ގައިދުރުކޮށްގެން ޞަފު ހެދުން.
މިކަމަށް ބަލާއިރު އަޅުގަޑުމެން ގަބޫލު ކުރަން ޖެހޭ ޙަގީގަތަކީ އަޞްލަކީ ގައިދުރުނުކޮށް ޞަފު ހެދުން ކަން. އަދި ނަމާދަށް ޞަފު ހަދާއިރު ކައިރި ކައިރީގައި ތިބުމަށް ރަސޫލާ ޞައްލަالله ޢަލައިހި ވަސައްލަމަ ވަރަށް ބޮޑަށް ބާރުއަޅުއްވާފައިވާކަން. މި އަޞްލު ދޫކޮށް އެހެން ގޮތެއް ހަދައިފިނަމަ ދެން ވެދާނެ ގޮތާއި މެދު ވިސްނާލާއިރު ފާހަގަ ކުރެވޭ ކަންތައްތަކުގެ ތެރޭގައި:
1. މިހާރުވެސް މީހުން ނަމާދަށް ޞަފު ހެދުމުގައި ފަޔާއި ފައި ޖެއްސުމުގައި ކަންތައް ކުރަނީ އެންމެ ރަގަޅަކަށް ނޫން. ކޮރޯނާގެ ސަބަބުން ގައިދުރުކޮށް ޞަފު ހެދުމަށް ހުޅުވާލައިފނަމަ ނަތީޖާ އަކަށް ވެގެންދާނީ މީސްތަކުންނަށް އެހުޅުވާދެވުނީ ގޮތް ނޭނގޭ ނުބައި ދޮރެއް. އެދޮރު ދެނެއް ނުލެއްޕޭނެ. އެގޮތަކީ ކޮރޯނާ ނިމުނީމަވެސް މީހުން ބުނާނެ އެވެނި މީހެއްގެ ގައިގާ ގައިން ގަޔަށް އަރާ ބައްޔެއް އެބަހުއްޓޭ, ޢިލްމުވެރިން ވިދާޅުވެފައި ވެޔޭ އެޙާލަތުގައި ގައިދުރުކޮށް ތިބޭށޭ. މިހެން ކިޔާ އަބަދުވެސް މީސްތަކުން ތިބޭނީ ގައިދުރުކޮށް. އެހެންނަމަ, ރަސޫލާ ޞައްލަالله ޢަލައިހި ވަސައްލަމަގެ ސުންނަތެއް ވަޅުލެވިގެން ދިޔައީ.
2. އަނެއް ކަމަކީ މިސްކިތުގެ ޖަމާޢަތް އެއްފަހަރާ ނުހެދުން. އެއްބަޔަކު ނަމާދުކޮށް ނިމެންދެން އަނެއް ބަޔަކު މަޑުކުރަން ޖެހުން, މީގެ ސަބަބުން ދެން ނިކުންނާނެ ނޭދެވޭ އަޘަރު ތަކާއި މެދުވެސް ވިސްނަން ޖެހޭ. ހަމަ ޔަގީނުންވެސް ގައިދުރުކޮށް ޞަފު ހަދާނަމަ ހުކުރު ނަމާދުގެ ޖަމާޢަތް 3 ބުރަށް މިސްކިތުގައި ބާއްވަން ޖެހޭނެ. އެހެން ނޫނީ އެންމެންނަށް ފުރުޞަތު ނުލިބޭނެ.
3. ހަމައެކަނި މިސްކިތުގައި ނަމާދަށް ތިބޭ އިރު ގައިދުރު ކުރުމުން މަގްޞަދު ޙާޞިލްވޭތޯވެސް ބަލަން ޖެހޭ. މަގުތައް އޮންނަނީ ފުނި ޖެހިފައި. ބީޗްތައް އޮންނަނީ ފުނި ޖެހިފައި. މިސްކިތަށް ވަންނަނީ އެއްކޮށް. ނިކުންނަނީ އެއްކޮށް, ހަމައެކަނި ނަމާދު ކުރަން ހަށަމް ބަންނަންވީމާ ދުރަށް ޖެހިލަނީ. މިހެން ހެދުމުން ބަލި ކޮންޓްރޯލް ކުރެވޭނެތޯ? މިހެން ހެދުމުން ނަމާދުގެ ހައިއަތާއި ހައިބަތަށް އުނިކަން އައުން ނޫން ކަމެއްވޭތޯ? ރަސޫލާ ޞައްލަالله ޢަލައިހި ވަސައްލަމަގެ ސުންނަތް މުގުރާލުން ނޫން ކަމެއް ވޭތޯ? الله އަޅުގަޑުމެންނަށް ބުއްދި ދެއްވާފައިވަނީ ކަމަކު. މިފަދަ ކަމެއް ކުރުމުގެ ކުރިން ވިސްނާ ފިކުރު ކުރަން ޖެހޭ.
- ޑރ. މުޙައްމަދު އިޔާޟް ޢަބްދުއްލަޠީފް
