ކޮވިޑް 19 އާއި ގުޅިގެން ކުރިމަތިވަމުން އަންނަ މާލީ ދަތިތަކާއި ގުޅިގެން ދުނިޔޭގެ މާލީ އިދާރާތަކުން ފަށައިގަތީ އެމީހުންގެ ޙަރާމް ވިޔަފާރި އިތުރަށް ފުޅައުކޮށްލުމުގެ މަސައްކަތެވެ. ދުނިޔޭގެ އެންމެންގެ ޖީބަށް ރިބާ ހިމެނޭ ފައިސާ ވެއްދުމުގެ މަސައްކަތެވެ.
ލޮބުވެތި އަޚުންނާއި އުޚުތުންނޭވެ! ދަރަންޏަކުން ސަލާމަތްވުމުގެ ބޭނުމުގައި ރިބާ ހިމެނޭ ލޯނެއް ނެގުމުގެ މިސާލަކީ ވިއްސާރަވެ ވާރޭވެހެން ފެށުމުން ވާރޭހިޔާވާން ގޭގެ ފުރާޅުގައި ޖަހާފައިހުރި ޓިނުތައް ނެގުމެވެ.
ހަނދާންކުރާށެވެ! ދަތިހާލަތެއް ކުރިމަތިވި ނަމަވެސް އަމަލުކުރަން ޖެހޭނީ އިސްލާމީ އިންތަކާއި މިންގަނޑުގެ ތެރެއިންނެވެ! އަދި އެ އިންތަކާއި މިންގަނޑު ކީރިތި ޤުރްއާނުންނާއި ޞަޙީޙް ޙަދީޘްފުޅުން އެނގެން އެބައޮތެވެ. އެގޮތުން ބަލާއިރު ކިތަންމެ ކުޑަ ނަމަވެސް އިންޓަރެސްޓެއް ދައްކަން ޖެހޭ ކޮންމެ ފައިސާއަކީ ﷲ ތަޢާލާ ކަނޑައެޅިގެން ޙަރާމްކުރައްވަވާފައިވާ ރިބާ ހިމެނޭ ފައިސާއެވެ.
"ކޮންމެ މީހަކުވެސް ދުނިޔެއަށް އަންނަނީ ކަނޑައެޅިފައިވާ ރިޒްޤާއިއެކު. އެއްވެސް މީހަކަށް ކަނޑައެޅިފައިވާ ރިޒްޤެއް އެހެން މީހަކަށް ނުލިބޭނެ. އަދި އެމީހަކަށް ކަނޑައެލިފައިވާ ރިޒްޤް ހަމައަށް ނުލިބި މަރެއްވެސް ނުވާނެ. ރިޒްޤް ހޯދަން މަސައްކަތްކުރަން ޖެހޭނީ ޙަލާލް ގޮތުގަ."
އަތްމަތި ދަތިވުން ފަދަ ކަމެއް މެދުވެރިވެއްޖެ ނަމަ، އެއީ ކުރިމަތި ކުރެއްވެވި އިމްތިޙާނެއްކަމަށް ބަލައި ތަޤްވާވެރިކަން އިތުރުކުރުމާއިއެކު ދުޢާކުރުން އިތުރުކޮށް ޙަލާލު ގޮތުގައި އާމްދަނީ އިތުރުކުރަން މަސައްކަތް ކުރުމުން އިތުރުކޮށް ދެއްވަވާނެކަން އެއީ ޔަޤީންކުރަންޖެހޭ ކަމެކެވެ! އަދި މުސްލިމުން ޢަމަލުކުރަން އޮތީ އެގޮތަށެވެ!
ރިބާ ހިމެނޭ ލޯނާއި ރިޝްވަތުން ލިބޭ ފައިސާއާއި ތަކެއްޗަކީ ޙަރާމް ތަކެއްޗެވެ! ރިބާގެ ފައިސާ ބޭނުންކުރާ މީހުންގެ ބަނޑުފުފިގެންގޮސް ބޮޑުކަމުން ޤިޔާމަތް ދުވަހު ޖެހޭނީ ބިންމަތީގައި ފުރޮޅޭށެވެ. ޤިޔާމަތާއި ހަމައަށް ކައްވަޅުގައި އޮންނަން ޖެހޭނީ ލޭގެ ފެންގަނޑެއްގައި ބޮޑެތި ހިލަ ކައިކައެވެ. ﷲއަކްބަރު!
- އިސްލާމީ ތިލަފަތުގެ ދަރުސަކުން
