ތިމާއަކީވެސް ރަސޫލް ގެ ޞަޙާބީން ފަދައިން ފާފަތައ ފުހެވިގެންވާ މީހަކުކަމުގައިވުމަށް އެދެމުހެއްޔެވެ؟ އެހެންކަމަށްވާނަމަ ޞަޙާބީން ޢަމަލުފުޅުކުރެއްވެވި ގޮތަށް ޢަމލުކުރާ ބައަކަށްވާން އެބަޖެހެއެވެ.
މިސާލަކަށް ޞަޙާބީން އަބަދުވެސް ތިއްބަވަނީ ﷲ ތަޢާލާގެ މަގުގައި ހޭދަކުރެއްވުމުގެ ފުރުޞަތަކަށް އެދިވަޑައިގެން އެކަމަށް ބައްލަވާށެވެ! ފުރުޞަތު ލިބިވަޑައިގެންފިނަމަ އަވަސްވެވަޑައިގަންނަވަނީ ﷲ ތަޢާލާގެ މަގުގައި ހޭދަކުރެއްވެވުމަށެވެ.
ބައެއް ޞަޙާބީން އެބޭކަލުންގެ މުޅި މލްިއްޔާތު ވަނީ ﷲ ތަޢާލާގެ މަގުގައި ހޭދަކުރައްވަވައިފައެވެ. އަނެއްބައި ބޭކަލުންވަނީ ދެބައިކުޅަ އެއްބައި ހޭދަކުރައްވައިފައެވެ. ކޮންމެ ބޭކަލަކުވެސް ވަނީ އެބޭކަލެއްގެ ފެންވަރުން ހޭދަކުރައްވަވައިފައެވެ.
ނަމަވެސް މިއަދު އަހަރެމެންނަށް މިއުޅެނީ ﷲ ތަޢާލާގެ މަގުގައި ނެރެންޖެހޭ ފަރުޟު ޒަކާތް ނުނެރެވިގެންނެވެ. އެންމެ 2.5 އިންސައްތަ ޒަކާތަށް ނެރެންޖެހުމުން މިދެއްކެނީ ހަމަ ދައްކަންޖެހޭ ޢަދަދުކަން ޔަޤީންކުރަން އެތައް މަސައްކަތެއް ކުރެއެވެ. އެންމެ ޑޮލަރެއްވެސް މަދުކުރެވެން އޮތްތޯ ބަލައެވެ. އެތައް ފަހަރަކު ފައިސާކޮޅު ގުނައެވެ.
ﷲ ތަޢާލާގެ ޙަޟްރަތުން ތިމާގެ ފާފަތައް ފުހެވިގެން ދިއުމަށް އުންމީދުކުރާ މީހާ ﷲ ތަޢާލާގެ މަގުގައި ހޭދަކުރުމުގައި ދީލަތިކަން އިތުރުކުރާށެވެ! ފަރުޟު ޒަކާތް ދެއްކުމަށް ރައްކައުތެރިވުމާއިއެކު ޞަދަޤާތް ދިނުން ގިނަކުރާށެވެ!
- މުފްތީ މެންކުގެ ދަރުސަކުން
