ސުންނަތުގެ މާނައަކީ ކުރުގޮތަކަށް ބުނާނަމަ އެއީ ލޮބުވެތި ރަސޫލާ މުޙައްމަދު صلى الله عليه وسلم ކަންކަމުގައި ޢަމަލުފުޅުކުރެއްވެވި ގޮތެވެ. އަހުރެންނަށް އުޅެން ﷲ ތަޢާލާ އަންގަވާފައިވަނީ ކޮންމެ ކަމެއްގައިވެސް ރަސޫލާ މުޙައްމަދު صلى الله عليه وسلم ނަމޫނާއަކަށް ބަލައިގެންނެވެ.
ވީމާ މިވެނިކަމަކީ ސުންނަތެކޭ ބުނެ ކިތަންމެ ކުޑަ ސުންނަތެއްވިޔަސް ދޫކޮށްނުލާށެވެ! " އެއީ ﷲ އާއި (ބައްދަލުކުރުމަށާއި) އަދި އާޚިރަތް ދުވަހަށް އުއްމީދުކޮށް އަދި ގިނަގިނައިން ﷲ ގެމަތިން ހަނދުމަކުރާމީހާއަށެވެ." އޮތް ވަޙީ ބަސްފުޅަށް ވިސްނާށެވެ. އަހުރެމެން މަސައްކަތް މިކުރަނީ " ﷲ އާއި (ބައްދަލުކުރުމަށާއި) އަދި އާޚިރަތް ދުވަހަށް އުއްމީދުކޮށް އަދި ގިނަގިނައިން ﷲ ގެމަތިން ހަނދުމަކުރާ މީހަކު" ކަމުގައިވުމަށެވެ. ދިންނަވަން އޮތް މަގަކީ އެއީއެވެ.
ﷲ ސުބުޙާނަހޫ ވަތަޢާލާ ކީރިތި ޤުރުއާނުގައި ވަޙީކުރައްވާފައިވެއެވެ.
لَقَدْ كَانَ لَكُمْ فِي رَسُولِ اللَّـهِ أُسْوَةٌ حَسَنَةٌ لِّمَن كَانَ يَرْجُو اللَّـهَ وَالْيَوْمَ الْآخِرَ وَذَكَرَ اللَّـهَ كَثِيرًا ﴿الأحزاب: ٢١﴾
މާނައިގެ ތަރުޖަމާއީ: “ހަމަކަށަވަރުން، اللَّه ގެ ރަސޫލާ (މުޙައްމަދު صلى الله عليه وسلم) ގެ ކިބައިގައި، ތިޔަބައިމީހުންނަށް ރިވެތިވެގެންވާ ނަމޫނާއެއްވެއެވެ. އެއީ ﷲ އާއި (ބައްދަލުކުރުމަށާއި) އަދި އާޚިރަތް ދުވަހަށް އުއްމީދުކޮށް އަދި ގިނަގިނައިން ﷲ ގެމަތިން ހަނދުމަކުރާމީހާއަށެވެ."
އަދިވެސް ﷲ ސުބުހާނަހޫ ވަތަޢާލާ ވަޙީކުރައްވާފައިވެއެވެ.
وَإِنَّكَ لَعَلَىٰ خُلُقٍ عَظِيمٍ ﴿القلم: ٤﴾
މާނައިގެ ތަރުޖަމާއީ: ” އަދި ހަމަކަށަވަރުން ކަލޭގެފާނު (މުޙައްމަދު صلى الله عليه وسلم) ވާކަން ކަށަވަރީ މަތިވެރިވެގެންވާ ޚުލްޤުފުޅެއްގެ މަތީގައިކަން ކަށަވަރެވެ."
މިއާޔަތުން އެނގިގެންދަނީ ލޮބުވެތި ރަސޫލާ މުޙައްމަދު صلى الله عليه وسلم ގެ އަޚްލާޤަކީ ﷲ ތަޢާލާގެ ޙަޟްރަތުގައި އެންމެ މަތީ އަޚްލާޤްކަމެވެ. ވީމާ މުޙައްމަދު صلى الله عليه وسلم ގެ އަޚްލާޤީ ސިފަފުޅުތައް އަހުރެމެންގެ ކިބައިގައި ހަރުލައްވައި ޢަމަލުކުރަން އެބަޖެހެއެވެ.
- އިސްލާމީ ތިލަފަތުގެ ދަރުސަކުން
