ލ. އަތޮޅު ކައުންސިލް، ލ. ގަން ކައުންސިލް އަދި ލ. ފޮނަދޫ ކައުންސިލް "މަގޭ ސާފު ރާއްޖެ ގައުމީ ކޮންފަރެންސް 2025" ގެ އިވެންޓް ޕާޓްނަރުންގެ ގޮތުގައި ބައިވެރިވެއްޖެ!
ރާއްޖޭގެ ތިމާވެށި ރައްކާތެރިކޮށް، ސާފު ރާއްޖެއެއް ބިނާކުރުމުގެ މަގުސަދުގައި ބާއްވާ "މަގޭ ސާފު ރާއްޖެ ގައުމީ ކޮންފަރެންސް 2025" ގެ އިވެންޓް ޕާޓްނަރުންގެ ގޮތުގައި ލ. އަތޮޅު ކައުންސިލް، ލ. ގަން ކައުންސިލް އަދި ލ. ފޮނަދޫ ކައުންސިލް ގުޅިވަޑައިގެންފިއެވެ.
މި ކައުންސިލްތަކުން ކޮންފަރެންސްގެ އިވެންޓް ޕާޓްނަރުންގެ ގޮތުގައި ބައިވެރިވުމަކީ، މި ގައުމީ މަސައްކަތަށް ލިބިގެންދާނެ ވަރަށް ބޮޑު ކުރިއެރުމެއް ކަމަށް ކޮންފަރެންސް އިންތިޒާމު ކުރާ ފަރާތުން ފަޚުރުވެރިކަމާއެކު ހާމަކޮށްފައިވެއެވެ. މި ގުޅިލުމާއެކު، ސާފުތާހިރު ރާއްޖެއެއްގެ ހުވަފެން ހަގީގަތަކަށް ހެދުމަށް ކުރެވޭ މަސައްކަތަށް އިތުރު ބާރެއް ލިބިގެންދާނެ ކަމަށް އުންމީދު ކުރެވެއެވެ.
"މަގޭ ސާފު ރާއްޖެ ގައުމީ ކޮންފަރެންސް 2025" އަކީ ރާއްޖެއަށް ދިމާވެފައިވާ ތިމާވެށީގެ ގޮންޖެހުންތަކަށް ދެމެހެއްޓެނިވި ހައްލުތައް ހޯދައި، މުޅި ގައުމީ ފެންވަރުގައި ތިމާވެށި ރައްކާތެރިކުރުމުގެ މުހިންމުކަމާ ބެހޭގޮތުން މަޝްވަރާކުރުމަށް ބާއްވާ ބޮޑު މަހާސިންތާއެކެވެ. މި ކޮންފަރެންސްގައި ސަރުކާރުގެ އިދާރާތަކާއި، އަމިއްލަ ޖަމިއްޔާތަކާއި، ކައުންސިލްތަކުގެ އިތުރުން ރައްޔިތުންގެ ބައިވެރިވުން އިތުރުކުރުމަށް ގިނަ މަސައްކަތްތަކެއް ކުރެވެމުންދެއެވެ.
ލ. އަތޮޅު ކައުންސިލާއި، ލ. ގަން ކައުންސިލް އަދި ލ. ފޮނަދޫ ކައުންސިލްގެ ބައިވެރިވުމަކީ، ކޮންފަރެންސްގެ މަސައްކަތްތައް ރާއްޖޭގެ އެކި ކަންކޮޅުތަކަށް ފުޅާކޮށް، ޚާއްސަކޮށް ލ. އަތޮޅުގެ ރައްޔިތުންގެ މެދުގައި ތިމާވެށީގެ ހޭލުންތެރިކަން އިތުރުކުރުމަށް ލިބިގެންދާނެ ވަރަށް ބޮޑު އެހީއެކެވެ. މި ކައުންސިލްތަކުގެ ބައިވެރިވުމާއެކު ކޮންފަރެންސްގެ މަސައްކަތްތައް އިތުރަށް ވަރުގަދަވެ، ރާއްޖެއަށް ސާފު އަދި ދެމެހެއްޓެނިވި މާހައުލެއް ގާއިމުކުރުމަށް އިތުރު ހިތްވަރެއް ލިބިގެންދާނެ ކަމަށް އުންމީދުކުރެވެއެވެ.
ހަބަރު: ސަރުކާރު
