ކުރީގެ ޒަމާންތަކާ މިޒަމާނާ އޮތް އެންމެ ބޮޑު އެއްތަފާތަކީ ގިނަ އަންހެނުންނަކީވެސް ފިރިހެނުން ފަދައިން އާމްދަނީ ހޯދަމުން އަންނަ ބައަކު ކަމެވެ. ފިރިހެނުން ފަދައިން ގިނަ އަންހެނުންވެސް ވަޒީފާ އަދާކޮށްގެން މުށާރަ ހޯދާ ބައަކު ކަމެވެ. ވީމާ ބައެއް ކަންކަމުގައި އަންހެނުންވެސް ފިރިހެނުންނާއި ހަމަ އެއްސަފުގައި ތިބެން ބޭނުންވާނެއެވެ. 

މިޘާލަކަށް ލޯބިވެގެން އުޅެމުން ނަމަވެސް ކައިވެނިކުރުމަށްފަހުގައި ނަމަވެސް ދެމީހުން ތަނަކަށް ކާންދިއައީއެވެ. ބޭނުން އެއްޗަކަށް އޯޑަރުކޮށްގެން ގެނުވައިގެންކެއީއެވެ. ކައިނިމިގެން ބިލްދައްކަންޖެހޭ ވަޤުތު އަންހެން ކުއްޖާވެސް ބިލަށް ފައިސާ ދައްކަން ބޭނުންވެދާނެއެވެ. 

އެޙާލަތުގައި ބައެއް ފިރިހެނުން އެކަމަކަށް ނުރުހެއެވެ. ޤަބޫލުކުރެވެނީ އިސްމީހާއަކީ ތިމާ ކަމަށާއި ފައިސާ ދައްކަންޖެހޭނީ ތިމާކަމަށެވެ. ލޯބިވެރިޔާ ނުވަތަ އަނބިމީހާ ފައިސާ ދައްކާނަމަ ތިމާގެ އަގުވެއްޓޭނެ ކަމަށެވެ. އެހެންވެ މައްސަލަތައް ޖައްސައެވެ. 

އެގޮތަށް އެކަން ނުކުރާށެވެ. މިޘާލަކަށް އަންހެންކުއްޖާވެސް ހަމައެވިސްނުމުން ވިސްނައިފާނެއެވެ. ޚާއްޞަކޮށް ލޯބިވެރިންގެ ގޮތުގައި ތިބިނަމައެވެ. ކޮންމެ ފަހަރަކު ފިރިހެން ކުއްޖާއަށް ބިލްދައްކަން ޖެއްސުވުމަކީ އޭނާގެ ދަށުވުން ކަމަށް ދެކެފާނެއެވެ. 

ވީމާ މިބާވަތުގެ ކުދިކުދި ކޫސަނި ކަންކަން މައްސަލައަކަށް ވިޔަނުދޭށެވެ. ބިލް ދައްކަން ބޭނުންވާ މީހާ ގަދަފައި ނުވިއްދާށެވެ. ނިކަން ލޯބިން ބުނެލާށެވެ! "މިފަހަރު ބިލްދެއްކުމުގެ ފުރުޞަތު އަހުރެންނަށްދޭށެވެ." އެފަދަ ޢިބާރާތަކުން ބުނެފިނަމަ އޭނާއަށް އެފުރުޞަތުދޭށެވެ. 

މިމައްސަލަ ބޮޑުވެ މިހާރަކަށް އައިސް ފަހަރަކު މީހަކު ބިލްދެއްކުމުގެ އާދައެއްވެސް އެބަ ގެންގުޅެއެވެ. އެއީވެސް ހަމަ އެންމެ ރަނގަޅު ގޮތެކެވެ. އެއިރުން ފަހުން މައްސަލައެއް ޖެހިގެން ވަކިވާން ޖެހުނަސް އަނެކާގެ މައްޗަށް ކުރަން ހުންނަ ޝަކުވާތައް ވަރަށް ބޮޑަށް މަދުވާނެއެވެ. ދެމީހުންނަށްވެސް ތިމާ މިހުރީ އަނެކާގެ ދަށުގައި ނުވެ މިނިވަންކަންމަތީގައިކަމުގެ ޔަޤީންކަންވެސް އެއިރުން އޮންނާނެއެވެ.

- ޑރ. މަރީނާ