މިސްކިތްތަކުގެ ތާޅަފިލިން ނަމާދުގެ ކުރިން އަންގާ އެންގުންތަކަށް ގަދަކަމުން ޢަމަލުކުރުވަން ބައެއް މުދިމުން ކުރާ މަސައްކަތުގެ ތެރެއިން ބައެއް މުދިމުންގެ ބަސްމަގު ހުންނަ ގޮތުން ހިތްހަމަނުޖެހިގެން ބައެއް މީހުން ވަނީ އެފަދަ މިސްކިތްތަކަށް އެރުން ހުއްޓާލައިފައެވެ.
"ކަލޭމެންނަކީ ކުޑަކުދިންތަ؟ ކޮންމެ ފަހަރަކު މުސައްލަ ހިފައިގެން އަންނަން މިބުނަނީ އަހަރެން އަމިއްލަ ބުނުމެއް ނޫނޭ! މިވަރަށް ބުނާއިރު ވެސް އަޑު ނީވެނީތަ؟" ނަމާދަށް ފަށަމުން ބައެއް މުދިމުން މިފަދަ ބަސްތައް ބުނާކަމުގެ ޝަކުވާތައް ދަނީ ލިބެމުންނެވެ.
މިފަދަ ކަންބޮޑުވުންތައް ފައުޅުކުރި ބައަކު ބުނެފައިވަނީ އެމީހުން ދިރިއުޅޭ ގެއާއި އެންމެ ކައިރީގައި ހުންނަ މިސްކިތުގެ މުދިމުން މިފަދަ ހަރުކަށިބަސްތައް ބޭނުންކުރާތީ އެމިސްކިތަށް މިހާރު އެމީހުން ނަމާދަށް ނާރާކަމަށެވެ. އުނދަގޫ ނަމަވެސް ދަނީ ދުރުގައި ހުންނަ މިސްކިތްތަކަށް ކަމަށެވެ.
ބައެއް މުދިމުން މިފަދަ ބަސްތައް ބޭނުންކުރިނަމަވެސް ގިނަ މުދިމުންނަށް ތަޢްރީފް ޙައްޤެވެ. ގިނައީ ނަމާދަށް ފަށާއިރު މުސައްލައިގެ ވާހަކަ ނުދައްކާ މުދިމުންނެވެ.
ގިނަ ބައަކު ޤަބޫލުކުރާ ގޮތުގައި މުސައްލަ ހިފައިގެން މިސްކިތަށް ދާން ހަނދާންކޮށްދިނުމަކީ ނަމާދު ފަށަމުން ކުރަންޖެހޭނެ ކަމެއް ނޫނެވެ. އެއިރު އެންމެންވެސް ގޮސް ތިބޭނީ މުސައްލަ ހިފައިގެން ނުވަތަ މުސައްލަ ނުލައެވެ. ނުލައި ގޮސްތިބި މީހުން އެތިބެނީ ނަމާދުގެ ކުރިން ގޮވާ ގޮވުން އަޑުއެހުމަށްފަހުގައެވެ. އަދި ނަމާދަށް ފަށަމުން މުސައްލަ ނުގެންދާތީ ކިތަންމެ ވަރަކަށް އެއްޗެތި ގޮވިނަމަވެސް ފައިބައިގެން މުސައްލަ ބަލާ އެއްވެސް މީހަކު ނުދާނެތީއެވެ.
ގިނަ މީހުން މުސައްލަ ނުގެންދަނީ ކޮރޯނާ ހުރިތަނެއްގައި މުސައްލަ އަޅާފައި އެ މުސައްލަ ހިފައިގެން ގެއަށް ދިއުމުން މުސައްލަ އާއިއެކުގައި ކޮރޯނާ ގެއަށް ގެންދެވޭ ކަމަށާއި ނަމާދުކުރާ ކޮންމެފަހަރަކު ގެއަށް ގޮސް މުސައްލަ ޑިސްއިންފެކްޓް ނުކުރޭވޭނެ ކަމަށް ޤަބޫލުކުރާތީކަން ފާހަގަކުރެވެއެވެ.
މިސްކިތްތަކަށް އެންމެ މުހިންމީ ކޮންމެ ނަމާދަކަށްފަހު މިސްކިތް ޑިސްއިންފެކްޓްކުރުމެވެ. އެގޮތަށް ޑިސްއިންފެކްޓްކުރާ ބައެއް މިސްކިތްތައް މިހާރުވެސް އެބަހުއްޓެވެ. ނަމަވެސް އެއީ އަމިއްލަ ގޮތުން ބަލަހައްޓާ މިސްކިތްތައްކަން ފާހަގަކުރެވެއެވެ. ޑިސްއިންފެކްޓްކުރަން އޮންނަ ގޮތަށް ޑިސްއިންފެކްޓް ކުރެވޭނަމަ ދޫލަ އޮތުމަކީ ވެސް އެއްވެސް މައްސަލައެއް ނޫންކަން ޖަލާލުއްދީން މިސްކިތާއި ހީނާމާގޭ ކައިރީ މިސްކިތުން މިވަނީ ތަޖުރިބާ ކުރެވި ނިމިފައެވެ. އެ ދެ މިސްކިތުން ދޫލަ ނަގާފައެއް ނުވެއެވެ.
