އިންތިހާއަށް ހިތްދަތިކަމާ އަނިޔާ ލިބެމުންދިއަ މައެއްގެ ހުރިހާ މައްސަލަތައް ޙައްލުވެ އުފާވެރި ދިރިއުޅުމެއް ލިބުނު ގޮތުގެ ވާހަކަ! މިފަދަ ޙާލުގަވާ އެންމެންނަށް ހިތްވަރެއް!

ޒަވާޖީ ޙަޔާތުގައި ދަރިން ލިބޭފަހުން އަނިޔާއާއި ހިތްދަތިކަން ލިބެން ފެށުމުން ގިނަ އަނބިންނަށް އެކަން އޮންނަނީ ވަރަށް ބޮޑު ކަމަކަށްވެފައެވެ. ޚާއްޞަކޮށް އަޅައިލާނެ ފެންވަރު ޢާއިލާގައި ނެތްނަމައެވެ. އެހެންވެ ކޮންމެ ޙާލަތެއްގައިނަމަވެސް ކެތްތެރިވާން މަޖުބޫރުވާ ބައަކުވެސް ތިބެއެވެ. އެފަދަ އަނބިންނަށް އުޅެންޖެހިފައިވާ ހިތްދަތިޙާލުގެ ވާހަކަތައް ވަރަށް ގިނައިން އަޑުއަހަންޖެހޭތީ މިގެނެސްދެނީ އަގުހުރި ފިލާވަޅަކަށްވާނެ ލިޔުމެކެވެ. އިން ޝާ ﷲ  

"އަހަރެންނަށް ފިރިމީހާ އާއި ޢާއިލާގެ ތެރެއިން އަނިޔާ ލިބެން ފެށީ 3 ދަރިން ލިބުނު ފަހުންނެވެ. ދަރިންގެ އުމުރުން 7، 5، 3 އަހަރުގައެވެ. އަހަރެން ކުރަން ފެށި ކަމަކީ އެކުދިންނާއިއެކު ނަމާދުކޮށް އެ ކުދިން ބައިވެރިކޮށްގެން ދުޢާކުރުމެވެ. އެ ހާލަތު ބަދަލުކޮށްދެއްވަވާތޯއެވެ! 

އެގޮތަށް ދުޢާ ކުރަމުން ގެންދާތާ އަހަރެއްހައި ދުވަސް ފާއިތުވީފަހުން ބޮޑު ބޭބެ އަހަރެންނާއި ބައްދަލުކުރަން އައި ދުވަހަކު އަހަރެންގެ ހިތުގެ އުދާސްތައް ބޭރުކުރުމުގެ ފުރުޞަތު ލިބުނެވެ. އަހަރެންގެ މޫނުމަތީގައި ފިރިމީހާ ޖެހިތަނެއް ދުޅަވެފައި ހުރުމުން ސުވާލުކުރުމުންނެވެ. އެއިރުވެސް އަޅަމުން ދިއަ ވޭން ގަދަކަމުން ކެތް ނުކުރެވިގެން ހުރިހާ ވާހަކަތަކެއް ބޮޑު ބޭބެއަށް އެދުވަހު ކިޔައިދިނީމެވެ.  

ގޭގައި ބޮޑުބޭބެ ހުއްޓައި ފިރިމީހާ އައުމުން ބޮޑުބޭބެ ފުރަތަމަ ވެސް ސުވާލުކުރީ އަނބިމީހާގެ ކުށަކީ ކޮބައިތޯއެވެ؟ ގޯސްކޮށް ކުރަނީ ކޮން ކަމެއްތޯއެވެ؟ އޭނާއަކަށް ޖަވާބެއް ނުދެވުނެވެ. ދެވޭނެ ޖަވާބެއް ނެތުމުންނެވެ. އަހަރެންގެ އެއްވެސް ކުށެއް ދެއްކެން ނެތުމުންނެވެ. ފިރިމީހާ އެއްވެސް ޖަވާބެއް ނުދިނުމުން އަހަރެން އަމިއްލައަށް ޖަވާބު ދިނީމެވެ.  

"އަހަރެންގެ ކުށަކީ އަހަރެންނާއި 3 ދަރިން ތިބުމުން ރަމީޒަށް އޭނާގެ މުއްސަނދި ބޮޑުދައިތަގެ ދަރިފުޅާއި ކައިވެނިކުރެވެން ނެތުމެވެ. ރަމީޒް އާއި ޢާއިލާއިން ބޭނުންވަނީ އަހަރެމެން 4 މައިން ދުނިޔެއިން ވަކިކޮށްލުމެވެ. ބަޑިޖަހައި ނުވަތަ ޒަހަރު ދީ މަރައި ނުލެވިގެން އުޅެނީ ކޮން ކަމަކަށް  ބިރުން ކަމެއް ނުއެނގެއެވެ."  

