ކޮންމެ ކަމެއްވެސް ހިތަށް ވަންދަން އަދި ޤަބޫލުކޮށް ޢަމަލުކުރަން ފަށަން ފަސޭހަވާނީ އެކަމެއް ތަޖުރިބާކުރާ މީހުންގެ ތަޖުރިބާއިންނެވެ. ވީމާ ފަށާނީ ކުޑަ ވާހަކައަކުންނެވެ. އޭނާއަކީ ޒުވާނެކެވެ. ކޮންމެ ރެއަކުވެސް ޢިޝާނަމާދަށްފަހު ވިތުރީގެ 2 ރަކްއަތް ކުރެއެވެ. 3 ވަނަ ރަކްޢަތް ބާއްވަނީ ފަހުން ކުރުމަށެވެ. ނިދަންވުމުން ނުވަތަ ދަންވަރު ހޭލައިގެން ކުރުމަށެވެ.
ދެންވާގޮތަކީ ނިދިއަންނަނީއެވެ. ނިދިއައިމާ ހިތަށް އަރަނީ ކުޑަކޮށް ނިދާލާފައި ތެދުވެ ނޫނީ ފަތިސްނަމާދަށް ކުރިއާލައި ހޭލައިގެން އެ ރަކްއަތް ކޮށްލާނީއެވެ. އެވިސްނުމުގައި ނިދެނީއެވެ. ނަމަވެސް ވަރަށް މަދު ރެއަކު ނޫނީ ނިދުމަށްފަހު ނުހޭލެވެއެވެ. ފަތިސް ނަމާދަށްވެސް އޮންނަނީ ނުހޭލެވިފައެވެ. އެހެންވެ 3 ވަނަ ރަކްއަތް އޮންނަނީ ނުކުރެވިފައެވެ.
މިއީ ޝައިޠޯނާގެ ކިބައިން މެދުވެރިވާ ގޮތެއްކަން އޭނާގެ ހިތަށްވަން ދުވަހުން ފެށިގެން ވިތުރީގެ 3 ރަކްއަތް ހަމަނުކޮށް އޭނާ ނުނިދައެވެ. ކޮންމެ ގޮތަކުން ނަމަވެސް ނިދުމުގެ ކުރިން ވިތުރިގެ 3 ރަކްޢަތް އޭނާ ހަމަކުރަން ފެށިއެވެ.
އެހިސާބުން އޭނާގެ ޙަޔާތަށް ބޮޑެތި ބަދަލުތަކެއް އަންނަން ފެށިއެވެ. ކުރިއަށް ދެވޭނެ މަގުތައް ފެންނަންފެށިއެވެ. ކުރާ މަސައްކަތުގައި ކުރިއެރުން ލިބި ތަނަވަސްކަން އިތުރުވާންފެށިއެވެ. ހިތްހަމަޖެހިގެން އުޅެވެން ފެށިއެވެ.
އަދި ދާދިކުޑަދުވަސްކޮޅެއްގެ ތެރޭގައި އޭނާއަށް ދަމުނަމާދަށް ހޭލެވެން ފަށައިފިއެވެ. އެކަން އާދަވުމުން ވިތުރީގެ ފަހު ރަކްޢަތްކުރަނީ ދަމުނަމާދުކުރުމަށްފަހުގައެވެ.
ވިސްނާށެވެ! ޢަމަލުކުރަން މަސައްކަތްކުރާ މީހަކަށް އިސްލާމް ދީނަކީ ބުރަ ދީނެއް ނޫނެވެ. ލުއިފަސޭހަ ދީނެކެވެ. އަހަރެމެންގެ އަމިއްލަ ކަންކަމަށް ހޭދަކުރާ ވަޤުތުތަކާއި އަޅައިބަލައިފިނަމަ އަޅުކަންކުރަން ހޭދަކުރަންޖެހެނީ މަދު ވަޤުތުކޮޅެކެވެ. ބޭނުންވަނީ ހަމައެކަނި ހީވާގިވެލުމެވެ.
އެހީވާގިކަން ލިބިގަންނަން ބޭނުންވާ މީހާއަށް އޮތް އެންމެ ފަސޭހަ އެއް މަގަކީ ވަޒީފާއަށް ދާންޖެހޭކަމާއި ވަޒީފާއަށް ގޮސް މަސައްކަތްކުރަންޖެހޭ ފަދައިން ﷲ ތަޢާލާ އަންގަވާފައިވާ މަގުން އަޅުކަންކުރަންޖެހޭނެކަން ޤަބޫލުކުރުމެވެ.
ވިސްނައިލާށެވެ! އަހަރެމެން ކޮންމެ މީހަކީވެސް ﷲ ތަޢާލާގެ އަޅެކެވެ. އަހަރެމެން ދުނިޔޭގައި މިތިބީ ﷲ ތަޢާލާގެ ވަޒީފާގައެވެ. އެވަޒިފާއަކީ ﷲ ތަޢާލާއަށް ކިޔަމަންތެރިވުމާއި އެކަލާނގެ އަނގަވާފައިވާ މަގުން އަޅުކަންކުރުމެވެ. ވީމާ ފުރަތަމަ އަދާކުރަންޖެހޭ ވަޒީފާއަށް އިސްކަންދޭށެވެ. އެއިރުން ދުނިޔަވީ ވަޒިފާގައި ކުރިއަށްދިއުމަށް ﷲ ތަޢާލާ މަގުފަހިކޮށްދެއްވަވާނެތެވެ. އިން ޝާ ﷲ
- އިސްލާމީ ތިލަފަތުގެ ދަރުސަކުން
