ތިބާގެ ކިތަންމެ ގާތް މީހަކަށް ނަމަވެސް މާގިނައިން ފޯނުކުރަން ފަށައިފިނަމަ ޖަވާބުދިނުން ހުއްޓައިލާނެއެވެ. ފޫހިވެ ގިނަ ފަހަރު ނަމްބަރު ސައިލެންޓްކުރުވުން ފަދަ ކަންކަންވެސް ކުރާނެއެވެ. ނޫންނަމަ ގުޅާއިރަށް ނުބައި މެސެޖެއް ލިބޭނެ ގޮތް ހަދާނެއެވެ.
ނަމަވެސް ﷲ ތަޢާލާގެ ޙަޟްރަތުގައި މިކަން މުޅިން ތަފާތެވެ! ކަންކަމުގައި ގިނައިން ދެންނެވިވަރަކަށް އެމީހަކު ދެކެ ބޮޑަށް ލޯބިވެވޮޑިގަންނަވަނީއެވެ. އެމީހަކަށް ރުހިވޮޑިގަންނަވަނީއެވެ. އެމީހެއްގެ ދަރަޖަ މަތިވެރިކުރައްވަވަނީއެވެ.
ވިސްނައި ފިކުރުކުރާށެވެ! އެނގިގެން މިދަނީ އަހުރެމެން އިންސާނުން ދެކެ ﷲ ތަޢާލާ ލޯބިވެވޮޑިގަންނަވާ މިންވަރެވެ. އެކަމަކުވެސް ގިނަ ބައަކު ޢަމަލުކުރަނީ އެންމެ ނުބައިކޮށެވެ. އެކުވެރިންނަށް ވަޤުތުދޭންވެގެން ނަމާދުވެސް އަޅަނީއެވެ. ކުރަންޖެހޭ އެހެންވެސް އަޅުކަން ނުކުރަނީއެވެ.
ހަމައެކަނި ދެންމެ މިބުނި ކުޑަކުޑަ ވާހަކަކޮޅަށް ބަލާފައިވެސް ނިކަން ބުނެބަލާށެވެ! ވަޤުތުދޭންވީ އެކުވެރިންނަށް ހެއްޔެވެ؟ ﷲ ތަޢާލާއަށް ހެއްޔެވެ؟
އަދިވެސް ވިސްނައިލާށެވެ! ތިމާގެ ދިރިއުޅުމަށް ނުވަތަ އާޚިރަތަށް ފައިދާނުކުރާނެ ކަންކަމުގައި ވަޤުތުހޭދަކުރުމަކީ ލިބިގަނެވޭ ބޮޑުގެއްލުމެކެވެ. އަޅުކަމުގައި ވަޤުތު ހޭދަކުރުމަކީ އެމީހެއްގެ ދުނިޔެއާއި އާޚިރަތަށްވެސް ފައިދާކުރާނެ ކަމެކެވެ. ސުވަރުގެ ޙާޞިލުކުރެވޭނީ މިކަންކަމަށް ވިސްނައި ފިކުރުކޮށް އަދި ޢަމަލުވެސް ކުރިވަރަކުންނެވެ!
- އިސްލާމީ ތިލަފަތުގެ ދަރުސަކުން
