އެލައިޑް އިންޝުއަރެންސުގެ އިސްލާމިކް ވިންޑޯ "އަޔާދީ ތަކާފުލް" އިން "ފެމެލީ ތަކާފުލް"ގެ ނަމުގައި 3 ޕްރޮޑަކްޓެއް މިއަދު ތަޢާރަފްކޮށްފިއެވެ. މި 3 ޕްރޮޑަކްޓަކީ ފަހަށް ރައްކާ ކުރުމާއި ގެއްލުމުގެ ބަދަލު ނަގައިދިނުމަށް ހާއްސަކޮށް ފަރުމާކޮށްފައިވާ އިސްލާމިކް ޝަރީޢާ ހުއްދަކުރާ 3 ޕްރޮޑަކްޓެކެވެ.

މިކަމަށްޓަކައި މޫކައި ހޮޓެލްގައި ބޭއްވި ނޫސްވެރިންގެ ބައްދަލުވުމުގައި އެލައިޑް އިސްލާމީ ޝަރިއްޔާ ބޯޑުގެ ޗެއާޕާސަން ޑރ. އައިޝަތު މުނީޒާ ވިދާޅުވީ މިއީ ރާއްޖޭގެ އިސްލާމިކް ފައިނޭންސްގެ ތާރީހުގައި އެޅުނު ވަރަށް މުހިންމު ފިޔަވަޅެއް ކަމަށެވެ. އަދި މިއުޅެވެނީ ރާއްޖޭގެ އިސްލާމިކް ފައިނޭންސްގެ ތާރީހުގައި ފުރަތަމަ ފަހަރަށް ވަރަށް ބޮޑު ކަމެއް ކުރަން ކަމަށެވެ.

ޑރ. މުނީޒާ ވިދާޅުވީ ކަސްޓަމަރުންނަށް ބޭނުން ހިފޭނެ މާކަގިނަ ޕްރޮޑަކްޓްތަކެއް ރާއްޖޭގައި އަދި ނެތްއިރު މިއުޅެވެނީ ތާރީހުގައި ފުރަތަމަ ފަހަރަށް ފެމެލީ ތަކާފުލް ޕްރޮޑަކްޓެއް ތައާރަފު ކުރަން ކަމަށެވެ. އިންވެސްޓްމަންޓްގެ ހައިޞިއްޔަތުން ބަލާނަމަ ފެމެލީ ތަކާފުލްގެ ސަބަބުން ފަހަށް ރައްކާ ކުރަން ބޭނުންވާ ކޮންމެ މީހަކަށް އެ ފުރުސަތު ތަނަވަސް ވެގެންދާނެ ކަމަށެވެ.

ޑރ. މުނީޒާ ވަނީ ބޭންކުގައި ފައިސާ ފަހަށް ރައްކާކުރުމާއި ތަކާފުލްގެ އުޞުލުން ފައިސާ ފަހަށް ރައްކާކުރުމުގެ ހުރިތަފާތާއި ފައިދާތައް ވިދާޅުވެދައްވައިފައެވެ.