ކާފިރުންނަށް އެންމެ ބޮޑު މާޔޫސްކަމެއް ލިބިގެންދާނީ އޭނާގެ ފުރާނަ ހިއްޕަވާ ވަގުތުގައެވެ. އީމާންވެ ހެޔޮ ޢަމަލުތައް ކުރަން އިތުރު ފުރުޞަތަކަށް އެދި ދަންނަވާނެއެވެ. ﷲ ތަޢާލާ އެންގެވި ގޮތަށް ދުނިޔޭގެ ޙަޔާތް ވޭތިނުކޮށް ދުނިޔޭގެ ދިރިއުޅުމަށް ޣާފިލުވީ މީހުންވެސް ހަމައެފަދައިން އެދޭނެތެވެ.
އެމީހުންނަށް ﷲ ތަޢާލާ ޖަވާބު ދެއްވަވާނެތެވެ. "ހިނދުކޮޅަކަށްވެސް އެމީހާގެ މަރު ހިއްޕެވުން ލަސް ނުކުރައްވަވާނެ" ކަމުގެ ޖަވާބެވެ.
މިޙާލަތުން ސަލާމަތްވެވޭނެ އޮތީ ހަމައެންމެ ގޮތެކެވެ. އެއީ ކޮންމެ ވަގުތަކުވެސް ތިމާ މަރުވެދާނެކަމަށް ބަލައި މަރުވުމަށް ތައްޔާރުވެގެން ހުރުމެވެ. ހަނޑާނުގައި ބަހައްޓަންވީ މި ޙަދީޘްފުޅެވެ. އެއީ ޤިޔާމަތްވާނީ ކޮން އިރަކުންތޯ ސުވާލު ދެންނެވުމުން ޙަދީޘްފުޅު ކުރެއްވެވި ސުވާލެވެ. "ތިބާ މަރުވާނެ ވަގުތަށްޓަކައި ތިބާ ކުޅައީ ކޮންކަމެއް ހެއްޔެވެ؟"
މީސްތަކުންނޭވެ! އެހެން މީހުންގެ ފަހަތުން ދުވުމަށާއި އެހެން މީހުންގެ ރުހުން ހޯދަން ވަގުތުތައް ބޭކާރުނުކުރާށެވެ! ﷲ ތަޢާލާގެ ރުހިވޮޑިގަތުން ހޯދަން ގަދައަޅައި މަސައްކަތްކުރާށެވެ! ކޮންމެ ވަގުތަކުވެސް މަރުވެދާނެކަމަށްބަލައި އެކަމަށް ތައްޔާރުވާން މަސައްކަތްކުރާށެވެ! މަރުގެ މަލާއިކަތާ މަރުހިއްޕަވަން ވަޑައިގަތުމުން އުފާވެރިކަމާއިއެކު މަރުޙަބާ ކިޔޭނެ މީހަކަށްވެވޭނީ އެއިރުންނެވެ.
ދުނިޔެއިން ނުކުމެގެން ގޮސް ނަރަކައިގެ ވަޅުގަނޑަކަށް ނުވެއްޓި ސުވަރުގޭގެ ބަގީޗާއަށް ވަދެވޭނީ އެއިރުންނެވެ. މިބުނަނީ ތިމާގެ ކައްވަޅަކީ ނަރަކައިގެ ވަޅުގަނޑަކަށް ނުވެ ސުވަރުގޭގެ ބަގީޗާއަކަށްވުމުގެ ވާހަކައެވެ.
- ބިލާލް އައްސަދުގެ ދަރުސަކުން
