ފުރަތަމަ ކަމަކީ ރާއްޖޭގެ މިސްކިތްތަކުގައި ޖަމާއަތުގައި ނަމާދުކުރާއިރު ގައިދުރުކުރުމާއި ބެހޭ ގޮތުން ފަތުވާތައް ލިޔެ ޑރ، އިޔާޟަށް ފާޑުކިޔާ ގިނަ މީހުންނަކީ އެއްވެސް އިރެއްގައި ޤަވާއިދުން ޖަމާއަތުގައި ނަމާދުކުރާ ބައަކު ކަމުގައި ފާހަގަނުކުރެވޭކަމެވެ. ދެން ޖަމާއަތުގައި ނަމާދުނުކުރާ ބައަކު ގައިދުރުނުކުރެވިގެން މިވަރަށް އުޅޭ ސަބަބު އެއީ ހަމަ ވަރަށް ބޮޑު ކަންބޮޑުވުމެކެވެ.
ދެވަނަކަމަކީ އެމީހުންނަށް މައްކާގެ ޙަރަމްފުޅުގައި ގައިދުރުކުރާގޮތް ފެންނަގޮތެވެ. އެތަނުގައި އެތިބެނީ މީހާގެ ކޮންމެ ފަރާތަކަށް 3 ފޫޓަށްވުރެ ބޮޑު ޖާގައެއް ދޫކޮށް 3 ފޫޓަށް ފުމޭ ކޮރޯނާއަށް އަތުނުޖެހޭނެ ގޮތަށްބަލައިގެންކަން ފާހަގަކުރެވެއެވެ.
ރާއްޖޭގައި ގައިދުރުކުރަން ދުރުކުރަނީ 3، 4، 6 އިންޗިއެވެ. އެވަރަށް ގައިދުރުކުރީމާ 3 ފޫޓަށް ފުމޭ ކޮރޯނާއަށް އަރައިނުގަނެވޭނެ ގޮތެއް އަޅެ ނިކަން ބުނެދީބަލާށެވެ! މައްކާ މިސާލަކަށް ދައްކާއިރު މިކަމަށް ވިސްނައިނުލަނީ ކީއްވެގެންބާވައެވެ!
ވަރަށް ކެރިހުރެގެން ބުނަމެވެ. ދެފައި ކައިރިކޮށް، ސުންނަތާއި އެއްގޮތަށް 2 ފައި ޖައްސައި ކޮނޑު ޖެއްސުމަކީ ކޮރޯނާ އެމީހަކާއި ކައިވާ ސަބަބެއް ނޫނެވެ. އެކަމުގެ ދަލީލަކީ މިސްކިތްތައް ބަންދުކޮށްފައި ހުޅުވީންސުރެ މިއަދާއި ހަމައަށް ކޮންމެ ދުވަހަކު ދެފައިތިލަ ފިއްތައިގެން ނަމާދުކުރާ މީހުންނާއިއެކު ފައިފިއްތައިގެން ނަމާދުކުރާ މީހުން ބައިވަރެވެ. އެއިގެ ތެރޭގައި ހިމެނޭ އެއްވެސް މީހަކަށް މިއަދާއި ހަމައަށް ކޮރޯނާ ޖެހުނުކަން އެނގިފައެއް ނުވެއެވެ. މިހެން ބުނީމާ މާދަން ޓެސްޓްކޮށްފައި އެންމެން ޕޮޒިޓިވްކަމަށް ބުނިނަމަވެސް ހައިރާނެއްވެސް ނުވާނަމެވެ. ނަމަވެސް މިއަދާއި ހަމައަށްވެސް ޙަޤީޤަތަކީ މިއީއެވެ. މިކަމަށް ހެކިވާނެ އެތައް ސަތޭކަ ބައަކު އެބަތިއްބެވެ.
