މުޞީބާތާއި ހިތްދަތިކަން ކުރިމަތިވުމުން ގިނަ ބައަކު އެދުވަސްތައް ކުށްވެރިކުރެއެވެ. ދުވަސްތައް ގޯސްކުރެއެވެ. ވަގުތު ގޯސްކޮށް ކުށްވެރިކުރެއެވެ. މިއީ ހަމަ އެއްވެސް މުސްލިމަކަށް ހުއްދަވެގެންވާ ކަމެއް ނޫނެވެ.
އެހެނީ ވަގުތަކީ ދުވަސްތަކަކީ ﷲ ތަޢާލާގެ ޙައްޤެކެވެ. އެވަގުތަކު އެދުވަހަކު އެދުވަސްތަކެއްގައިވާނެ ކަންކަން މިންވަރު ކުރައްވަވަނީ ﷲ ތަޢާލާއެވެ. އެހެންކަމުން ޙަދީޘްފުޅެއްގައި ވަގުތު ކުށްވެރިކުރުމަކީ ﷲ ތަޢާލާ ފަޟީޙަތްކުރުން ނުވަތަ ﷲ ތަޢާލާ އާއިމެދު ބުނެގެން ނުވާނެ ބަހެއް ބުނުންކަމަށް އައިސްފައިވެއެވެ.
2020 ވަނަ އަހަރަކީ ގިނަ ބައަކު އެއަހަރު ކުށްވެރިކުރި އަހަރެކެވެ. އެއީ އެއަހަރު ކުރިމަތިވި މުޞީބާތްތައް ގިނަކަމުންނެވެ. އަދި މިހާރުވެސް ގެންދަނީ އަހަރާއި ދުވަސްތައް ކުށްވެރިކުރަމުންނެވެ. މިކަމަކީ ޖާހިލިއްޔަ ޒަމާނުގައި މުޝްރިކުން ކޮށްއުޅުނު ނުބައިކަން ބޮޑު ފާފައެކެވެ. ވީމާ މުސްލިމުން މިކަމާއިމެދު ވަރަށް ބޮޑަށް ވިސްނަންވާނެއެވެ. އެފަދަ ބަހެއް ދުލުން ބުނެގެން ނުވާނެއެވެ.
- ޢުމަރު ސުލައިމާންގެ ދަރުސަކުން
"މިއަހަރަކީ ދަތި ކަންތައްތަކެއް ކުރިމަތިވި އަހަރެއް" ކަމަށްބުނެވިދާނެއެވެ. އެއީ ދަތިކަންތައްތަކެއް ކުރިމަތިވީތީއެވެ. ނަމަވެސް ނުބައި އަހަރެއްކަމަށް ބުނެގެން ނުވާނެއެވެ.
ނުއެނގި ތިބެ ނަމަވެސް މިފާފަ ގިނަ ބައަކަށް ކުރެވެމުންދާތީ ކަންއޮތްގޮތް ބުނެދިނީއެވެ.
