ފަތިސް ނަމާދު ވެސް ހިމެނޭ ގޮތަށް ކޮންމެ ނަމާދެއްގެ ޖަމާޢަތުން އުމުރުން 10 ވަރަކަށް އަހަރުގެ ކުޑަކުއްޖަކާއި ބައްދަލުވެއެވެ. މަހެއްހައި ދުވަހު އެކުއްޖާ އާއި ކޮންމެ ނަމާދެއްގައިހެން ބައްދަލުވުމުން އެކުއްޖާ އަޅުގަނޑަށް ފާހަގަކުރެވި އޭނާއާއި ގާތް ގުޅުމެއް އުފެއްދީމެވެ.
އެކުއްޖާ ބުނީ ކޮންމެރެއަކުވެސް ލަސްވެގެން 4 ޖަހާއިރު ނިދިން ހޭލެވޭ ކަމަށެވެ. ހޭލެވުމުން ފުރަތަމަ ކަމަކަށް ކުރާ ކަމަކީ ފާޚާނާއަށްވަދެ ދަތް އުނގުޅައި މޫނު ދޮވެލައި ހަދައިގެން ނުކުމެ އަމިއްލަ އަށް ކަރަންޓްކުރައިން ފެން ހޫނުކޮށްގެން ސައިތަށްޓެއް ބުއިން ކަމަށެވެ.
"ދެން އަޅުގަނޑު ވުޟޫކުރަނީ. ވުޟޫކޮށްގެން 2 ރަކްޢަތް ނަމާދެއް ގޭގައި ކުރަނީ. ނަމާދުކޮށްގެން ފަތިސް ނަމާދަށް ބަންގި ގޮވަންދެން ޤުރްއާން ކިޔަވަން އިންނަނީ. ބައެއް ރޭރޭ ފިލާވަޅުވެސް ދަސްކުރަން. ބަންގިގޮވީމާ މިސްކިތަށް ދަނީ."
"މިއީ އަޅުގަނޑުގެ މަންމަ އާ ބައްޕަ އަޅުގަނޑަށް ދަސްކޮށްދިން ގޮތް. މިހާރު މިއަންނަނީ އެކަނި. އެއީ ބައްޕަ ނިޔާވީމަ. ބައްޕަ ހުރިއިރު ބައްޕައާއެކު އަންނަނީ. ދެން މަންމަ ގެނެސްދިނީ. މިހާރު މަންމަ ވަރަށް ބަލި. އެހެންވެ މަންމައަށް ނުހޭލެވެނީ ބޭސްކައިގެން ނިދާތީ. އެކަމަކު އަޅުގަނޑު ނަމާދު ނިމިގެން ގޮސް ވަރަށް މަޑުމަޑުން ގޮވައިލީމަވެސް މަންމައަށް ހޭލެވޭނެ. މަންމަވެސް ފަތިސް ނަމާދުކުރާނެ!"
"އަޅުގަނޑުގެ އަންހެން ކޮއްކޮއަކާ ފިރިހެން ކޮއްކޮއެއް އެބަ ތިބި. ފިރިހެން ކޮއްކޮއަށް އަދިމީ 5 އަހަރު. އެކޮއްކޮއަށް 7 އަަހަރުވީމާ މިސްކިތުގެ ޖަމާއަތަށް ގެންދަން ބައްޕަ އޮތީ އަޅުގަނޑަށް ވަޞިއްޔަތްކޮށްފަ! އިރާދަކުރެއްވިއްޔާ އެކަން އަޅުގަނޑު ކުރާނަން. މިހާރުވެސް ބައެއް ނަމާދަށް މިސްކިތަށް ގެންނަން!"
މިވާހަކަތައް އަޑު އިވިފައި ލިބުނު އުފަލުގެ ބޮޑުކަން ބުނެދޭކަށް ނުއެނގެއެވެ. އެންމެ ފުރަތަމަ ގަތީ ލަދެވެ. އެއީ އަޅުގަނޑުގެ ދަރިން އެގޮތަށް ތަރުބިއްޔަތު ނުކުރެވުނީތީއެވެ. ދެން ގަތީ ބިރެވެ! އެއީ މާތް ﷲ ގެ ޙަޟްރަތުގައި ހުއްޓި ހުންނަން ޖެހޭނެ ދުވަހު ދޭނެ ޖަވާބެއް ނެތުމުންނެވެ.
ކުޑަކުޑަ ހިތްހަމަޖެހުމެއް ލިބުނީ އަޅުގަނޑުގެ 5 ދަރިންނަކީވެސް ނަމާދުކުރާ ދަރިން ކަމުގައިވާތީއެވެ! މިޒަމާނުގެ ބަލި ޖެހިފައި ހުރި ދަރިއަކު ނެތުމުންނެވެ!
- މިއަދުނޫހުގެ ކިޔުންތެރިއެއް
