ރަމަޟާން މަހުގެ ފަހު ދިހައެއްގައި ސަރުކާރު ބަންދުވިނަމަވެސް، ރައްޔިތުންނަށް ކޮންމެހެން ފޯރުކޮށްދޭންޖެހޭ އަސާސީ ޚިދުމަތްތައް ސަރުކާރު އިދާރާތަކުން ފޯރުކޮށްދެއްވުމަށް ސަރުކާރުގެ މުއައްސަސާތަކާއި ކުންފުނިތަކަށް ރައީސުލްޖުމްހޫރިއްޔާގެ އޮފީހުން އަންގަވައިފިއެވެ.
ރައީސް އޮފީހުން ނެރުއްވި ދެންނެވުމުގައި ވިދާޅުވީ ރަމަޟާންމަހުގެ ފަހު ދިހައެއްގައި ސަރުކާރު ބަންދުކުރެއްވިނަމަވެސް ރައްޔިތުންނަށް ކޮންމެހެން ދޭންޖެހޭ ޚިދުމަތްތައް، ކަނޑައަޅާ އުސޫލެއްގެ މަތިން ރައްޔިތުންނަށް ފޯރުކޮށްދެވުމަށް ސަރުކާރުގެ މުއައްސަސާތަކާއި ކުންފުނިތަކާއި އިދާރާތަކުން އަންގަވާފައިވާކަމަށެވެ.
ރައީސް އޮފީހުގެ ދެންނެވުމުގައި ވިދާޅުވީ ރައްޔިތުންނަށް ކޮންމެހެން ބޭނުންވާ އަސާސީ އެކި ޚިދުމަތްތައް ފޯރުކޮށްދެއްވަމުން ގެންދަވާ ސަރުކާރުގެ މުއައްސަސާތަކާއި ކުންފުނިތަކާއި ރައީސް އޮފީޙުން ބައްދަލުކޮށްފައިވާކަމަށެވެ. އަދި ރަމަޟާންމަހުގެ ފަހު ދިހައެއްގައި ސަރުކާރު ބަންދުވާ ދުވަސްތަކުގައި އިދާރާތަކުން ޚިދުމަތްތައް ދެއްވުމުގައި ހަމަޖައްސަވަންޖެހޭ އިންތިޒާމުތައް ހަމަޖެއްސެވުމާއި ގުޅޭގޮތުން މަޝްވަރާކުކުރެއްވިކަމަށްވެސް ދެންނެވުމުގައިވެއެވެ.
މި މަޝްވަރާގައި ރޯދަމަހުގެ ފަހު ދިހައެއްގައި ސަރުކާރުން ރައްޔިތުންނަށް ޚިދުމަތްތައް ފޯރުކޮށްދެއްވުމަށް ހަމަޖެހިފައިވާ ގޮތުގެ މައުލޫމާތު އެކި ވަސީލަތްތައް މެދުވެރިކުރައްވައި، ރައްޔިތުންނަށް ވީހާވެސް ބޮޑަކަށް ސާފުކޮށްދެއްވުމަށް އަންގަވާފައިވާކަމަށް ރައީސް އޮފީހުގެ ދެންނެވުމުގައިވެއެވެ. އަދި އެ މަޢުލޫމާތު ރައީސުލްޖުމްހޫރިއްޔާގެ އޮފީހާ ޙިއްޞާކޮށްދެއްވުމަށްވެސް މި ބައްދަލުވުމުގައި އެދިވަޑައިގެންފައިވާކަމަށްވެސް އެ ދެންނެވުމުގައިވެއެވެ.
