އެއް ރެއެއްގެ 11 ޖަހައި އެހައިކަންހާއިރެވެ. އަޙްމަދު އޮތީ އޭނާގެ ދެވަނަ އަނބިމީހާ އާއިއެކުގައި އޮށޯވެލައިގެން ސޯފާގައެވެ. އަޙްމަދު އޮތް ގޮތުން އަނބިމީހާ ހީކުރީ އަޙްމަދަށް އޮތީ ނިދިފައި ކަމަށެވެ.
ނިދީން ހޭލެވިގެން އެވަގުތު އަޙްމަދުގެ އުމުރުން 4 އަހަރުގެ ދަރިފުޅު އެތަނަށް އައެވެ.
"ކީއްކުރަން ތިއަ އައީ! އަހަރެން ލައްވައި ފިރުމަންތަ! ނުވާނެ ތިއަ ކަމެއް!" ދޮން މަންމް ބުނެލިއެވެ.
އެވަގުތު ދަރިފުޅަށް ގިސްލާ ރޮވެން ފެށިއެވެ. ރޮމުން ބުންޏެވެ! "މިއައީ ބައްޕަ މިތަނުގަ އޮތީމަ!"
"ބަލަ ބައްޕައަށް އެއޮތީ ނިދިފައޭ! ދުވާލު ހަތަރުދަމު މަސައްކަތްކޮށްފަ އައިސް އޮށޯވެލާ ވަގުތު ޖެހޭތަ އުނދަގޫކުރަން! ދޭ! ހަމަ މިހާރު ދޭ! ގޮސް އޮށޯވެ ނިދާ!"
އަޙްމަދަކަށް ކެތެއް ނުކުރެވުނެވެ. ތެދުވެ ދަރިފުޅު އުރާލައިގެން ދިއައީ އަޙްމަދުގެ ކޮޓަރިއަށެވެ. އަދި އެނދުގައި ދަރިފުޅު ގޮވައިގެން އޮށޯވެ ދަރިފުޅު ހިތްހަމަޖައްސައިދޭން މަސައްކަތްކުރިއެވެ.
އެވަގުތު އަނބިމީހާ ކޮޓަރިއަށް އައުމުން ބުންޏެވެ. "ފުދިއްޖެއެވެ! ހެދުން ބަދަލުކޮށްލައިގެން ގޮސް ސޯފާގައި މިރޭ ނިދައިލާށެވެ! ހެނދުނުން ގެއަށް ގެންގޮސްދޭނަމެވެ. މިއެނދުގައި ނިދުން ދެން ނިމުނީއެވެ!"
އަހްމަދަށް ވިސްނުނެވެ. "ދަރިންނަށް ހަމަ ބޭނުންވާނީ އެކުދިންގެ މަންމައެވެ. ރީތި އަނބިމީހާގެ ލިބައިން ލިބޭ ހިތްހަމަޖެހުމަކީ ދަރިންނަށް އެމީހުންގެ ކިބައިން ލިބޭ އަނިޔާ އާއި އަޅާބަލައިފިނަމަ އެއްވެސް އެއްޗެއް ނޫނެވެ. ދަރިންގެ ހިތް ކަތިލާފައި ހޯދާ އުފާ ޒަހަރަށްވުރެ ހިތިވާނެއެވެ."
ޖެހިގެން އައި ދުވަހަކީ ދެވަނަ ފަހަރަށް ދަރިންގެ މަންމަ އާއި ދެވަނަ ފަހަރަށް ކައިވެނިކޮށްގެން ގެއަށް ގެނައި ދުވަހެވެ.
އާދޭހަކީ ދަރިންގެ މަންމަ އެއްލައިލާއިރު ދަރިންނަށް ކުރިމަތިވެދާނެ ކަންކަމަށް ވިސްނައިލުމެވެ. އަދި ކޮންމެވެސް ވަރެއްގެ ޤުރްބާނީއެއް ވެލައިގެން ނަމަވެސް ދަރިންގެ މަންމަ ޢާއިއެކުގައި ދިރިއުލެން މަސައްކަތްކުރުމެވެ. ދަރިންނަށް ލޯބި ދޭނެ ދޮންމަންމައިންވެސް ތިބޭނެއެވެ. ނަމަވެސް އެއީ މަދުބައެކެވެ!
- މިއަދުނޫހުގެ ކިޔުންތެރިއެއް
