އަމިއްލައަށް މަރުވުމަކީ މީހަކު މެރުމަށްވުރެ ބޮޑު ފާފައެއް!

އަމިއްލައަށް މަރުވުމަކީ އެންމެ ބޮޑެތި ފާފަތަކުގެ ތެރެއިން ވެސް ބޮޑު ފާފައެކެވެ. މީހުން މެރުމަށްވުރެ ވެސް ބޮޑު ފާފައެކެވެ. އެގޮތަށް ބެލެވެނީ އަމިއްލައަށް މަރުވާ މީހުންގެ މައްޗަށް ކަށުނަމާދުކުރުމާއިމެދު ދީނީ ޢިލްމުވެރިންގެ މެދުގައި ޚިލާފް އުފެދިފައިވާއިރު މީހުން މަރާ މީހާގެ މައްޗަށް ކަށުނަމާދުކުރުމާއިމެދު އެފަދަ ޚިލާފެއް އުފެދިފައެއް ނުވެއެވެ. 

މީހަކު އަމިއްލައަށް މަރުވެއްޖެ ނަމަ އެމީހާ މަރުވަން ހަށިގަނޑަށް އަނިޔާދިން ފަދައިން ހަށިގަނޑަށް އަނިޔާދިނުންމަތީގައި ނަރަކައިގައި ދެމިހުންނާނެ ކަމަށް ޙަދީޘްފުޅުން އެނގެން އެބައޮތެވެ. 

އެހެންކަމުން ބައެއް ޢިލްމުވެރިން ބަޔާންކުރައްވަވާ ގޮތުގައި އީމާންކަމުގެ ކުޑަމިންވަރެއްވެސް ހިތުގައިވާ މީހާ އަމިއްލައަށް މަރެއް ނުވާނެއެވެ. (ސިކުނޑިއަށް ލިބިފައިވާ އުނިކަމެއް ފަދަ ކަމަކުން އެފަދަ އަމަލެއް ކުރުން ފިޔަވައެވެ.) 

"He who commits suicide by throttling shall keep on throttling himself in the Hell Fire (forever) and he who commits suicide by stabbing himself shall keep on stabbing himself in the Hell-Fire." (Bukhari, Janaiz 84)

ބައެއް މީހުން އެމީހުންގެ ލޯބިވެރިޔާ ގެއްލުން ފަދަ ވަރަށް ކުދިކުދި މައްސަލަތަކުގައިވެސް އެބަ އަމިއްލައަށް މަރުވެއެވެ. ކުރިމަތިވިކަމަކީ ކިތަންމެ ކުޑަކަމެއް ނަމަވެސް އަދި ކިތަންމެ ބޮޑު ކަމެއްނަމަވެސް އަމިއްލައަށް މަރުވެގެން ނުވާނެއެވެ. ދުނިޔޭގައި ކުރިމަތިވާނީ އެމީހާގެ ހިތް ރުހޭހައި ކަންކަމެއް ނޫނެވެ. ހިތް ނުރުހޭ ކޮންމެ ކަމެއް ދިމާވުމުން އަމިއްލައަށް މަރުވާންވެއްޖެނަމަ އެމީހާގެ އީމާންތެރިކަމަކީ ކޮބައިހެއްޔެވެ؟ ﷲ ތަޢާލާގެ އަމުރުފުޅުތަކަށް ކިޔަމަންތެރިވެވޭ މިންވަރަކީ ކޮބައިހެއްޔެވެ؟ 

އަމިއްލައަށް މަރުވުމަކީ މިހައި ބޮޑު ފާފައެއް ނަމަވެސް މީހަކު އަމިއްލައަށް މަރުވެއްޖެނަމަ އެމީހަކަށް ނިކަމެތިބަސްބުނެހަދައިގެން ނުވާނެއެވެ. އެހެނީ އޭނާ އެކަންކުރީ ހަމަހޭގައިހުރެކަން އެނގޭނެ ގޮތެއް ނެތުމުންނެވެ. އޭނާގެ ސިކުނޑިއަށް މެދުވެރިވާ ކަމެއްގެ ސަބަބުން ހަމަބުއްދިފިލައި ހިނގައްޖެ ނަމަ ކޮންމެފަދަ ކަމެއްވެސް ކުރެވިދާނެތީއެވެ. 

ކޮންމެ މީހަކުވެސް ވިސްނަންްވީ އެފާފައިގެ ބޮޑުކަމެވެ. މަސައްކަތްކުރަންވީ ކެތްތެރިވުމަށެވެ. ކޮންމެ ހިތްދަތިކަމަކާއި މުޞީބާތެއް ވެސް ކުރިމަތިވާނީ ﷲ ތަޢާލާގެ ޙަޟްރަތުންކަން ޔަޤީންކޮށްގެން ހުންނަ މީހާއަށް ﷲ ތަޢާލާ ކެތްތެރިކަން ދެއްވަވާނެތެވެ. އިން ޝާ ﷲ 

- އިސްލާމީ ތިލަފަތުގެ ދަރުސަކުން