އަންނަ އަހަރު ބާއްވާ ލޯކަލް ކައުންސިލް އަދި އަންހެނުންގެ ތަރައްގީއަށް މަސައްކަތް ކުރާ ކޮމިޓީ އިންތިޚާބާ ގުޅިގެން، ސިޓީ ކައުންސިލްތަކުގައި އަންހެނުންނަށް ޚާއްސަ ގޮނޑިތައް ކަނޑައަޅާފައިވާ ދާއިރާތައް އިލެކްޝަންސް ކޮމިޝަނުން އާންމުކޮށްފިއެވެ. މި ދާއިރާތަކަކީ އަންނަ އަހަރުގެ އޭޕްރީލް މަހު ބާއްވާ އިންތިޚާބުގައި އަންހެނުންގެ ބައިވެރިވުން އިތުރުކުރުމަށްޓަކައި ކަނޑައަޅާފައިވާ ގޮނޑިތަކެވެ.
އިލެކްޝަންސް ކޮމިޝަނުން މި މަހުގެ 9ވަނަ ދުވަހު ވަނީ ދާއިރާތަކުގެ ރިޕޯޓް އާންމުކޮށް، އެ ރިޕޯޓާ ގުޅޭގޮތުން ޝަކުވާ ހުށަހެޅުމުގެ ފުރުސަތު ހުޅުވާލާފައެވެ. އެ ކޮމިޝަނުން ވިދާޅުވީ، ޝަކުވާ ހުށަހެޅުމަށް ހުޅުވާލި ފުރުސަތުގައި ހުށަހެޅުނު ޝަކުވާތަކުގެ ސަބަބުން ރިޕޯޓަށް ބޮޑެތި ބަދަލުތަކެއް ގެންނަން ޖެހިފައިނުވާ ކަމަށެވެ.
އިލެކްޝަންސް ކޮމިޝަނުން އާންމުކޮށްފައިވާ އިންތިޚާބީ ދާއިރާ ކަނޑައެޅުމާބެހޭ ދާއިމީ ރިޕޯޓުގައިވާގޮތުން، އަންނަ އަހަރު ބާއްވާ ލޯކަލް ކައުންސިލް އިންތިޚާބުގައި ރަށު ކައުންސިލްތަކަށް ޖުމްލަ 629 ކައުންސިލަރުން އިންތިޚާބު ކުރެވޭނެއެވެ. މީގެ އިތުރުން ސިޓީ ކައުންސިލްތަކަށް 52 ކައުންސިލަރުން އިންތިޚާބު ކުރެވޭނެކަމަށްވެސް އެ ރިޕޯޓުގައި ބަޔާންކޮށްފައިވެއެވެ.
ރަށު ކައުންސިލްތަކަށް އިންތިޚާބު ކުރެވޭ ކައުންސިލަރުންގެ އަދަދު ތަފާތުވާނެއެވެ. އެގޮތުން، 133 ރަށަކަށް އިންތިޚާބު ކުރަންޖެހޭނީ ކައުންސިލް ރައީސާއި އަންހެން މެންބަރަކު ހިމެނޭހެން 3 ކައުންސިލަރުންނެވެ. އަދި 46 ރަށަކަށް އިންތިޚާބު ކުރަންޖެހޭނީ ކައުންސިލް ރައީސާއި 2 އަންހެން ކައުންސިލަރުން ހިމެނޭހެން 5 ކައުންސިލަރުންނެވެ.
އަންނަ އޭޕްރީލް މަހު ބާއްވާ އިންތިޚާބުގައި ސިޓީ ކައުންސިލްތަކުގައި އިންތިޚާބު ކުރާ ކައުންސިލަރުންގެ އަދަދު ތަފާތުވާނެއެވެ. ސިޓީތަކުގައި ދާއިރާތައް ކަނޑައަޅާފައިވާގޮތުން:
- ކުޅުދުއްފުށި ސިޓީއަށް މޭޔަރު ހިމެނޭހެން 7 ކައުންސިލަރުން.
- ތިނަދޫ ސިޓީއަށް 7 ކައުންސިލަރުން.
- ފުވައްމުލައް ސިޓީއަށް 9 ކައުންސިލަރުން.
- އައްޑޫ ސިޓީއަށް 11 ކައުންސިލަރުން.
- މާލެ ސިޓީއަށް 18 ކައުންސިލަރުން.
މި އިންތިޚާބީ ދާއިރާތައް އާންމުކުރުމާއެކު، އަންނަ އަހަރުގެ ލޯކަލް ކައުންސިލް އިންތިޚާބަށް ތައްޔާރުވުމުގެ މަސައްކަތްތައް އިލެކްޝަންސް ކޮމިޝަނުން ވަނީ އިތުރަށް ހަލުވިކޮށްފައެވެ.
