އެއީ ފިރިހެންދަރިއެއް ނަމަވެސް އަދި އަނހެން ދަރިއެއް ނަމަވެސް ތިބާ ނޭދޭ އުމުރެއްގައި ކައިވެނިކުރަން އެދިއްްޖެނަމަ އެއީ ހަމަ ތިބާގެ ކުށެކެވެ. އެކަމުން އަންގައިދެނީ ތިބާއަށް ދަރިފުޅު ތަރުބިއްޔަތުނުކުރެވިހުރިކަމެވެ. ވީމާ ފުރަތަމަ ކަމަކަށް ތިބާގެ ކުށް ޤަބޫލުކުރާށެވެ!
ދެވަނަ ކަމަކަށް ކޮށްދޭންޖެހޭނެ ކަމަކީ ކައިވެނިއަވަސްކޮށްދިނުމެވެ. އެއީ ފާފަކުރުމުން ދަރިފުޅު ސަލާމަތްކުރުމަށެވެ. އަދި ތިބާގެ ސަބަބުން ކައިވެނި ނުކުރެވިތިބެ ކުރާ ފާފައިން ތިބާއަށް ވެސް ބައި އެޅޭނެތީއެވެ. ތިބާވެސް ފާފަވެރިވާނެތީއެވެ.
ކައިވެނި ކުރަންވީ އުމުރާއި ހޯދަންޖެހޭނެ ބައިވެރިޔާގެ ސިފަތައް ދަރިންނަށް އަނގައިދިނުމަކީ މައިންބަފައިންގެ ޒިންމާއެކެވެ. އެކަންކުރެވޭނީ ދަރިންނާއިއެކު ބާއްވަންޖެހޭ ގުޅުންތައް ފުރިހަމައަށް ބާއްވައިގެންނެވެ. ލޯތްބާއިއެކު ދަރިންނާއި މުޢާމުޢާމަލާތުކޮށްގެންނެވެ. ދަރިންގެ އެންމެ ގާތް އެކުވެރިއެއްގެ ދައުރުވެސް މައިން ބަފައިން އަދާކޮށްގެންނެވެ.
ދަރިއަކު ކައިވެނިކުރަން ބޭނުންވުމުން އެކަމުގައި ދީނީ ގޮތުން މައްސަލައެއް ނެތްނަމަ އެކައިވެނި ކުރިއަނުދީ ހިފަހައްޓައިގެންނުވާނެއެވެ. ލަސްވެސްކޮށްގެން ނުވާނެއެވެ. އަތުގައި މުދައު ނެތުމަކީ އަދި ގެދޮރު ނެތުމަކީ ކައިވެނިކޮށްނުދޭންވީ ސަބަބެއް ނޫނެވެ. ފައިސާ އާއި މުދަލާއި ގެދޮރު ދެމަފިރިން މަސައްކަތްކުރުމުން ﷲ ތަޢާލާ ދެއްވަވާނެތެވެ. އިން ޝާ ﷲ
އަބަދުވެސް އަހަރެން ބުނާފަދައިން ދަރިއަކު ކައިވެނިކުރަން ބޭނުންވުމުން ބަލަންޖެހޭ ޝަރުޠުތައް ﷲ ތަޢާލާގެ ޙަޟްރަތުން އޮތީ އެނގޭށެވެ. ރަސޫލް ﷺ ގެ ދޫފުޅުން އެކަންކަންވަނީ ބަޔާންކުރައްވަވައިފައެވެ. ޙަދީޘްފުޅުގައި އޮތީ ދީންވެރި، ތަޤްވާވެރި އަދި އަޚްލާޤް ރަނގަޅުމީހަކު ދަރިފުޅުގެ ކައިވެންޏަށް އެދިގެން އަތުވެއްޖެނަމަ (ބާލިޣްވުމަށްފަހު) އެކަންކޮށްދިނުމަށެވެ. ތަނަވަސްކަމާއި ގެދޮރު ހޯދަންދެން މަޑުކުރާކަށް ނެތެވެ.
ދެން ބަލައިލަން ޖެހޭނީ ކައިވެނިކުރުމުގެ ކުޅަދާނަކަން ލިބިގެންވޭތޯއެވެ.
Narrated `Abdullah:
We were with the Prophet (ﷺ) while we were young and had no wealth. So Allah's Messenger (ﷺ) said, "O young people! Whoever
among you can marry, should marry, because it helps him lower his gaze and guard his modesty (i.e. his private parts from
committing illegal sexual intercourse etc.), and whoever is not able to marry, should fast, as fasting diminishes his sexual power."
ޞަޙީޙް ބުޚާރީ: 5066 މި ޙަދީޘްފުޅުގައި އެވާ ކުޅަދާނަކަމަކީ ކައިވެނީގެ ހަފްލާއަށް ގޮސް އެއްބަސްވުމުގައި ސޮއިކުރުމުގެ ކުޅަދާނަކަމެއް ނޫނެވެ. އަންތބަކު ބެލެހެއްޓުމުގެ ކުޅަދާނަކަމެވެ. އެއީވެސް ލޮލުން ބެލުމުގެ ކުޅަދާނަކަމެއް ނޫނެވެ. އަނބިމީހާގެ އަސާސީ ބޭނުންތައް ފުއްދައިދީ ޚަރަދުކުރުމުގެ ޤާބިލުކަމެވެ. ވީމާ ފިރިމީހާއަކީ ދިރިއުޅެން މަސައްކަތްކުރާ މުރާލި މީހަކަށްވާންޖެހޭނެއެވެ. ނޫންނަމަ ރޯދަހިފުމެވެ. އެއީ ޖިންސީ އެދުންތައް ކުޑަކުރުމަށްޓަކައެވެ.
މިޙަދީޘުން އެނގިގެންދާ އެއްކަމަކީ ކައިވެނިކުރުމަކީ ބެލުންތައް ތިރިކޮށް ޖިންސީ ގުނަވަން ރައްކައުތެރިކޮށްދޭ ކަމެއް ކަމެވެ. ޙަދީޘްފުޅުގައި އޮތީ ދުލާއި ޖިންސީ ގުނަވަން ރައްކައުތެރިކޮށްފި މީހަކަށް ސުވަރުގެ ލިބުމުގައި ތިމަން ރަސޫލާ ﷺ ޖާމިނުވެވަޑައިގަންނަވާނެ ކަމަށެވެ.
ވީމާ ދަރިއަކު ކައިވެނިކުރަން އެދިއްޖެނަމަ މިކަންކަމަށް ސަމާލުކަންދީގެން އަވަހަށް ކައިވެނިކޮށްދޭށެވެ!
--މުފްތީ މެންކުގެ ދަރުސަކުން
