ކޮވިޑްގެ މިޙާލަތުގައި އަޅުކަމާއި މީސްތަކުން ދުރުކުރުވަން ކުރެވޭ ކޮންމެ ކަމަކީ ރަސޫލް ﷺ ގެ ޙަދީޘްފުޅާއި ދެކޮޅަށް ހިންގާ ވަރަށް ބޮޑު ޖަރީމާއެކެވެ.
ފަހު ޒަމާން ކައިރިވަމުން އަންނަވަރަކަށް އިންޒާރުތަކާއި މުޞީބާތްތައް ގިނަވާނެ ކަމާއި ކޮންމެ ކަމަކާއި ގުޅިގެންވެސް އެންމެ ބޮޑަށް ސަމާލުކަންދޭންޖެހޭނީ، އަވަސްވެގަންނަޖެހޭނީ ހެޔޮ އަމަލުތައްކުރަންކަން ޙަދީޘްފުޅުން އެނގެން އެބައޮތެވެ.
ކޮރޯނާ ވައިރަސްއަކީވެސް އަދި ސިލްސިލާކޮށް ދުނިޔެއަށް ކުރިމަތިވަމުން މދާ މުޞީބާތްތަކަކީވެސް ހަމަ ﷲ ތަޢާލާ ފޮނުއްވަވާ އިންޒާރުތަކެވެ. އަހަރަކަށްވުރެ އަހަރަކު ކުރިމަތިވާ ކަންކަން ގިނަވެ ބޮޑެތިވަމުން އައިސް މިދިއަ އަހަރަކީ ކަންކަން އިންތިހާއަށް އިތުރުވެގެންދިއަ އަހަރެކެވެ. މުޅި ދުނިޔެ ހުއްޓުމަކަށް އައި އަހަރެވެ. އަދިވެސް މިއުޅެނީ އެ ޙާލަތުން އަރައިނުގަނެވިގެންނެވެ.
ސައިންސްވެރިން އެބުނަނީ އަންނަ އަހަރު އަންނަ ވައިރަސް މާވަރުގަދަވާނެ ކަމަށެވެ. މާނުރައްކާވާނެ ކަމަށެވެ. އެއީ ކާކު އެވައިރަސްތައް ވަރުގަދަކުރާނެތީހެއްޔެވެ؟ ވަރުގަދަވިޔަސް ނިކަމެތިވިޔަސް އެކަން މިންވަރުކުރައްވަވާނީ ހަމަ ﷲ ތަޢާލާއެވެ. ދުނިޔޭގެ އެންމެންނަށް ވެކްސިން ޖެހިދާނެއެވެ. ވެކްސިން ޖެހިނަމަވެސް އެބުނާ މާބާރުގަދަވާނެ ކޮރޯނާ މިޖަހާ ވެކްސިނަށް ގުޑާނެކަން އެނގެނި ކިހިނަކުންހެއްޔެވެ؟ އަދި ދެން ފޮނުއްވަވާނީ ކޮރޯނާއެއްކަން އެނގެނީވެސް ކިހިނަކުންހެއްޔެވެ؟
އެންމެންވެސް މިހާރު މިޖަހާ ވެކްސިން ޖަހަންވީއެވެ. ރައްކައުތެރިކަން ލިބިގަންނަން ކުރެވެންހުރި ހުރިހާ ކަންކަން ކުރަންވީއެވެ.
ޖިންސީ ގުޅުން ހިންގުމުން ކުރިން ޖެހެމުން އައި ބައްޔަށް ކިޔަނީ ކިހުނެވެ. ފަހުން ބަދަލުވީ އެއިޑްސްއަކަށެވެ. ދެންކަންކަން ވެގެންދިއައގޮތާއި އަދިވެސް އެއިޑްސްގެ ޙާލަތު ދުނިޔޭގައި އޮތް ގޮތް އެންމެންނަށްވެސް އެބަ އެނގެއެވެ. އެއިޑްސްގެ ވާހަކައިގެ އަޑު މަޑުވެލިއިރަށް މެފެނުނީ ކޮރޯނާއެއް އައިތަނެވެ. އެންމެން "ރޯނާގަންނަވަމުންދާތަނެވެ!"
މީސްތަކުންނޭވެ! ﷲ ތަޢާލާ ފޮނުއްވަވަމުން މިގެންދަވާ އިންޒާރުތަކަށް ބިރުވެތިވާށެވެ! ޢަމަލުތައް އިޞްލާޙްކުރާށެވެ! ތައުބާވާށެވެ! ﷲ ތަޢާލާގެ ޙަޟްރަތުން ވާގިއެދޭބައަކަށްވާށެވެ! ބުއްދީގެ ބޭނުންކުރުމަކީ އެއީއެވެ.
- ޝައިޚް ޙަސަން ޢަލީގެ ދަރުސަކުން
