ކޮވިޑް ބައްޔާއި ގުޅުވައިގެން ޖަމާޢަތުގެ ނަމާދު ހުއްޓުވަން ބައެއް ޢިލްމުވެރިން ޠޯއޫންބައްޔާއި ކަރަންޓީނުގެ ޙަދީޘްފުޅު މިސާލަކަށް އެބަނަގައެވެ، ޙުއްޖަތަކަށް އެބަދައްކައެވެ. ނަމަވެސް އެއީ ކުރެވެންއޮތް ކަމެއް ކަމަކަށް އަޅުގަނޑު ޤަބޫލެއް ނުކުރަމެވެ.
އެ ޙަދީޘްފުޅުގައި އޮތީ ޠޯޢޫން ބަލި ފެތުރިއްޖެނަމަ އެތަނަކުން ބޭރުނުވުމަށާއި އަދި އެތަނަކަށް އެތެރެވެސް ނުވުމަށެވެ. ރާއްޖެއިން ފުރައިގެން ދިއުމަކަށް މައްސަލައެއް ނެތެވެ. އަދި ވީހައި ގިނަ ފަތުރުވެރިންނަށް މިގެންދަނީ މަރުޙަބާ ކިޔަމުންނެވެ. ރާއްޖެއިން ބޭރުގައި ބަލި އިންތިހާއަށް ފެތުރިފައިވާ ޤައުމުތަކުގައި ތިބި ދިވެހިންނަށާއި އެޤައުމުތަކުގ ރައްޔިތުންނަށް ރާއްޖެ އައުމަށް އެއްވެސް ހުރަހެއްވެސް ނެތެވެ.
ވީމާ އެ ޙަދީޘްފުޅަށް ޢަމަލުކުރެވޭ ކަމަކަށް އަޅުގަނޑަކަށް ޤަބޫލެއް ނުކުރެވެއެވެ.
ހަމައެއާއިއެކު މަގުމަތީގައި މީސްތަކުން އުޅެމުން އެގެންދަނީ ގާތްގާތުގައެވެ. ހުއްޓިތިބެނީ ވެސް ގާތް ގާތުގައެވެ. ބައްދައި އޮޅުލައި ހަދައެވެ. ކުޅިވަރު ޕްރެކްޓިސްތައް ކުރިއަށް ގެންދެއެވެ. ދަނޑުތަކުގައި ގައިގޯޅިވެއެވެ.
އަޅުގަނޑުގެ އިލްތިމާސަކީ ރައްކައުތެރިކަމުގެ ފިޔަވަޅަކަށް މާސްކް އަޅުއްވާށެވެ! ސުންނަތުގައިވާ ފަދައިން ސަފުހަދާށެވެ! އިސްތިޣްފާރުކުރުން ގިނަކޮށް ބަލިން ސަލާމަތްކުރެއްވެވުން އެދި ދުޢާކުރުން ގިނަކުރާށެވެ! އެއްވެސް ބަޔަކަށް އެބައްޔެއް ފެތުރިގަމުގެ ބާރުލިބިގެނެއް ނުވެއެވެ. ބަލިޖެހޭނީ ﷲ ތަޢާލާގެ މިންވަރުފުޅުންނެވެ. ވީމާ އޮތީ ސަބަބުތަކުގައި ހިފަހައްޓައިގެން ތިބެ ﷲ ތަޢާލާގެ ޙަޟްރަތަށް ގިނަގިނައިން ދުޢާކޮށް ރައްކައުތެރިކަމަށް އެދޭށެވެ! ރައްކައުތތެރިކަން ލިބުންވަނީ ﷲ ތަޢާލާގެ ޙަޟްރަތުންނެވެ.
- މިއަދުނޫހުގެ ކިޔުންތެރިއެއް
