މިމަހުގެ 22 ވީ ހޮނިހިރު ދުވަހުގެ ރޭ 22:10 ހާއިރު ރެޑް ވޭވް ފިހާރައަކުން، މޫނު ނިވަ ކޮށްގެން ތިބެ ވައްކަން ކުރި ދެ އަންހެނުން، ކްރިމިނަލް ކޯޓުން މިއަދު ދޫކޮށްލައިފިއެވެ.
ފުލުހުންގެ މީޑިއާ އޮފިޝަލަކު ވިދާޅުވި ގޮތުގައި އެރޭ ހައްޔަރު ކުރެވުނު ދެ އަންހެނުން މިއަދު ކްރިމިނަލް ކޯޓުން ދޫކޮށްލާފައިވަނީ އެމީހުންގެ ބަންދާއިމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން، އެމީހުން ބަންދުގައި އިތުރަށް ބޭތިއްބުމަށް ނުފެންނަ ކަމަށް ނިންމުމަށްފަހުއެވެ.
އެދެއަންހެނުން ވައްކަން ކޮށްފައިވަނީ މަޖީދީމަގުގައި ހުންނަ ގަލޮޅޮ ރެޑްވޭވް ފިހާރައިންނެވެ. ވަގަށް ނަގާފައިވާ ކަމަށް ބެލެވޭ ރީތިވާ ސާމާނުތަކެއް އެރޭ އެމީހުންގެ އަތުން ފެނިފައިވާ ކަމަށް ވެސް ފުލުހުން އެއިރު މައުލޫމާތު ދެއްވާފައިވެއެވެ.
