ދުނިޔޭގައި މީހަކު ހުރިނަމަ ރަމަޟާން މަސް އެމީހަކާްއި ބައްދަލުކުރާނެއެވެ. ނަމަވެސް އެއީ އަކީ އެމީހަކަށް ރަމަޟާން މަހާއި ކުރިމަތިލެވުން ކަމަކަށް ނުވާނެއެވެ. އެހެނީ ރަމަޟާން މަހާއި ކުރިމަތިލުން ކަމުގައި މުސްލިމުން މާނަކުރަނީ އެކަމަށް ވާޖެހޭ ތައްޔާރިތައް ވެގެން ކުރިމަތިލުމަށެވެ. ވާންޖެހޭ ތައްޔާރީތައވެގެން އެމަހާއި ބައްދަލުކޮށް މަރުޙަބާ ކިޔުމެވެ!
ރަމަޟާން މަހަށް ތައްޔާރުވުމުގެ ގޮތުން ކުރަންޖެހޭ އެންމެ މުހިންމު ކަމަކީ ފުރިހަމަތައުބާއަކުން ތައުބާވުމެވެ.
"ފުރިހަމަ ތައުބާއަކުން ތައުބާވުމަކީ ކުރެވުނު ނުބައި ކަންތައް ދޫކޮށްލައި (ކުރުން ހުއްޓާލައި)، އެކަން ކުރެވުނުކަން މައްޗަށް ހިތާމަކޮށް، ދެން އެފަދަ ކަމެއް ނުކުރުމަށް ޢަޒުމް ކަނޑައަޅައި، އެކަމުގައި މީހެއްގެ ޙައްޤެއް ވާނަމަ އެހައްޤު އެމީހަކަށް ރައްދުކޮށްދީ، ފާފަ ފުއްސަވައި ދެއްވެވުން އެދި ދުޢާ ކުރުމެވެ."
ދިނީ ބައެއް ޢިލްމްވެރިން ބަޔާން ކުރައްވާ ގޮތުގައި އެހެން މީހެއްގެ ޙައްޤަކަށް އަރައިގަތުން، ބޭނުންކުރުން ފަދަ ކަމެއް ކުރެވިފައި އޮވެމެ، އެމީހަކަށް ބަދަލު ދެވެން ނެތް ނަމަ އެކަން ބަޔާންކޮށް އެމީހެއްގެ ކިބައިން މާފަށް އެދި އެމީހާގެ ހިތް ހަލާލް ހޯދަން މަސައްކަތްކުރަން ވެސް ޖެހޭނެއެވެ.
އެހެނީ ޤިޔާމަތް ދުވަހު ﷲ ތަޢާލާ ފުއްސަވައި ދެއްވަވާނީ އެހެން މީހުންގެ ޙައްޤުތައް ނުހިމެނޭ ފާފަތަކެވެ. އެއްވެސް މީހެއްގެ ޙައްޤެއް އޮންނަ ކަންކަމުގައި ބަދަލު ދޭން ޖެހޭނެ ކަމަށެވެ. ޙައްޤު ލިބެންޖެހޭ މީހާގެ ކިބައިން މާފުލިބުމުން މެނުވީ ﷲ ތަޢާލާ މާފުނުކުރައްވަވާނެތެވެ!
އެއްވެސް މީހަކަށް ދެރައެއް ދެވި ހިތުގައި ޖެހޭ ފަދަ ކަމެއް ކުރެވިފައިވާނަމަ އެމީހެއްގެ ކިބައިންވެސް އަވަހަށް މާފުހޯދާށެވެ! ދަރާއޮތްނަމަ ދަރަނިއަދާކުރަންވެސް މަސައްކަތްކުރާށެވެ! އެހެނީ ރަމަޟާންމަހަށްޓަކައި އެންމެ މުހިންމު ކަމަކީ އެމީހާގެ ހިތާއިނަފްސް ޠޯހިރުކުރުމެވެ. އެކަންކުރެވޭނީ ހިތާއި ނަފްސް މިނިވަންކޮށްގެންނެވެެ.
މީގެ އިތުރުން ދެމަފިރިން ނަމަވެސް އެކަކު އަނެކާގެ ކިބައިން މާފަށް އެދި ހިތްޙަލާލްހޯދާށެވެ! މިސާލަކަށް ބުނެވިފައި ހުންނަ ހިތްހަމަނުޖެހޭ ފަދަ ބަސްތަކާއި ފަރުވާ ކުޑަކުރެވިފައި ހުންނަ ކަންކަންފަދަ ކަންކަމަށް އެކަކު އަނެކަކަށް މާފުކޮށް އަލުން އާޙަޔާތަކާއި ކުރިމަތިލުމަށް މަސައްކަތްފަށަންވާނެއެވެ.
- އިސްލާމީ ތިލަފަތުގެ ދަރުސަކުން
