ހިތްދަތިކަމުންވެސް، ބަލިމަޑުކަމުންވެސް މުޞީބާތަކުންވެސް އަދި އިންސާނުންނަށް ރައްކައުތެރިކަން ބޭނުންވާ ކޮންމެ ކަމަކުންވެސް ރައްކައުތެރިކަން ދެއްވެވޭނީ ހަމައެކަނި ﷲ ތަޢާލާއަށެވެ! ވީމާ ކޮންމެ ކަމަކުން ނަމަވެސް ރައްކައުތެރިކަން ބޭނުން ނަމަ ﷲ ތަޢާލާގެ ޙަޟްރަތުން ރައްކައުތެރިކަމަށް އެދޭށެވެ! ﷲ ތަޢާލާ ރައްކައުތެރިކަން ދެއްވެވުމުން ތިބާއަށް އެއްވެސް ގެއްލުމެއް ދެވޭނެ އެއްވެސް ފަރާތެއް ނުވެއެވެ.
މިހާރު މުޅިދުނިޔެއަށް ފެތުރިފައި މިވާ ކޮވިޑްގެ ވަބާއިން ސަލާމަތްވުމަށްވެސް އޮތް ހަމައްެކަނިމަގަކީ އެއީއެވެ. ޑޮކްޓަރުން ދޭ އިރުޝާދުތަކުގައި ހިފަހައްޓާށެވެ! ބަލިން ސަލާމަތްވެ ހުރުމަށް ކުރެވެންހުރި ހުރިހާ މަސައްކަތެއް ކުރާށެވެ! އަދި އަޅުކަންކުރުން ގިނަކޮށް ތަޤްވާވެރިކަން އިތުރުކުރަން މަސައްކަތްކުރަމުން ދުޢާކުރުން ގިނަކުރާށެވެ!
ރަސޫލް ވަނީ ﷲ ތަޢާލާގެ ޙަޟްރަތުން ރައްކައުތެރިކަން ލިބިގަތުމަށް މަސައްކަތްކުރަން ޙަދީޘްފުޅުކުރައްވަވައިފައެވެ. ރައްކައުތެރިކަން ލިބިގަތުމަށް މަސައްކަތްކުރަންޖެހޭކަން ﷲ ތަޢާލާ ވަނީ ކީރިތި ޤުރްއާނުގައި ބަޔާނންކުރައްވަވައިފައެވެ. އެކަމަށް ޚާއްޞަ ސޫރަތްތައް ވަނީ ބާވައިލައްވަވައިފައެވެ.
ވީމާ އަހަރެމެންނަށް އޮތީ ޢަމަލުކުރުމެވެ. މުޅި ދުވަސް ﷲ ތަޢާލާގެ ރައްކައުތެރިކަމުގައި، އެކަލާނގެ ބެލެނިވެރިކަމުގައި ހޭދަކުރެވޭނެ މަގުތައް ﷲ ތަޢާލާ ވަނީ ދައްކަވައި ދެއްވަވައިފައެވެ. އަހަރެމެންނަށް އޮތީ އެމަގުތަކުން ކުރިއަށްދިއުމެވެ.
ވީމާ ފުރަތަމަކަމަކަށް ޖަމާޢަތުގައި ފަތިސްނަމާދުކޮށް ﷲ ތަޢާލާގެ ރައްކައުތެރިކަން ލިބިގަންނާށެވެ! އެކަން ނުކޮށް ދެންކުރެވޭ ކަންކަމުގައި އޮންނާނީ ކޮން ގަރަންޓީއެއް ހެއްޔެވެ؟ ބައެއް ޤައުމުތަކުގައި މިސްކިތް ހުންނަލެއް ދުރުކަމުން ޙާލަތުނިޔާކުރާގޮތުން ގޭގައި ނަމާދުކުރަންޖެހުނު ނަމަވެސް ގޭގެ އެންމެން ފަތިސްނަމާދަށް ހޭލާށެވެ! ގޭގައި ނަމަވެސް ޖަމާޢަތް ހަދައިގެން އެންމެން އެކުގައި ނަމާދުކުރާށެވެ! ގޭގެ އެންމެންނަކީވެސް ﷲ ތަޢާލާގެ ރައްކައުތެރިކަމުގައި ދުވަސް ހޭދަކުރާ ބައަކަށްވެއްޖެ ނަމަ އެގެއަކަށް އެވަނީ ރައްކައުތެރިކަން ލިބިފައެވެ.
- މުފްތީ މެންކުގެ ދަރުސަކުން
