ފުރަތަމަ ކަމަކަށް ކުޑަކުޑަ ޢިބްރަތްތެރި ވާހަކައެއް ކިޔައިދޭނަމެވެ. ދެމީހަކު ޒުވާބުކުރަނީއެވެ. އެކަކު މިބުނަނީ ވިނައިގެ ކުލައަކީ ފެހިކުލަކަމަށެވެ. އަނެކަކު މިބުނަނީ ވިނައިގެ ކުލައަކީ ރަތްކުލަކަމަށެވެ.
ގަދައަށް ޒުވާބުކުރުމަށްފަހު ތެދީ ކާކުގެ ބަސްކަން ބެލުމަށް ރަސްގެފާނުގެ އަރިހަށް ގޮސް މައްސަލަ ހުށަހެޅުމުން ރަސްގެފާނު އަމުރުކުރެއްވީ ވިނައިގެ ކުލައަކީ ފެހިކުލަކަމަށްބުނާ މީހާ އެއްމަސްދުވަހަށް ޖަލަށްލުމަށެވެ.
އޭނާ ޖަލުގައި ހުއްޓައި ރަސްގެފާނު ވަޑައިގެން ބައްދަލުކުރެއްވުމުން ސުވާލުކުރިއެވެ. "ރަސްގެފާނުއެވެ! ވިނައިގެ ކުލައަކީ ފެހިކުލަ ނޫންތޯއެވެ؟" ޖަވާބުގައި ރަސްގެފާނު ވިދާޅުވީ ވިނައިގެ ކުލައަކީ ފެހިކުލަކަމަށެވެ.
"ދެން އެހެންވީއިރު އަޅުގަނޑު ޖަލުގައި ބަންދުކުރެއްވީ ކިއްވެގެންތޯ؟" ސުވާލުކުރުމުން ރަސްގެފާނު ވިދާޅުވިއެވެ. "ޙަޤީޤަތް ޤަބޫލުނުކުރާ މީހަކާ ޒުވާބުކުރީތީއެވެ. އެފަދަ މީހުންނާ ޒުވާބުކޮށްގެންނުވާނެއެވެ! ޙަދީޘްފުޅުގައި އޮތީ ތިމާ ހުރީ ޙައްޤުގައި ނަމަވެސް ޒުވާބުކުރުން ހުއްޓައިލި މީހަކަށް ސުވަރުގެއިން ގަނޑުވަރެއް ލިބޭނެ ކަމަށް ނޫންހެއްޔެވެ؟"
އަހަރެމެންގެ ތެރެއިން ބައެއް މީހުންނަކީ ހަރުކަށި، ގޮތް ދޫނުކުރާ އަދި ރުޅި ކޮންޓްރޯލް ނުކުރެވޭ ބައެކެވެ. މިފަދަ ކަންކަން މީހުންނަށް ކުރިމަތިވާ ސަބަބަށް ވިސްނައިލުމުން އެނގޭ އެންމެ ޢާންމު ސަބަބަކީ މިފަދަ މީހުންނަކީ ވަރަށް ގިނައިން އަރައިރުންވެ ޒުވާބުކުރާ މީހުން ކަމެވެ.
މިކަން މިހެންވުމަށް މެދުވެރިވާ ސަބަބަކީ ގިނައިން ދެބަސްވެ ޒުވާބުކުރުމަކީ ހިތް ހަރުވާ ކަމެއް ކަމެވެ. ހިތް ހަރުވުމުން އެހެން މީހުންގެ އިޙްޞާޞްތައް ދެނެގަންނަން ފަސޭހައެއް ނުވާނެއެވެ. އެހެން މީހުންނަށް ހަމްދަރުދީއެއް ނުވެވޭނެއެވެ. މީގެ އިތުރުން މީގެ އިތުރުން އެމީހެއްގެ ހިތުން ރަޙޫމްކުރުން ގެއްލި އަމިއްލަ ނަފްސަށްވެސް ރަޙުމް ނުކުރެވޭ ޙާލަތަށް ކަންކަން ދާނެއެވެ. ބައެއް މީހުންނަށް ރުޅި އާދެވުމުން އެމީހުންގެ އަމިއްލަ ނަފްސަށް ގެއްލުންލިބޭ ފަދަ ކަންކަން ކުރެވޭ ސަބަބަކީވެސް އެއީއެވެ.
މިޙާލަތުން ސަލާމަތްވުމަށް އެދޭ މީހާ ކުރަން އޮތް އެންމެ މުހިންމު އެއްކަމަކީ އަމިއްލަ ގޭގައިވެސް ޒުވާބު ނުކުރުމެވެ. ދެމަފިރިންވެސް ދެބަސްވެ ޒުވާބުނުކުރުމެވެ. ޒުވާބުކުރަންޖެހޭ ޙާލަތެއް ކުރިމަތިވެއްޖެނަމަ އަވަހަށް އެތަނަކުން ދުރަށްދާށެވެ! ޒުވާބު ނުކުރުމުން ދުނިޔެއާއި އާޚިރަތުގައި ލިބެން އޮތް ބޮޑު ފައިދާ ޙާޞިލުކުރާށެވެ!
- އިސްލާމީ ތިލަފަތުގެ ދަރުސަކުން
