މީސްތަކުން މިއަދު އެންމެ ބޮޑަށް ޣާފިލުވެފައިވާ އެއްކަމަކީ މަރުހަނދާންކުރުމެވެ. ކޮންމެ ވަޤުތަކުވެސް ތިމާ މަރުވެދާނެކަމަށް ވިސްނައި އެކަމަށް ތައްޔާރުވެގެން ހުރުމެވެ. ހަމައެއާއިއެކު ޖަނާޒާތަކުގައި ބައިވެރިވުމަށްވެސް ގިނަ ބއަކު ފަރުވާކުޑަކުރެއެވެ. އެއީ އުހުދުފަރުބަދައިގެ 2 ފަރުބަދަހައި ގިނަ ޘަވާބު ދެއްވަވާ ކަމެއް ނަމަވެސް އެމީހެއްގެ ގާތް މީހަކު މަރުވުމުން ނޫނީ ޖަނާޒާތަކުގައި ބައިވެރިވަނީ މަދު މީހެކެވެ. ވީމާ ވިސްނާށެވެ!
އެއްދުވަހަކު ޞަޙާބީންނާއިއެކުގައި ހުންނަވަނިކޮށް ބައަކު އެއްވެގެން އުޅޭތަން ފެނިވަޑައިގަތުމުން އެއީ ކޮންކަމަކު އެއްވެގެން އުޅޭ ބައަކުތޯ ރަސޫލް ﷺ ސުވާލުކުރެއްވެވިއެވެ. ޖަވާބުގައި އެއީ މީހަކު މަރުވެގެން ވަޅުލަން އުޅޭ ބައަކު ކަމުގައި ދެންނެވުމުން ހިންގަވައިވަޑައިގަތީއެއް ނޫނެވެ. ދުވެވަޑައިގެންނެވެނީއެވެ.
އެތަނުގައި ދެކަކޫ ބިންމަތީގައި ޖައްސަވައިގެން އިންނަވައި ލޯފުޅުން ފޭބި ކަރުނަފޮދުން ބިންގަނޑު ތެމިގެންދާވަރަށް ކީރިތިކުރެއްވެވުމަށްފަހު ޙަދީޘްފުޅު ކުރެއްވެވިއެވެ. "ތައްޔާރުވާންވީ މިކަމަށެވެ." އެގޮތަށް 3 ފަހަރު ތަކުރާރުކުރެއްވެވިއެވެ.
ނިކަން ވިސްނައިލަބަލާށެވެ! މީހެއްގެ ލޮލުން ފައިބާ ކަރުނައިން ތުނބުޅި ތެމި ބިމަށް ކަރުފައިބައި ބިންގަނޑު ތެމޭނީ މީހަކަށް ކިހައިވަރަކަށް ރޮވުމުންނެވެ. ކިހައި ގިނަ ކަރުތަކެއް އޮހޮރުމުން ހެއްޔެވެ؟ މިބަޔާންކުރީ އެހައި ބޮޑަށް ރަސޫލް ﷺ ކީރިތި ކުރައްވަވައި ކަރުނަފޮދު އެޅުއްވެވި ވާހަކައެވެ.
ދެން ނިކަން ވިސްނައިލަބަލާށެވެ! އެކަމަކަށް ސަމާލުކަންދީ ތައްޔާރަށް ތިބެން ވިދިވިދިގެން ރަސޫލް ﷺ 3 ފަހަރަށް ކަމެއްގެ ވާހަކަ ޙަދީޘްފުޅު ކުރައްވަވާނީ އެއީ ކިހައި މުހިންމުކަން ބޮޑު ކަމަކަށްވުމުން ހެއްޔެވެ؟
މިބަޔާންކުރީ އަހަރެމެން ތައްޔާރުވާން ސަމާލުކަންދޭންޖެހޭ މިންވަރެވެ. މިވާހަކަ ކިތަންމެ ދިގުކޮށްވެސް ދެއްކިދާނެއެވެ. ވިސްނޭނީ އެމީހަކު އެކަމަށް ސަމާލުކަން ދިނީމައެވެ. ވިސްނައި ފިކުރުކުރާ މީހަކަށް މިވަރުންވެސް ފުދޭނެއެވެ.
- ޝައިޚް ޢަބްދުލްމަޖީދު މަޙްމޫދުގެ ދަރުސަކުން
