މިސްކިތުގެ ޖަމާއަތް މެދުކަނޑާލުމަށާއި ޖަމާއަތުގައި ގައިދުރުކުރުވަން އެޗްޕީއޭގައި ތިބި ﷲ ތަޢާލާގެ ޢަދުއްވުން ކުރަމުން ގެންދާ ޕްރެޝަރުތަކާއި ގުޅިގެން މިރޭ އިސްލާމިކް މިނިސްޓްރީން ބޭއްވި ޢިލްމުވެރިންގެ ބައްދަލުވުމުގައި ބައިވެރިވެވަޑައިގެންނެވި ޢިލްމުވެރިންގެ ތެރެއިން ބޮޑު އަޣްލަބިއްޔަތެއްގެ ޢިލްމުވެރިން ތާއީދުކުރެއްވީ ގައިދުރު ނުކުރުމަށެވެ.
ޢިލްމްވެރިން ވިދާޅުވަމުން ގެންދެވީ ގައިދުރުކޮށްފިނަމަ ބަލި ކޮންޓްރޯލް ކުރެވޭނެ ކަމުގެ އެއްވެސް ހެއްކެއް އެޗްޕީއޭއިން ދެއްކުމަށެވެ. އަދި މިސްކިތުގެ ޖަމާއަތުގައި ގައި ކައިރިކުރާތީ ބަލިފެތުރޭ ކަމުގެ ހެކި ދެއްކުމަށެވެ.
މިއީ އުފައްދައިގެން ނޫން ގޮތަކަށް ދެއްކޭނެ ހެއްކެއް ނޫނެވެ!
މިރޭގެ ބައްދަލުވުމުގައި އެޗްޕީއޭއިން ބޭނުންވާ ގޮތަށް ޢިލްމުވެރިންގެ ބޮޑު އަގްލަބިއްޔަތަކުން ދެކޮޅު ހެދުމުން ބައްދަލުވުން ނިންމައިލީ ވޯޓަށްވެސް ނުއަހައި މިނިސްޓަރަށް ފެނިވަޑައިގަންނަވާ ގޮތަކަށް ނިންމަވާނެ ކަމަށް ވިދާޅުވެފައެވެ.
މިރޭގެ ބައްދަލުވުމުގައި މަޝްވަރާތައް ދިއަގޮތުން ގައިދުރުކުރަން ނިންމަފިނަމަ މިބާވަތުގެ ނިންމުމަށް ދިވެހިބަހުގައި ކިޔައި އުޅެނީ ސަރުކާރަށް ބާރެއް ލިބިފައި އޮތީތީ ހިތުހުރި ގޮތަކަށް ބޭނުން ކުރުން ކަމަށެވެ. ނުވަތަ ޚުދުމުޚުތާރު ގޮތުގައި ބާރުގެ ބޭނުންކުރުންކަމަށެވެ. ނުވަތަ އެކަން ވާނީ ޙައްޤުމަގާއި އިންޞާފު ދޫކޮށް ބާރާއި ނުފޫޒަށް ބޯލެނބުން ކަމަށެވެ.
މިސްކިތްތަކުގެ ޖަމާއަތް ހުއްޓާލައިފިނަމަ ނުވަތަ މިހާރު ގައިކައިރިކޮށް ނަމާދުކުރާ މަދު މީސްކޮޅަށް ނުފޫޒުފޯރުވައިގެން ގައިދުރުކޮށްފިނަމަ މާލެ ސިޓީން ކޮވިޑް ބަލި ފިލުވައިލެވޭނެ އެއްވެސް ހެއްކެއް ހުރިނަމަ އެޗްޕީއޭއިން އެކަން ހާމަކުރަން ފަސްޖެހެނީ ކީއްވެގެންތޯއެވެ؟ ހާމަކުރަންވީ ނޫންތޯއެވެ؟
މިސްކިތްތަކާއި ނަމާދާއި މިސްކިތްތަކުގައި ހުންނަ ޚަޠިމާއި މިސްކިތު އިސްކުރުބަރި އެއީ ކޮރޯނާ ފަތުރާ ތަންތަން ކަމަށް ދައްކަން އުލނަސް އެކަމެއް ނުކުރެވޭނެއެވެ. އެކަން ކުރެވޭނެ އެއްވެސް ޙަޤީޤީ ސަބަބެއް މިއަދާއި ހަމައަށްވެސް ފެނިފައެއް ނުވެއެވެ. ހައްތާވެސް ފެންނަނީ އަރަތެވެ.
މިސްކިތުގެ އިސްކުރުބަރިން ވޫޟޫކޮށްފިނަމަ ކޮރޯނާ އަރައިގަނެއެވެ. ބާޒާރުމަތީގައި ހުންނަ އިސްކުރުބަރިއާ ހޮޓާތަކުގެ އަތްދޮންނަތަށި 24 ގަދިއިއރު ބޭނުންކުރުމަކުން ކޮރޯނާއެއް ނުޖެހެއެވެ. ޖެހެނީ މަދު މީހަކު ފަސްވަގުތު މިސްކިތުން ވުޟޫކޮށްލުމުންނެވެ! ދެން އެޗްޕީއޭއިން ބުނާތީ މިވާހަަކވެސް ވީ ޤަބޫލުކުރާށޯލައެވެ!
