އަހަރެން މިވާހަކަ މިދައްކަނީ އެއްވެސް ޙަދީޘްފުޅަކުން ނުވަތަ އެނޫންވެސް އެފަދަ ގޮތަކުން ފެންނަން އޮވެގެނެއް ނޫނެވެ! ނަމަވެސް ގިނަބައަކު ކިޔައިދީފައިވާ އެމީހުންގެ ތަޖުރިބާތަކުގެ އަލީގައެވެ. ވީމާ މިކަމުގައި އިތުރަށް ބުނާނެ ވާހަކައެއް ނެތެވެ. އިންސާނުންނަށް ކުރެވޭ ތަޖުރިބާއަކީވެސް ހަމަ މުހިންމު އެއްޗެކެވެ.
ދަމުނަމާދުކޮށް ކަންކަމަށް އެދި ދުޢާކުރާ މީހުންގެ ތެރެއިން ވަރަށް މަދު މީހަކު ނޫނީ ބުނެފައިވަނީ އެމީޙުން ކުރާ ދުޢާ ޢިޖާބަ ވަރަށް އަވަހަށް ޢިޖާބަކުރައްވަވާ ކަމަށެވެ. އަދި ގިނަ މީހުން ބުނަނީ 40 ހަމަވުމުގެ ކުރިން ރަނގަޅު ގޮތްތައް މެދުވެރިވާ ކަމަށެވެ. ރަނގަޅު ޙައްލެއް ލިބިގެންދާ ކަމަށެވެ.
ދަމުނަމާދަކީ ސުންނަތް ނަމާދުތަކުގެ ތެރެއިން އެންމެ މަތިވެރި ނަމާދެވެ! ދަމުނަމާދުކުރަންވާނީ ދުޢާކުރުމުގެ ބޭނުމަކު ނޫނެވެ. އެއީ އެންމެ މަތިވެރިކަން ބޮޑު ސުންނަތް ނަމާދުކަމުގައިވީތީއެވެ! ދަމުނަމާދުކުރުމަށްފަހު ދުޢާކޮށް އެމީހަކު ބޭނުން ކަމަކަށް އެދި ދެންނެވުމަކީ ތަފާތު ކަމެކެވެ.
ވީމާ މިކަން ހިތުގައި ބާއްވައިގެން ނިކަން ދަމުނަމާދުކޮށް ދުޢާކުރަން ފަށައިބަލާށެވެ! އަދި ބޭނުންވާ ކަންކަން ޙާޞިލުކުރެވުމުންވެސް ދަމުނަމާދުކުރުން ހުއްޓާނުލައި ކުރަމުން ގެންގޮސްބަލާށެވެ! އެކަމުން ޙަޔާތަށް ލިބޭ ކުރިއެރުން ނިކަން ތަޖުރިބާކޮށްލައިބަލާށެވެ!
- އިސްލާމީ ތިލަފަތުގެ ދަރުސަކުން
