބަލާށެވެ! () އެ މަލާއިކަތުން ދެންނެވޫއެވެ. އިނބަރަސްކަލާނގެ ހުސްޠީހިރުވަންތަކަމާއިއެވެ! އިނބަ ރަސްކަލާނގެ އަޅަމެންނަށް އުނގަންނަވައި ދެއްވެވި އެއްޗެއް މެނުވީ، އަޅަމެންނަކަށް ނުއެނގޭނެއެވެ. ހަމަކަށަވަރުން، އިނބަ ރަސްކަލާނގެއީ މޮޅަށް ދެނެވޮޑިގެންވާ ޙަކީމްވަންތަ ރަސްކަލާނގެއެވެ." (ބަޤަރާ ސޫރަތުގެ 31،32)
ދެން ކަންތައް ވެގެންދިއަ ގޮތަށްވެސް ވިސްނާށެވެ.
"އެކަލާނގެ ވަޙީ ކުރެއްވެވިއެވެ. އޭ އާދަމްގެފާނެވެ! ކަލޭގެފާނު އެމަލާއިކަތުންނަށް އެތަކެތީގެ ނަންތައް އުނގަންނަވައި ދެއްވާށެވެ! ދެން އެކަލޭގެފާނު (އާދަމގެފާނު)، މަލާއިކަތުންނަށް އެތަކެތީގެ ނަންތައް އަންގަވައި ދެއްވެވި ހިނދު، އެކަލާނގެ ވަޙީ ކުރެއްވެވިއެވެ. ހަމަކަށަވަރުން، ތިމަން ރަސްކަލާނގެ އުޑުތަކާއި ބިމުގެ ޣައިބު ދެނެވޮޑިގެނަވަމޭ، އަދި ތިއަބައި މީހުން ފައުޅުކުރާ ކަންތަކާއި ވަންހަނާކުރާ ކަންތައް ދެނެވޮޑިގެންވަމޭ، ތިއަބައި މީހުންނަށް ވަޙީ ނުކުރައްވަން ހެއްޔެވެ؟" (ބަޤަރާ ސޫރަތުގެ 33)
ﷲ ތަޢާލާގެ އެއްކައުވަންތަކަމާއި އިސްލާމް ދީނުގެ ޙުކުމްތައް ޤަބޫލުނުކުރާ މީހުން އެންމެ ބޮޑަށް ރުޅިއަންނަނީ މަރުވުމުން ކައްވަޅުގައި ޢަޛާބުލިބޭކަމާއި ޤިޔާމަތްދުވަހުން ނަރަކައަށް ވަންނަން ޖެހިދާނެ ވާހަކަ ދެއްކުމުންނެވެ! އެފަދަ މީހުންނަށް ބުނެލަން އޮތީ ނަރަކަ އެއްވެސް މީހެއްގެ ފަހަތަކުން އެމީހާ ހޯދާކަށް ނައުދެއެވެ. ތިބާ ނަރަކަ ފަހަތުންގޮސް ނަރަކައަށް ވެއްޓިގަންނަނީއެވެ. ވީމާ ނަރަކަ ކުށްވެރިނުކުރާށެވެ! އަމިއްލަ ނަފްސް ކުށްވެރިކުރާށެވެ! ތިބާއަށް ނަރަކައަށް ވަންނަން ޖެހިއްޖެ ނަމަ ނަރަކައަށް ވަންނާނީ އަމިއްލަ ނަފްސް ކުށްވެރިކުރާ ޙާލުގައެވެ!
- އިސްލާމީ ތިލަފަތުގެ ދަރުސަކުން
