ބައެއް މީހުންނަށް ވިސްނިފައި އޮންނަނީ މިވެނި ފާފައަކީ ވަރަށް ކުޑަކުޑަ ފާފައެއް ކަމަށެވެ. އެއްވެސް ފާފައަކީ ކުޑަކުޑަ ފާފައެއްކަމަށް ޤަބޫލުކުރެވޭނަމަ އެފާފަކޖުރަން އެއްވެސް މީހަކު ޖެހިލުމެއް ނުވާނެއެވެ. ވީމާ ޢުމުރު ހުސްވެގެންދާއިރު އުހުދު ފަރުބަދަ ވަރުގެ ބިޔަ އެތައް ހާސް ފަރުބަދަހައި ގިނަ ފާފަތައް ކުރެވިފައިހުރުމަކީ ގާތްކަމެކެވެ.
ޢަބްދުﷲ ބުން މަސްޢޫދު رضي الله عنه ގެ އަރިހުން ރިވާވެގެންވެއެވެ. ރަސޫލުﷲ صلى الله عليه وسلم ޙަދީޘްކުރެއްވިއެވެ.
إِيَّاكُمْ وَمُحَقَّرَاتِ الذُّنُوبِ، فَإِنَّهُنَّ يَجْتَمِعْنَ عَلَى الرَّجُلِ حَتَّى يُهْلِكْنَهُ» [رواه أحمد وحسنه الألباني]
މާނައީ: "މީސްތަކުން ކުދި ފާފަތައްކަމަށްދެކޭ ކަންކަމާމެދު ތިޔަބައިމީހުން ރައްކާތެރިވާށެވެ. ފަހެ މީހާކު ހަލާކުވެއްޖައުމަށް ދާންދެން އެފާފަތައް އޭނާގެ މައްޗަށް ޖަމާވެއެވެ."
އަދި ނުބައިކޮށް އުޅުނުމީހާއަށް، ޤިޔާމަތްދުވަހު އޭނާގެ ކުދި ފާފަތައް ގިނަވެފައިވާތަން ފެނުމުން އެކަމުގެ މުޞީބާތް ނުހަނު ބޮޑުވާނެއެވެ. އަދި އެހިނދުގައި ބިރުން ބުނާނެއެވެ.
يَاوَيْلَتَنَا مَالِ هَذَا الْكِتَابِ لَا يُغَادِرُ صَغِيرَةً وَلَا كَبِيرَةً إِلَّا أَحْصَاهَا وَوَجَدُوا مَا عَمِلُوا حَاضِرًا وَلَا يَظْلِمُ رَبُّكَ أَحَدًا﴾ (الكهف: 49)
މާނައީ: "އޭ ތިމަންމެންނަށްހުރި ހިތާމައެއްގެ ބޮޑުކަމާއެވެ! މިފަތަށް މިވެފައިވަނީ ކީއްހެއްޔެވެ؟ ކިތަންމެ ކުޑަކަމެއްވެސް، އަދި ބޮޑުކަމެއްވެސް، އެ ފަތުގައި ނުހިމަނައި ދޫކޮށްލައިފައެއް ނުވެއެވެ. އަދި އެބައިމީހުންކުޅަ އެންމެހައި ޢަމަލުތައް އެ ފަތުގައިވާތީ، އެބައިމީހުން ދެކޭނެތެވެ. ކަލޭގެފާނުގެ ވެރިރައްބު އެއްވެސްމީހަކަށް އަނިޔާވެރިވެވޮޑިއެއް ނުގަންނަވަތެވެ."
މީސްތަކުންނޭވެ! ހުއްދަ ނޫން މަންޒަރުބެލުމާއި ދޮގުބުނުމާއި ވައުދު ނުފުއްދުންފަދަ ބައެއް ކަންކަމަކީ ވަރަށް އާދައިގެ ކަންކަން ކަމަށް ދެކި ގިން ބައަކު ދަނީ އިހްމާލްވަމުންނެވެ. އެފަދަ ފާފަތައް ކުރަމުންނެވެ. އެއްވެސް ފާފައަކީ ކުޑަ ފާފައެއް ނޫނެވެ. ނަރަކައިން ސަލާމަތްވެވޭނީ މީޒާނުގައި ޒައްރެއްގެ މިންވަރުވެސް ފާފައިގެ ކޮޅަށް ބަރުވެދާނެ ކޮންމެ ފާފައެއް އެއީ ބޮޑު ބިޔަ ފާފައެއްކަމަށް ދެކިގެން ދުނިޔޭގައި އުޅުމުންނެވެ.
- އިސްލާމީ ތިލަފަތުގެ ދަރުސަކުން
