ﷲ ތަޢާލާގެ ވަޙީބަސްފުޅުގައި އޮތީ މިފަދައިންނެވެ.
"އޭ އީމާންވެއްޖެ މީސްތަކުންނޭވެ! ތިއަބައިމީހުން، ﷲ އަށް ކިޔަމަންވާށެވެ! އަދި، ރަސޫލާއަށާއި، ތިއަބައިމީހުންގެ ތެރެއިން ވެރިންނަށްވެސް ކިޔަމަންވާށެވެ! ފަހެ، ކަމަކާމެދު ތިއަބައިމީހުން ދެބަސްވެއްޖެނަމަ، ﷲ އަށާއި، ރަސޫލާއަށް އެކަމެއް ރައްދުކުރާށެވެ! (އެބަހީ: އެކަމާމެދު ﷲ އާއި، އެކަލާނގެ ރަސޫލާގެ ޙުކުމް އޮތްގޮތެއް ބަލައި އެގޮތަށް ޢަމަލުކުރާށެވެ!) ތިއަބައިމީހުން، ﷲ އަށާއި، އާޚިރަތް ދުވަހަށް އީމާންވާ ކަމުގައި ވާނަމައެވެ. އެގޮތް ތއަބައިމީހުންނަށް ހެޔޮކަންބޮޑެވެ. އަދި، ނިމުމެއްގެގޮތުން ރީތިކަންވެސް ބޮޑުމެއެވެ."
(ނިސާ: 59)
މީސްތަކުންނަށް އޮތީ ﷲ ތައާލާއަށް ކިޔަމަންވުމެވެ. އެއަށްފަހު ރަސޫލް (ﷺ) އަށާއި ވެރިން ކަމުގައި ﷲ ތަޢާލާ މިންވަރު ކުރައްވަވާފައިވާ މީހުންނަށް ވެސް ކިޔަމަންތެރިވުމެވެ. ނަމަވެސް އެއްވެސް ކަމެއްގައި ޚިޔާލު ތަފާތުވެއްޖެ ނަމަ ބަލަން އޮތީ ވެރިމީހާގެ ބަހަކަށް ނޫނެވެ. އަދި ވެރިމީހާގެ ނިންމުމެއް ވެސް ނޫނެވެ. އަދި ވެރިމީހާ ބޭނުންވާ ގޮތެއްވެސް ނުމެނޫންމެއެވެ. ހަމަ އެއާއިއެކު މުޖުތަމަޢު ތަކުގައި ތިބޭ އަޑުގަދަ މީހުން ބުނާ ގޮތެއްވެސް ނޫނެވެ. ގޭގޭގައި ތިބޭ އަޑުގަދަ މީހުން ބުނާގޮތަކަށްވެސް ނޫނެވެ.
ބަލަން ޖެހޭ ކަންކަން ﷲ ތައާލާ މިވަނީ ވަރަށް ސާފުކޮށް ބަޔާން ކުރައްވަވައިފައެވެ. " ފަހެ، ކަމަކާމެދު ތިއަބައިމީހުން ދެބަސްވެއްޖެނަމަ، ﷲ އަށާއި، ރަސޫލާއަށް އެކަމެއް ރައްދުކުރާށެވެ! (އެބަހީ: އެކަމާމެދު ﷲ އާއި، އެކަލާނގެ ރަސޫލާގެ ޙުކުމް އޮތްގޮތެއް ބަލައި އެގޮތަށް ޢަމަލުކުރާށެވެ!)"
އެފަދައިން ޢަމަލުކުރަންވީ " ތިއަބައިމީހުން، ﷲ އަށާއި، އާޚިރަތް ދުވަހަށް އީމާން ވާ ކަމުގައި ވާނަމައެވެ." އަހަރެމެން އެންމެން މިތިބީ "ﷲ އަށާއި، އާޚިރަތް ދުވަހަށް" އީމާން ވެގެންނެވެ. ވެރިންނަށާއި އަޑުގަދަ މީހުންނަށް އީމާންވެގެނެއް ނޫނެވެ.
މިހާރަކަށް އައިސް ބައެއް މުސްލިމް ބޮޑެތި ޤައުމުތަކުގައިވެސް ﷲ ތަޢާލާގެ މިނިންމެވުން އެބަ ބަދަލުކުރެއެވެ. ﷲ ތަޢާލާ ބާވައިލެއްވެވި ޙުކުމްފުޅުތައް ބަދަލުކޮށް ވެރިންނާއި އަޑު ގަދަ މީހުންނާއި ފައިސާވެރިން ބޭނުންވާ ގޮތްތައް ވެރިކަމުގެ ފަރާތުން އެބަ ކުރިއަށް ނެރެއެވެ! މިއީ މުސްލިމުން ބަލައިގަންނަން ޖެހޭނެ ގޮތެއް ނޫނެވެ. ބަލައިގަންނަން ޖެހޭނީ ﷲ ތަޢާލާގެ ވަޙީއެވެ.
ހަމަ އެގޮތަށް ޢާއިލާތަކުގެ ކަންކަން ނިންމުމުގައި ތަނަވަސް، އަޑުގަދަ މީހުން ބުނާގޮތަށް އެބަ ކަންކަން ނިންމައެވެ. އެއީ އިންޞާފުކަމެއް ބޭއިންޞާފުކަމެއްވެސް އޮންނަނީ ބަލައި ނުލެވިފައެވެ. އެގޮތަށް ކަންތައްކުރީމާ ވާގޮތަކީ ރޯވެފައިވާ ފިތުނައިގެ ހުޅުގަނޑު ހިނދުކޮޅަކަށް ކުޑަވެލައެވެ. އެމަމަކު ނިވިގެނެއް ނުދެއެވެ. އަލުން ހުޅުގަނޑު ބޮޑުވެގަންނައިރު މާބޮޑުވެ މާބޮޑަށް އަނދައިގެންގޮސް ލިބޭ ގެއްލުން މާބޮޑުވެގެންދެއެވެ.
ދެން ބުނެލަން އޮތީ މައިންބަފައިންނަށްވެސް، ވަޒީފާ ދިން މީހާއަށްވެސް، ވެރިންނަށްވެސް އަދި ކޮންމެ މީހަކަށް ނަމަވެސް ކިޔަމަންވާން އޮތީ ﷲ ތަޢާލާ އަންގަވާފައިވާ ފަދައިން ކުރާ އަމުރުތަކަށެވެ. ޤުރްއާނާއި ސުންނަތުގެ ތެރެއިން ކުރާ އަމުރުތަކަށެވެ. އެނޫން ގޮތަކަށް ކުރާ އެއްވެސް އަމުރަކަށް ކިޔަމަންވުމެއް ނެތެވެ.
- އިސްލާމީ ތިލަފަތުގެ ދަރުސަކުން
