އެހެން މީހުން ތިބާ އާއިމެދު ކަންކަންކުރާ ގޮތް އެއީ ނުރަނގަޅު ގޮތް ކަމަށްވެއްޖެ ނަމަ އެކަމާއިމެދު ކުރެވެނެ އެއްވެސް ކަމެއް ތިބާއަށް ނެތިދާނެއެވެ. އެއީ އެކަމުގެ އެއްވެސް ބާރެއް ތިބައަށް ލިބިފައި ނުވާތީއެވެ. ކޮންމެ މީހަކަށް ވަކި މިންވަރެއްގެ އިޚްތިޔާރުތަކެއް ﷲ ތަޢާލާ ދެއްވަވާފައިވާތީއެވެ!
މިހައިތަނަށް ދުނިޔެ ބަދަލުކޮށްލީ ކޮންބައެއްކަން އެނގޭހެއްޔެވެ؟ ގނައީ އެކަމަށް ނުވެސް ވިސްނާ މީހުންނެވެ! ދުނިޔޭގެ ތާރީޚަށް ބަލާށެވެ! އަދި ކާމިޔާބު ދެމަފިރިންގެ ޒަވާޖީ ޙަޔާތަށް ބަލާށެވެ!
ދުނިޔެއަށް އެންމެ އަގުހުރި ޚިދުމަތް ކޮށްދިން ގިނަ ލީޑަރުންނަކީ އެމީހުންގެ ޙަޔާތުގެ ކޮންމެވެސް ހިސާބެއްގައި އެތައް ދަތިތަކެއް ކުރިމަތިވި މީހުންނެވެ. އެތައް ބައެއްގެ ބޮޑެތި އަނިޔާތައް ލިބުނު މީހުންނެވެ. ނަމަވެސް އެމީހުން ދ7ުނިޔޭގެ ލީޑަރުންނަށް ވެގެން އެދިއައީ އަމިއްލަ ނަފުސަށް ލިބުނު އަނިޔާތަކަށް ނުބަލައި އެހެން މީހުންނަށް ޚިދުމަތްކުރަން ކުރިމަތިލުމުންނެވެ.
ދެން އެންމެ ކާމިޔާބު ޒަވާޖީ ޙަޔާތަށް ބެލިނަމަވެސް އެންމެ އުފަލުގައި ހަމަޖެހިލައިގެން ދިރިއުޅޭ ދެމަފިރިންގެ ތެރޭގައި ގިނަވާނީ ކޮންމެވެސް އެހެން މީހެއްގެ ކިބައި ބޮޑެތި އަނިޔާތައް ލިބިފައިވާ މީހުންނެވެ. އެފަދަ ބޮޑެތި އަނިޔާތައް ލިބުމުންވެސް މާޔޫސްނުވެ އެއީ ކަމަކަށް ނުހަދައި އަލުން ދިރިއުޅުމާއި ކުރިމަތިލި މީހުންނެވެ!
ޙަޤީޤަތުގައި އެމީހުން އެތިބީ ފުރިހަމަ ގޮތުގައި ވަކީލުކޮށްގެންނެވެ. އަދި ކިއްހެއްޔެވެ؟ ލިބޭ ދެވަނަ ފުރުޞަތުގައި ގައިގަ ހިތްވަރު އެބަހުރިކަން ދައްކައިލަން ވަރަށް ވަރުގަދައަށް މަސައްކަތްކުރާނެއެވެ. 99 އިންސައްތަ ކާމިޔާބުވެސް ކުރާނެއެވެ. އިން ޝާ ﷲ
ކުރިން ކުރެވުނު ތަޖުރިބާގެ އެހީގައި ދެވަނަ ހަޔާތް ކާމިޔާބުކުރަން އެމީހުންނަށް ވަރަށް ބޮޑުތަން ފަސޭހަވެގެންދެއެވެ.
އަދި ކޮންމެ ދެމަފިރިއަކަށްވެސް ބަހެއް ބުނެލާނަމެވެ!
ދެމަފިރިން އެކަކު އަނެކަކަށް ކަންތައްތައް ކޮށްދޭންވީ އަނެކާ ކޮށްދޭ މިންގަނޑު ބަލައި މިނެ ކިރައިގެނެއް ނޫނެވެ. އެމީހަކަށް ކޮށްދެވުނު އެންމެ ރަނގަޅަކަށެވެ! އެއިރުން އެމީހަކަށް ﷲ ތަޢާލާ ދެއްވަވާނެ ބަދަލު ހިތަށްވެސް ނުގެނެވޭނެހައި ފުރިހަމަވާނެއެވެ! އިން ޝާ ﷲ
- އިސްލާމީ ތިލަފަތުގެ ދަރުސަކުން
