ހަނދާންވާގޮތުން އެއީ މީގެ15، 20 ވަރަކަށް އަހަރު ކުރިއެވެ. އެއިރު ވެސް އެނިކުފާނު ހުންނެވީ އިސްލާމީ ކަންތައްތަކާއިބެހޭ އެންމެ މަތީ މަޖިލީހުގެ ރައީސް ކަމުގައެވެ. އެއީ އަޅުގަނޑުގެ ދެ ދަރިން ސީއެޗްއެސްއީ ގައި ކިޔަވަން އުޅުނު ދުވަސްވަރެވެ. ދަރިވަރުން ވަރަށް ލޯބިވާ ޓީޗަރަކު އެދުވަސްވަރު ފުވައްމުލަކު ނެރުތެރޭގައި ކުއްލިގޮތަކަށް ނިޔާވީއެވެ.
ރާޅުބޮޑުވެ ގަލުގައި ޖެހުމުގެ ސަބަބުން މޫނަށްވެސް ވަރަށް ބޮޑެތި އަނިޔާތަކެއް ލިބިފައި ހުރުމުން ހަށިގަނޑު މާލެ ނުގެނެސް ވަޅުލީއެވެ. ބެލެނިވެރިން ބޭނުންވީ އޭނާގެ މައްޗަށް ކަށުނަމާދުކުރާށެވެ. އެކަމަށް އިސްލާމިކް އެފެއާޒްގެ ހުއްދައަށް އެދުމުން ލިބުނީ ބެލެނިވެރިން ވަރަށް ޢަޖައިބުވި ޖަވާބެކެވެ.
"ތިއައީ އަހަރެން މިމަޤާމުގައި ހުރެ އެއްގޮތަކަށްވެސް ދޭނެ ހުއްދައެއް ނޫނެވެ. ރަސޫލް ﷺ ދުވަހަކުވެސް ތިއަ ގޮތަށް ޣައިބަށް ކަށުނަމާދުކުރައްވަވާފައެއް ނުވެއެވެ. އެއް ޤައުމެއްގައި އެކެއްގެ މައްޗަށް ދެފަހަރު ކަށުނަމާދުކުރުމަކީ ކުރެވޭނެ ކަމެއް ނޫނެވެ. އެމީހުން އޭނާ ވަޅުލީ ވަރަށް ފުރިހަމައަށް ކަންކަންކޮށްފައެވެ."
ބެލެނިވެރިންގެ ކަންބޮޑުވުން މައިތިރުކުރަން މަންދޫބެއްގެ ގޮތުން މިހާރުގެ ވަރަށް "މޮޑަރން، މޮޑިފައިޑް ފޯމިޔުލާ" ތަކަށް ދަރުސް ދެއްވާ ޝައިޚަކުވެސް ފޮނުއްވިއެވެ. ދެއްވި އެއްވެސް ފަތުވާއެއް ބެލެނިވެރިން ޤަބޫލެއް ނުކުރިއެވެ.
އެއިރު އަޅުގަނޑަކީ ޕީޓީއޭގެ އިސް މަޤާމެއްގައިމީހެކެވެ. އަޅުގަނޑު ދުއްވައިގަތީ ފެންނަން ހުރި ޙަދީޘްފުޅުތައް ފޮޓޯ ކޮޕީނަގައި އިސްލާމިކް އެފެއާރޒްއަށާއި އެއިރުގެ އެންމެ މަތީ ކޯޓަށާއި ރައީސް އޮފީހަށް ލުމަށެވެ. އަނެއްބައި ބެލެނިވެރިން މަސައްކަތްކުރީ މައްސަލަ ރައީސުލްޖުމްހޫރިއްޔާ އާއި ހަމައަށް އުފުލުމަށެވެ. ބެލެނިވެރިން މަސައްކަތްކުރީ އެބެލެނިވެރިއަކަށް ކުރެވެން އޮތް ކަމެއް ކުރުމަށެވެ. އެގޮތުން ބައެއް ބެލެނިވެރިން ނިންމީ ކުރާކަން ނުއަނގައި ބެލެނިވެރިން މިސްކިތަކަށް އަރައި ކަށުނަމާދުކުރުމަށެވެ.
އެދުވަހު އެއްވެސް ކޮޅެއް ނުފެނުނެވެ. އަނެއް ދުވަހުގެ ހަވީރު 5.30 ހައިއިރެވެ. އަޅުގަނޑުގެ ފޯނަށް ލިބުނީ ފޯން ކޯލެކެވެ. ފޯނުކޯލް ކުރެއްވީ ހަމަ ޝައިޚް މުޙައްމަދު ރަޝީދު އިބްރާހީމްއެވެ. ބަހުގެ ކުދިކުދި ޙަމަލާތަކެއް ބަދަލުކުރެވުނެވެ. އެންމެފަހުން ހަމަ އެމަނިކުފާނު މަޤާމުންވެސް އިސްތިއުފާ ނުދެއްވައި ހަމަ ކުރީ ދުވަހު ހެނދުނު ވެސް ހުންނެވި މަޤާމުތަކުގައި ހުންނަވައިގެން ވިދާޅުވީ އެރޭގެ ޢިޝާނަމާދަށްފަހު ބަންޑާރަ މިސްކިތުގައި ޣައިބަށް ހަމަ އެކަށުނަމާދުކުރަން ހުއްދަ ދެއްވާ ކަމަށެވެ.
ޤަބޫލުކުރެވޭ ގޮތުން ކޮންމެވެސް ހިސާބަކުން އެކަން އޯކޭވުމުން އެމަނިކުފާނުވެސް އޯކޭވީއެވެ. ދީނުގައި އޮތް ޙުކުމެއް ބަދަލުވީއެއް ނޫނެވެ. އެއިގެ ފަހުން އެމަނިކުފާނު ދެއްވަވާ ދީނީ ނަޞޭޙަތްވެސް އަދި ފަތުވާއެއްވެސް އަޅުގަނޑު ޤަބޫލުކުރަމުން މިއަންނަނީ އެއީ އަޅުގަނޑަށް ޔަޤީންނުކުރެވޭ ފަތުވާއެއް ނަމަ އަޅުގަނޑަށް އިތުބާރުުރެވޭ ޝައިޚުންގެ އަރިއަހުން ޔަޤީންކޮށްގެންނެވެ.
މިހާމަކުރި ވާހަކަތަކަށް އެއިރު ސީއެޗްއެސްއީގެ ވެރިންނާއި ޕީޓީއޭގެ މެންބަރުން އެއްބަސްވާނެއެވެ! އަދި މަރްޙޫމްގެ ޢާއިލާވެސް އެއްބަސްވާނެއެވެ.
އެއީ ވަރަށް ހިތް ހެޔޮ ކުދިން ވަރަށް ލޯބިވާ ޓީޗަރެކެވެ. ބެލެނިވެރިންވެސް މެއެވެ. މާތް އެ މަރްޙޫމްގެ ފާފަ ފުއްސަވައި ސުވަރުގޭގެ ދާއިމީ ނިޢްމަތް މިންވަރުކުރައްވަވާށި! އާމީން
