މީސްތަކުން ދުނިޔެއަށް ދަހިވެތިކަން ބޮޑުވީވަރުން ހުރިހާ ވަގުތުތަކެއްހެން ހޭދަކުރަނީ ތިމާއަކީ ވެރިންގެ ރުހުމާއި ލޯބި ލިބޭ މީހަކަށްވުމަށެވެ. ތަނަވަސްމީހެއްގެ ރުހުން ލިބިގެންވާ މީހަކަށްވުމަށެވެ. ﷲ ތަޢާލާގެ ރުހިވޮޑިގަތުން ލިބިގެންވާ މީހަކު ކަމުގައިވުމަށް މަސައްކަތްކުރުން އޮންނަނީ ދޫކޮށްލެވިފައެވެ.
އެހެންކަމުން މި ބަޔާންކުރަނީ އެމީހަކަށް ﷲ ތަޢާލާ ލޯބިވެވޮޑިގެންފިނަމަ އެމީހަކަށް ލިބިގެންދާނެ 2 ނިޢްމަތެވެ.
ފުރަތަމަ ނިޢްމަތަކީ އެމީހަކުދެކެ ﷲ ތަޢާލާ ލޯބިވެވޮޑިގެންވާކަން ޖިންބރީލްގެފާނަށް އަންގަވާނެތެވެ. އަދި އެމީހަކު ދެކެ ލޯބިވެވަޑައިގަތުމަށް ޖިބްރީލްގެފާނަށްވެސް އަންގަވާނެތެވެ. އަދި އެހިނދު ވަގުތުން އެކަން ޖބްރީލްގެފާނު ޤަބޫލުފުޅުކުރައްވަވައި އެހެން ހުރިހާ މަލާއިކަތުންނަށްވެސް ހަމަ އެފަދައިން އަންގަވާނެތެވެ.
ދެން ނިކަން ބުނެބަލާށެވެ! ތިބާއަށް ފައިދާ ބޮޑުވާނީ ކޮންކަމަކުންހެއްޔެވެ؟ ރަސްގެފާނު، ރާނީ، ރައީސް، ނުވަތަ ބޮޑުވަޒީރުގެ ލޯބި ލިބޭމީހަކު ކަމުގައިވެވިގެން ހެއްޔެވެ؟ ﷲ ތަޢާލާގެ ރުހިވޮޑިގަތުން ޙާޞިލުކުރެވޭ މީހަކުކަމުގައި ވެވިގެންހެއްޔެވެ؟
ﷲ ތަޢާލާގެ ލޯބިވޮޑިގަތުން ޙާޞިލުކުރެވިއްޖެ މީހަކަށް ދެން ލިބިގެންދާނެ މަތިވެރި ނިޢްމަތަކީ ކޮންމެ އިންސާނަކުވެސް އެންމެ ބޮޑަށް ބޭނުންވާނެ ނިޢްމަތެވެ. އެއީ އެމީހެއްގެ ގައިގައި ނަރަކައިގެ އަލިފާން އެއްވެސް މިންވަރަކަށް ނުވެސް ބީހޭނެ ކަމެވެ.
ދެން ނިކަން ބުނެބަލާށެވެ! ތިބާއަށް ފައިދާކުރާނީ ވެރިންނާއި މުއްސަނދިންގެ ރުހުން ލިބިގެންހެއްޔެވެ؟ ނުވަތަ ﷲ ތަޢާލާގެ ލޯބިވެވޮޑިގަތުން ލިބިގެންހެއްޔެވެ؟ ބޭނުން ގޮތެއް އިޚްތިޔާރުކުރުމުގެ ބާރު ތިބާއަށް ވަނީ ލިބިގެންނެވެ.
- ޝައިޚް ސަޢީދް ރާޤިއާގެ ދަރުސަކުން