ކޮރޯނާއަކީ މިސްކިތްތަކުން ޖެހޭ އެއްޗެއްނަމަ މާލެ ސިޓީގައި ކޮރޯނާ ގިނައިން ޖެހިފައިވާނީ ބަންގްލަދޭޝް މީހުންނަށެވެ. މިސްކިތްތައް އެއީ ކޮރޯނާ ފެތުރޭ ތަނެއްކަމަށް ބުނެ ބިރުދެއްކުމުން މިސްކިތްތަކަށް އަރާ މީހުންގެ ނިޞްބަތް 80 އިންސައްތައަކީ ބަންގްލަދޭޝް މީހުން ކަމުގައިވި ދުވަސްތަކުގައިވެސް ކޮރޯނާ ޖެހުނު މީހުންގެ 80 އަށްވުރެ މަތީ ދިވެހިން ކަމަށްވީކަން އެއީ މިކަމުގެ އެންމެ ސާބިތު ދަލީލެވެ. ވީމާ ކަންކަމުގެ ޙަޤީޤަތް އޮޅުވާލައި މިސްކިތާއި ނަމާދުގެ ޖަމާއަތަށް ބިރުދައްކަން ތިއަކުރާ މަސައްކަތް ވާނީ ހަމަ ފޭލްއެވެ. އިން ޝާ ﷲ. އެމަސައްކަތްކުރާ މީހުންގެ ނިމުން ހިތިވާނެއެވެ.
ކޮރޯނާއިން ސަލާމަތްވެތިބުމަށް މާސްކް އެޅުމާއި އަތްދޮވުމާއި އެނޫންވެސް ކަންކަން ހަމަކުރަންވީއެވެ. ނަމަވެސް ރާއްޖޭގެ މިސްކިތްތަކުގައި ގައިދުރު މިކުރާވަރަށް ގައިދުރުކޮށްގެން ކޮރޯނާއިން ސަލާމަތްވެވިދާނެކަމުގެ އެއްވެސް ޙުއްޖަތެއް އޮތިއްޔާ ނިކަން ދައްކަިބަލާށެވެ! ޙުއްޖަތަކަށްވާނީ ހުރިހާ މިސްކިތެއްގައި ކޮންމެ ފަރާތަކަށް 3 ފޫޓު ދޫކޮށްގެން ނަމާދުކުރާނަމައެވެ. 34،6 އިންޗިއަކުން ޙުއްޖަތެއް ނުދެއްކޭނެއެވެ.
އެގޮތަށް ތިބުމުން ވާނެ އޮތީ ދެކަމެކެވެ. 3 ފޫޓަށް ފުމޭ ކޮރޯނާއަކުންވެސް ސަލާމަތެއް ނުވެވޭނެއެވެ. އަދި ސުންނަތާއި އެއްގޮތަށް ނަމާދުގައި ހުރެވުނު ކަމަކަށްވެސް ނުވާނެއެވެ. އެ ޙާލަތަށް ދިވެހިބަހުގައި ކިޔައި އުޅެނީ ދެގެއްލުން ބައެވެ. އެއްވެސް ފައިދާއެއް ނުކުރުމެވެ.
މިވަރަކަށް ލިޔަން މިޖެހުނީ ޑރ. އިޔާޟް މިކަމުގައ ޙައްޤު ބަސް ވިދާޅުވުމުން ދައުލަތުގެ އިސް މަޤާމުތަކުގައި ތިބި މީހުންވެސް ޑރ. އިޔާޟަށް ބަހުގެ ޙަމަލާތައްދެމުން ގެންދާތީއެވެ.
ސައި ހޮޓާތަކުގައި ހުންނަ އަތްދޮންނަތަށިން އެތައް ބައަކު ފުންޏަކަށް ތިބެގެން އަތްދޮވެ އަނގަ ދޮވެ ކުޅުބުރުވާ ހަދާއިރު ކޮރޯނާއަރާކަމަކަށް ނުވެއެވެ. މިސްކިތުގެ އިސްކުރުބަރިން ގައިދުރުކޮށް ތިބެގެން ވުޟޫކުރީމާ ކޮރޯނާއަރާނެ ކަމަށް ބުނީމާ އެކަންވެސް މިޖެހެނީ ޤަބޫލުކުރާށޯލައެވެ! މިއީ ދެން ތަންކޮޅެއް ބޮޑުވަރުކަމަށް ޤަބޫލުކުރެވެއެވެ.