ބޮޑުބޭބެ ރަމީޒުގެ ކިބައިން އެދުނީ އަވަހަށް އަހަރެން ވަރިކޮށްދިނުމަށެވެ. އަދި 3 ދަރިންވެސް ހަވާލުކުރުމަށެވެ. ރަމީޒު އަނގައިންވެސް ނުބުނެ ހުއްޓައި ލިޔުމެއް ލިޔެ އަހަރެމެން 4 މައިންގެ ހުރިހާ ޒިންމާއެއް ނަގާނެކަމުގެ ޔަޤީންކަން ދިނެވެ. ކޯޓަށް ދެއްކުމަށް އިނގިލީގެ ނިޝާންވެސް ޖަހައިދިނެވެ.  

ރަމީޒް ވަރިކުރުމުން ބޮޑުބޭބެ ދިއައީ އަހަރެމެން 4 މައިން ގޮވައިގެންނެވެ. ބޮޑުބޭބެގެ ގެއަށެވެ. ބޮޑުބޭބެ އަކީ ތަނަވަސް މީހެކެވެ. ދަރިއަކު ނުލިބޭ މީހެކެވެ. އެދުވަހުން ފެށިގެން އަހަރެން ދިރިއުޅެމުން އައީ ވަރަށް އުފަލުގައެވެ. ތަނަވަހުގައެވެ. ޢިއްދަ ހަމަވިފަހުން އިތުރު ކައިވެންޏެއް ކުރީ ވެސް ބޮޑުބޭބެ ދެއްކި މީހަކާއިއެވެ. އެމީހާއަކީ ވަރަށް ހެޔޮ ލަފާ ތަޤްވާވެރިއެކެވެ. ބޮޑުބޭބެ މިހާރު ވަނީ އޭނާގެ މުދަލުން ދެބައިކުޅަ އެއްބައިވެސް އަހަރެމެންނަށް ދީފައެވެ. އުފަލުގައި ދިރިއުޅެވޭނެ ގޮތް ހަދައިދީފައެވެ."

ނުބައި މީހަކާއިއެކު ނުވަތަ ބައަކާއިއެކު ދިރިއުޅެން ޖެހިފައިވީނަމަވެސް އުންމީދު ކަނޑާލައި ޙަޔާތް އޮޔާ ނުލާށެވެ! އެއީ ދިރިއުޅެން މަޖުބޫރުވެފައިވާ ޙާލަތެއް ނަމަ ކެތްތެރިވާށެވެ. ކެތްތެރިވެ ހުރެ ﷲ ތަޢާލާ އަށް ދުޢާކުރުން ގިނަ ކުރާށެވެ! އެ ޙާލަތުން ސަލާމަތް ވެވޭނެ މަގެއް ﷲ ތަޢާލާ ދައްކަވާނެތެވެ! 

ބައެއް ފަހަރު ޢާއިލީ ދިރިއުޅުމުގެ ތެރެއިން ވެސް މިފަދަ ކަންކަން ފެނިދާނެއެވެ. ދަރިން ލިބޭ ފަހުން ވެސް މައްސަލަތައް ކުރިމަތިވެދާނެއެވެ. ނަމަވެސް މާޔޫސްވެ އަވަސްވެ ނުގަންނާށެވެ! ކެތްތެރިކަން އިސްކުރާށެވެ! ވިސްނުންތެރިކަމާއިއެކު އަމަލުކުރާށެވެ! ޙިކުމަތްތެރިއަކަށްވާށެވެ!  

ތިމާ އަޅާ ފިޔަވަޅަކީ ލިބިފައި ތިބި ދަރިންނަށް އެ ފިޔަވަޅެއްގެ ސަބަބުން ގެއްލުން ލިބިދާނެ ފިޔަވަޅެއް ނަމަ މާ ބޮޑަށް ވިސްނަންވާނެއެވެ! މިސާލަކަށް ބައެއް ފަހަރު ފިރިމީހާ ނުބައިވުމުން ނުވަތަ ޢާއިލާގެ ލިބޭ އަނިޔާއަށް ކެތް ނުކުރެވިގެން ބައެއް އަންހެނުން ވަރަށް ކުއްލި ނިންމުންތައް އެބަ ނިންމައެވެ. ވިސްނައިލަންވީ އެހިސާބުން ދަރިންނަށް ކުރިމަތިވެދާނެ ކަންކަމަށެވެ. ދަރިން އެ އަނިޔާވެރިންގެ އަތްމައްޗަށް ދޫކޮށްލަން ހެޔޮ ވެދާނެ ހެއްޔެވެ؟ ދަރިން ގޮވައިގެން ހިނގައްޖެ ނަމަ ބެލޭނެ ހެއްޔެވެ؟ މި ދެ މައްސަލައަށް ވަރަށް ބޮޑަށް ވިސްނަން ވާނެއެވެ.

- އިސްލާމީ ތިލަފަތުގެ ދަރުސަކުން