ދ.ވައްލަޅޮހި ނަމަކަށް ކިޔާ ފަޅުރަކަށް ދަތުރުގޮސް އުޅުނު އަންހެނަކު ދޯނި ތެރެއަށް ހޭނެތިގެން އިތުރުފަރުވާއަށް ސެންޓްރަލް އޭރިއާ ކޯސްޓްގާޑް ސްކޮޑްރަންގެ އެހީތެރިކަމާއެކު ދ.ކުޑަހުވަދޫއަށް ގެންގޮސްދީފިއެވެ.
މި ހާދިސާގެ މަޢުލޫމާތު މިއަދު 16:20 ހާއިރު ލިބުމާއެކު ސެންޓްރަލް އޭރިއާގެ ސިފައިން ވަނީ ހަރަކާތްތެރިވާން ފަށާފައެވެ. އަދި ހޭނެތުނު އަންހެން މީހާއާއެކު އެ ދޯނީގައި ތިބި ތިން އަންހެނުންނާއި ކުޑަކުއްޖަކު ވަނީ ކޯސްޓްގާޑް ލޯންޗުގައި މިއަދު 17:00 ހާއިރު ކުޑަހުވަދޫއަށް ގެންގޮސްދީފައެވެ.
އެމްއެންޑީއެފް ކޯސްޓްގާޑަށް އެ ދޯނިން މަޢުލޫމާތު ދީފައިވާ ގޮތުގައި އަންހެން މީހާ ހޭނެތިފައިވަނީ މިއަދު ހަވީރު އައި ކޮޅިގަނޑުގައި ކަނޑުގަދަވުމާ ގުޅިގެންނެވެ.
