ﷲ ތަޢާލާ އެންމެ މަތިވެރިކުރައްވަވައި އެންމެ ބޮޑަށް ލޯބިވެވޮޑިގަންނަވާ އިންސާނުން ކަމަށްވާ ރަސޫލްބޭކަލުންނަށް ބަލާށެވެ! އަހަރެމެންގެ ލޮބުވެތި ނަބިއްޔާ މުޙައްމަދު ﷺ ، ﷲ ގެ ޚަލީލް އިބްރާހީމްގެފާނު، ޔޫސުފްގެފާނު، ޔޫނުސްގެފާނު، ނޫޙްގެފާނު މިހެން ގޮސް ހުރިހާ ރަސޫލްބޭކަލުންނަށް ބަލާށެވެ!  

އެބޭކަލުން ކުރެއްވެވި ބައެއް ދުޢާތައް ޢިޖާބަ ނުކުރައްވަވައި އެތައް ބައިވަރު އަހަރުތަކަކަށް ލަސްވެގެން ދިއައެވެ. އެއީ އެބޭކަލުންދެކެ ﷲ ތަޢާލާ ލޯބިވެވޮޑިނުގަންނަވާތީއެއް ނޫނެވެ.  

ދެމީހަކު ދުޢާކުރީއެވެ. އެކަކު ކުރި ދުޢާ ވަޤުތުން ޢިޖާބަކުރެއްވެވީއެވެ. އަނެކަކުގެ ދުޢާ ޢިޖާބަ ނުކުރައްވަވައި އަހަރުތަކެއް ފާިއތުވެގެން ދިއައީއެވެ. އެއްވެސް ޙާލެއްގައި އެއިގެ މާނައަކީ އަވަހަށް ދުޢާ ޢިޖާބަކުރެއްވެވި މީހާ ދެކެ ބޮޑަށް ރުހިވޮޑިގަތުމެއް ނޫނެވެ. ބޮޑަށް ލޯބިވެވޮޑިގަންނަވަނީ ދުޢާ ޢިޖާބަކުރެއްވެވުން ލަސްކުރެއްވެވި މީހާއަށެވެ.   

އެހެނީ މީހަކު ދެކެ ﷲ ތަޢާލާ ބޮޑަށް ލޯބިވެވޮޑިގަންނަވާނަމަ އެމީހަކަށް ކުރިމަތިކުރައްވަވާ އިމްތިޙާނުތައް ވަރުގަދަކުރައްވަވައެވެ. އެއީ އެމީހާ ތައުބާވުން ގިނަކޮށް ތަޤްވާވެރިކަން އިތުރުކުރަން ފުރުޞަތު ދެއްވަވަނީއެވެ.  

އެކަމުގެ ސަބަބުން ތިބާގެ ދަރަޖަ ޤިޔާމަތްދުވަހު އުފުލިގެންދާނެއެވެ. އަދި ޢިޖާބަ ކުރެއްވެވުން ލަސްވީމާ ދުޢާކުރާނެއެވެ. ދުޢާކުރުމަކީވެސް އަޅުކަމެކެވެ. ވީމާ ދުޢާކުރުން ގިނަކުރިވަރަކަށް އެމީހަކަށް ދެއްވަވާ ޘަވާބު ދާނީ ގިނަވަމުންނެވެ. އެކަމުގެ ސަބަބުން ޤިޔާމަތްދުވަހު އެމީހާގެ ދަރަޖަ އުފުލިގެންދާނެއެވެ.  

ވީމާ ދުޢާކުރުމަށްފަހު ކެތްތެރިވެލައިގެން މަޑުކޮށްލާށެވެ! ދުޢާކުރުން ގިނަކޮށް ދުޢާކުރުމަތީގައެވެ. އެއިރުން ނަތީޖާއަކަށްވާނީ ތިބާގެ ދަރަޖަ ﷲ ތަޢާލާ އެތައް ގުނައަކަށް އުފުއްލެވުމެވެ! އިން ޝާ ﷲ 

- އިމާމް ޢުމަރު ސުލައިމާންގެ ދަރުސަކުން