ބަރަކާތްތެރިވެގެންވާ ރަމަޟާންމަހަށް ތައްޔާރުވުމުގެ ގޮތުން ޝަޢްބާންމަހު ކުރަން އޮތް ވަރަށް މުހިންމު 4 ކަމެއް ފާހަގަކޮށްލާނަމެވެ.
ފުރަތަމަކަމަކީ ވީހައި ގިނައިން ރޯދަހިފުމެވެ. ދަލީލަކީ ރަމަޟާން މަސް ފިޔަވައި ރަސޫލް ﷺ އެންމެ ގިނައިން ރޯދަހިއްޕެވީ ޝަޢްބާން މަހުގައިކަމެވެ. ވީމާ އެމަތިވެރި ސުންނަތް ދެމެހެއްޓުމުގެ ގޮތުންވެސް ޝަޢްބާންމަހު ވީހައި ގިނައިން ރޯދަހިފަން މަސައްކަތްްކުރަންވާނެއެވެ.
މީގެ އިތުރުން ބައެއް ޢިލްމުވެރިން ވިދާލުވާ ގޮތުގައި ޝަޢްބާންމަހު ރޯދަހިފުން ގިނަކުރުމަކީ ތިމާ ރަމަމާންމަހަށް ތައްޔާރުވާކަން އަންގައިދޭކަމެކެވެ. އަދި ރަމަޟާންމަހުގެ ބަރަކާތާއި ޘަވާބަށް އެދޭ މިންވަރުވެސް އަންގައިދޭ ކަމެކެވެ. އަދި ރަމަޟާންމަހަށް އަދަބު އިޙްތިރާމް އަދާކުރުމުގެ ގޮތުންވެސް ކުރަން އޮތްކަމެކެވެ.
ދެވަނަކަމަކީ ފާފަކުރުމާއި ދުރުހެލިވުމެވެ.
އަހަރެމެންގެ ތެރެއިން ގިނަ މީހުންނަކީ ކޮންމެވެސް ފާފައެއް ނުވަތަ ފާފަތައް ކުރެވޭބައެކެވެ. ވީމާ ރަމަމާން މަސް ލައިގަތުމުން ފާފަކުރުމާއި ދުރުހެލިވާން މަސައްކަތްކުރުމުން ގިނަބައަކަށް އޮންނަނީ އެކަން ނުކުރެވިފައެވެ.
އެގޮތުން މަސްތުވާތަކެތި ބޭނުންކުރުމާއި ބަނގުރާބުއިމާއި ފާހިޝް ޢަމަލުތައް ކުރުމާއި ޣީބަބުނުމާއި ދޮގުހެދުން ފަދަ ފާފަތައް ފާހަގަކޮށްލަމެވެ. ޝަޢްބާން މަހުން ފެށިގެން އެކަންކަމާއި ދުރުހެލިވާން މަސައްކަތްކޮށްގެން ނޫނީ ސަލާމަތްކަމެއް ނުލިބިދާނެތީ ޝަޢްބާން މަހު އެކަމަށް މަސައްކަތްފަށަންވާނެއެވެ. 3 ވަނަ ކަމަކީ އަޅުކަންކުރުން ގިނަކުރުމެވެ.
ރަމަޟާން މަސް އައުމުން އަޅުކަންކުރުން ގިނަކުރަން މަސައްކަތްކުރާ މީހުންނަށް ދަތި އުނދަގޫތަކެއް ހުންނާނެއެވެ. ވީމާ ފުރަތަމަކަމަކަށް ޖަމާޢަތުގައި ނަމާދުކުރަން މިހާރު ފަރުވާކުޑެވޭ މީހުން އަވަހަށް ޖަމާޢަތުގައި ނަމާދުކުރަން ފަށާށެވެ. ޖަމާޢަތުގައި މިހާރު ނަމާދުކުރާ މީހުން މަސްޖިދު ސުންނަތް ކުރެވޭހައި ވަގުތު ކުރިއަށްލައި މިސްކިތަށް ގޮސް ނަމާދަށް އިންތިޒާރުކުރަން ފަށާށެވެ. ސުންނަތް ނަމާދުތައް ކުރަން އަވަހަށް ފަށާށެވެ. ރޭއަޅުކަންވެސް ކުރެވުނުވަރަކަށް ކުރަން ފަށާށެވެ.
ހަމައެއާއިއެކު ކީރިތި ޤުރްއާން ކިޔެވުން ވެސް ގިނަކުރާށެވެ. ފަރިތަކުރަންފަށާށެވެ. ރަމަޟާންމަހު ވީހައި ގިނައިން ކިޔެވޭނީ އެއިރުންނެވެ. ޛިކުރުކުރުން ގިނަކުރާށެވެ!
4 ވަަނކަމަކީ ޢާއިލާގެ މީހުންނަށާއި ފަޤީރުންނަށް އެހީތެރިވުމެވެ.
ރަމަޟާންމަހަށް އަހަރެމެން ތައްޔާރުވާފަދައިން އެންމެންވެސް ތައްޔާރުވާން ބޭނުންވާނެއެވެ. ނަމަވެސް އެއްވެސް ތަނަވަސްކަމެއް ނެތުމުން ތައްޔާރުވާން އެއްވެސް ނުކުރެވިފައި ތިބި ބައަކުވެސް އުޅޭނެއެވެ. ވީމާ ޞަދަޤާތްކުރުމަކީ ހަމައެކަނި ރަމަޟާންމަހު ކުރާކަމަކަށް ނުހަދާށެވެ. ޝަޢްބާން މަހުވެސް ޢާއިލާގެ މީހުންނަށާއި ފަޤީރުންނަށް އެހީތެރިވެދީ ރަމަޟާން މަހު އެމީހުންނަށް ކަންކަން ފަހިވާނެ ކަމުގެ އުންމީދު ހޯދައިދޭށެވެ.
ޝަޢްބާން މަހަކީވެސް ﷲ ތަޢާލާ ޙުރުމަތްތެރި ކުރެއްވެވި މައްސަރުތަކުގެ ތެރެއިންމަހެކެވެ.
ވީމާ ކުރާ ކޮންމެ އަޅުކަމެއްގައި ބަރަކާތް އިތުރަށް ލެއްވެވިގެންވުމަށް އުންމީދުކުރާށެވެ! ރަޖަބް މަހާއި ޝަޢްބާން މަހުގައި ބަރަކާތް ލެއްވެވުން އެދިވަޑައިގެން ރަސޫލް ﷺ ދުޢާކުރެއްވެވި ކަމަށްވެސް އިމާމް އަޙްމަދުގެ މުސްނަދުގައި އައިސްފައިވެއެވެ. --އިސްލާމީ ތިލަފަތުގެ ދަރުސަކުން
