އިންސާނުންގެ މައްޗަށް ޝައިޠާނާގެ ޢަދާވާތްތެރިކަމަށް ޙައްދެއް ނުވެއެވެ. ފަހެ، މީސްތަކުންގެ ކާބޯތަކެއްޗާއި އަދި އެނޫންކަންތައްތަކުގައިވެސް އޭނާ ބައިވެރިވެއެވެ. ފަހެ، އާދަމުގެ ދަރިންގެ ކާތަކެތީގައި ޝައިޠާނާ ބައިވެރިވެއެވެ. ކާން ފަށާއިރު ﷲގެ އިސްމުފުޅު ޛިކުރު ނުކޮށްފިނަމަ އޭނާއާއެކު ކައެވެ. އަދި ކާތަކެތީގެ ތެރެއިން ވެއްޓޭ އެތިކޮޅުވެސް ކައެވެ.
ޞަޙާބީންނާއިއެކު ފަރިއްކުޅުއްވަވަން އިންނަވާފައި ރަސޫލް ހިނިފުޅު ވެޑުވިއެވެ. ސަބަބު ބަޔާންކުރައްވަވައި ދެއްވަވަމުން ޙަދީޘްފުޅުކުރެއްވެވީ މިފަދައިންނެވެ.
"އެތަނުން ޞަޙާބީއަކަށް ފަރިއްކުޅުއްވަވަން ފެށްޓެވުނީ ހަނދުމަފުޅު ނެތިގެން ބިސްމިﷲ ވިދާޅުނުވެވިއެވެ. އެހެންވެ ޝައިޠޯނާ އެ ބޭކަލެއްގެ ތަށިކޮޅުން ކާންފެށިއެވެ. އަދި އެބޭކަލަކަށް ޙަނދުމަފުޅުވެގެން ބިސްމިﷲ ވިދާޅުވުމުން ކެއިތަކެތި ހޮޑުލަމުން ޝައިޠޯނާ ދުވެ ހިނގައްޖެއެވެ."
މިއީ މިހައި މުހިންމު ކަމެއް ނަމަވެސް ގިނަބައަކަށް މިކަމުގައި އިހްމާލްވެވެއެވެ. ޛިކުރްނުކޮށް ކާންފެށެއެވެ.
އަހަރެމެން ކާއިރު ތަށީގެ އަނެއްފަރާތުން ޝައިޠޯނާ ކާތަން އަހަރެމެންނަށް ނުފެންނަނީއެވެ. ނަމަވެސް އޭތި ކައެވެ. ނުކެވޭނީ ޛިކުރުކުރުމަށްފަހު ކާންފެށުމުންނެވެ. މި ބަޔާންކުރި ޙަދީޘްފުޅު ފަދަ ވާހަކަތައް ދަރިންނަށް ކިޔައިދީ ހޭލުންތެރިކުރުވާށެވެ! ކާން ފެށުމުގެ ކުރިން ބިސްމިﷲ ކިޔަން ބުނުމުގެ އިތުރުން މިފަދަ ޙަދީޘްފުޅުތައް ކިޔައިދެވޭނަމަ ކުދިން ދޭ ސަމާލުކަން އިތުރުވާނެއެވެ! އިން ޝާ ﷲ
--އިސްލާމީ ތިލަފަތުގެ ދަރުސަކުން
