އިބިލީހަކީ އެންމެ އެއްޗެކެވެ. އެއީ ﷲ ތަޢާލާ ލަޢްނަތްލެއްވެވި އިބިލީހެވެ. ޝައިޠޯނުންނަކީ އިބިލީހަށް އެހީތެރިވެ ވާގިވެރިވެދޭ ކޮންމެ އެއްޗެކެވެ. އެއިގެ ތެރޭގައި ޖިންނިންނާއި އިންސާނުން ވެސް ހިމެނިގެންވެއެވެ.
އެކަން ކީރިތި ޤުރްއާނުން އެނގެން އެބައޮތެވެ.
"ފިލައި ހުރެ ވަސްވާސްދޭ ޝައިޠޯނުންގެ ނުބައިކަމުންނެވެ. (އެބަހީ: ޝަޠޯނުންގެ ނުބައިކަމުން ﷲ ތަޢާލާގެ ޙަޟްރަތުން ރައްކައުތެރިކަން ލިބިގަންނަމުއެވެ." (އައްނާސް: 4)
"އެ (ޝައިޠޯނާ) އީ މީސްތަކުންގެ ހިތުގައި ވސްވާސް އުފައްދާ ޝައިޠޯނާއެވެ." (އައްނާސް: 5)
"ޖިންނީންގެތެރެއިންނާއި، އިންސާނުންގެ ތެރެއިންވާ ޝައިޠޯނުންނެވެ." (އައްނާސް: 6)
މީސްތަކުން ﷲ ތަޢާލާގެ ދިނާއި ދުރުކޮށް ނުބައި ވަސްވާސްދީ ފާފަތައް ކުރުވަން މަސައްކަތްކުރާ ކޮންމެ މީހަކުވެސް ވަނީ ހަމަ ޝައިޠޯނުންގެ ތެރެއިންނެވެ. އެމީހަކީ އިބިލީހުގެ ވާގިވެރިންނެވެ.
"އޭ އީމާންވެއްޖެ މީސްތަކުންނޭވެ! ތިއަބައިމީހުން އެންމެން ކިޔަމަންވުމުގެ ތެރެއަށް (އެބަހީ: އިސްލާމް ދީނަށް) ވަންނާށެވެ! އަދި ޝައިޠޯނާގެ ފިޔަވަޅުތަކަށް ތިއަބައިމީހުން ތަބަޢަނުވާށެވެ! އެހެނީ، އެ ޝައިޠޯނާއަކީ ތިއަބައިމީހުންނަށް ހުރި ބަޔާންވެގެންވާ ޢަދުއްވެކެވެ." (އަލްބަޤަރާ: 208)
މީސްތަކުން މަގުފުރައްދައި ނަމާދާއި އެހެނިހެން އަޅުކަން ކުރަން ހުރަސްއަޅާ މީހުންނަކީ ﷲ ތަޢާލާގެ ޢަދުއްވުން ަކަމަށް ބުނެވެނީ މި ސަބަބަށްޓަކައެވެ. މިއާޔަތުގައި އެގޮތަށް ވަޙީބަސްފުޅު އޮތުމުންނެވެ.
--އިސްލާމީ ތިލަފަތުގެ ދަރުސަކުން
